Əmmar Yasiri şəhodət
Əmmar Yasiri şəhodət
Hicri-Ğəməri sivı haftminə sori Səfə manqi nəvminə ruji Siffeyni dıjdə canqədə,Əmmar Yasir bə şəhodət məğami rəse.çəy şəhodəti xəbə Peyğombər(s)-I ğeybi xəbəonku be ki,hamyəşbe:”Ha Əmmar ha! tıni qıləy sıtəmkorə dastə bəkışte. qıləy holədə ki,tı əvoni bə həx iyən həyğəti tərəf dəvət bəkardeş”.
Əmmar Yasir çı camiyə botın iyən dıləku əziyyət kəşə qıləy merd be.Əv,bə peyğombər(s) aşığ be və çı Əli ibn Əbi Tolıb(ə)-i piyəkəsonku be.Əv,qıləy şucoətin iyən zumandə merd be ki,har qıləy koyədə Xıdo rizoyəti ıştə nəzədə qəteydəbe və dınyo jimonədə ğərəz ımi co çiş piyedə nıbe.Əmmar Yasir hejo deştə pı-mo yəni de Yasir iyən Suməyyə Mədinədə qıləy qədə kədə jimon kardedəbin ki,İslomi-Pəyğombər(s) ələni və oşkoə dəvət bino be.pəyğombər(s) dəvəti sıftədə mısılmınon bə Ərğəm bin Əbd Mənafi kə cəm bedəbin. Əmmar həm ki,qıləy həxtələbə cıvon be,bə Ərğəmi kə şedəbe və de İslomi-Peyğombəri(s) vindemon iyən sıxan kardedəbe.həmonə ikərə bə Əmmari vəs kardedəbe ta əv islomi həyğəti dərkko və çı İslomi-peyğombər(s)-I səhobəonku qıləyni bıbu. Əmmar hejo çı sıftəku ıştə pı-moş həm mısılmon kardeşe.imoni həyğət bın xıyzonədə qıləyn həddədə ozavziye ki, əvon hozzı bin ta bə harcurnə işkəncə həm tov biyon,əmmo mısılmon bımandon.Yasir və Suməyyə har dıqləyni de saxtə işkəncəon vositə bə şəhodət məğami rəsin və çəvon nomon çı islomi iminə şəhidon rutbədə ğərolış qəte.həmonə vaxti bə Əmmari həm şiddətinə işkəncəşon doe.əvışon dıroz kardeşone bəsə biyoboni qamə huşonsə və qonə sığonışon noe çəy sinəsə.əmmo,qırd ın işkəncəon bəçəy imoni hiç qıləy təsirış nınoe.joqo ki, pəyğombər(s) çəy barədə hamyeşe:”Əmmari səyku bə lınqi de imoni nuri pur bıə və imon deçəy qujd iyən xuni umuj qıniyə”.və coqləyni vırədə hamyedə:”hiçvaxti Əmmar çı dıqlə ko miyono şək nıkardeşe illa bə ruşd iyən hidoyəti nez bıə qıləş vıjniye”….
Əmmar Yasiri dıl de İslom iyən Peyğombər(s)-I məhəbbəti pur be və Məkkə saxtə jimoni zəmonədə ə həzrət de Cəfər bin Əbi Tolıbi rəhbərəti bə Həbəşə hicrəti vaxti de əvon bə ico hicrətış karde.Əmmar Xıdo-Rəsul(s)-i Məkkəku bə Mədinə hicrəti bəpeştə çı Həbəşəku bə Mədinə ome.əv bənə qıləy şucoətin iyən imoninə sərbozi hejo çı Xıdo-Rəsul(s)-I kənoyədə be.əv ıştə məzhəbi fəoliyyəton kənoyədə bə İslom, Ğıron iyən Pəyğombəri(s) xıdmət kardedəbe.əv.qırd məzhəbi,siyosi,fərhənqi iyən hərbi sahəonədə de bənə Səlmon Forsi,Əbuzər və Miğdodi bıə bəfodorə səhobəon bə ico və duşbəduş fəoliyyət nışon doydəbe.Əmmar Yasir çı Pəyğombəri(s) qırd ğəzvəonədə de İslomi şucoətinə əskəri nomi iştirok kardedəbe və hejo Pəyğombər(s) əy bənə qıləy rəşidə sərbozi tarif kardedəbe.
Seminə xəlifə ğətli bəpeştə Əmmar milləti bə Əli(ə) beyət kardey tərəf dəvət kardedəbe.çəy bəpeştə qırd səhnəonədə həm çə həzrəti xolisə əshob iyən əmonətdorə mışovir bə hisob omeydəbe.bə zəmononədə bə əməl omə canqonədə Əmmar Yasiri çı Əmirəl-Muminin Əli(ə)-I ləşkəri miyono ğərol qətey,de Əli(ə)-I mıxolifon canqədə çı həx iyən bəsirəti meyar be.həmmə milləti məsəş be ki,Xıdo-Pəyğombər(s)-I hamyəşbe:”havaxti qıləy mevzu baərədə ixtilof bə mion boy və çandə tirəti icod bıbu, Əmmar de həxı bəbe”. Bəçəy xoto fıtnəon buruz bıə vaxti,millət diyə kardedəbin ki,hələ binim Əmmar kom tərəfədəy və əvon həm həmonə cəbhə həx zıneydəbin.Cəməli canq qıləy həssos iyən tale həlləkə mərhələonku qıləyni be ki,ıştə vəzifə zıney nəinki,bo addiyə şəxson,bəlkəm bo məxsusə şəxson həm vey saxt və çətin be.zira,itərəfədə çı Pəyğombəri(s) dini bıvə və vəsiyy və çı həzrəte Fatimə(s) jimoni həmro və co tərəfədə həm çı Pəyğombər(s)-I jimoni həmro və iminə xəlifə kinə Ayişə ğərolış qətə be və bənə Təlhə və Zubeyri bıə fərdon həm boştə maddi mənafeyon xoto ıştə de Əli(ə)-I bıə beyətışon darıştəbe və bə həzrəti ələyh beşəbin.liza mısılmınonku idastə betərəf mandəbin və vəzyəti fəğət mışohidə kardedəbin və ya İmom Əli(ə)-I mıxolifə cəbhədə ğərolışon qətəbe.Əmmar Yasir deştə diyəro vindey huşi, zəkovəti iyən bəloğətinə kəlomi de deşmınon yavə təblığaton mıborizə bardedəbe və votedəbe:” dırıst və səhihe ki,Pəyğombər(s)-I jimoni həmro bə hurmət və ehtıromi loyığe,əmmo dini həx və hurmət bəsə çəy hurmətisə bəpe və vey dıjde”….
