Osmoniyə surəon-151

Osmoniyə surəon-151

In surə çı ğıyoməti ruji həxədə de odəmi bədəmi lorzınə ayəon zikri,bə mışrikon çəşnavi doydə.ğıyoməti ruj qıləy ruje ki,çı insoni qırd vucudi hətto çəy bədəmi pusti barədə həm sıxan votey bəbe və çəy sırron foş bəbe.liza,qınokoron bə qıləy nığılə tars və vəhşəti dılə ğərğ bedən.Kərimə-Ğıron bın barədə hamyedə:”əvon bəştə bədəmi puston bəvoteyn:çıro bəçəmə ələyh şoydəti kardedon? Cəvob bədoyn: həmmə çiyon bə zıvon vardə Xıdo,əmənış həm bə sıxan vardə.əv ki,iminə kərə şıməş ofəye və bəçəy tərəf oqordıney bəbiyon”.

Mışrikon yolon qıləy qırdbemonədə cəm bin və voteşone ki,çı Muhəmmədi(s) bəyon kardə şinə sıxan iyən cəzbəkə dastonon həmmə kəson bəştə səmt cəlb kardedə.liza,bəpe bə Kərimə-Ğıroni səbarz bıeyro qıləy çorə ro pəydukəmon.əvon bə ğərol omin ki,çı fəsod iyən sətasponey mərkəzon vırə ziyodkəmon və veyə fərdon cəzb kardero,bəçəvon ro qim kardey boyis bıə ziyodə əfsonə iyən mifon çəvon miyono pevolokəmon.liza havaxti peyğombər(s) Məkkədə çı Ğıroni bə odəmi dıli nıştə ayəon tilovət kardeydə, mışrikon bo həxə sıxanon bə milləti quşon nırəseyro,əvoni çəyku bə diyəro kardedəbin və votedəbin: dastəkə və vazilə bıjənən,de barzə vanqi şeer bəhadənən və bəçəy ko mane bıbənən ta əv səbarz nıbu.”Kofiron voteşone:bə ın Ğıroni quş mədənən və çəy tilovəti zəmonədə(ləğvə) botılə  sıxan  bığandənən ta ğasbu əv səbarz nıbu.(26-27).

Əmmo,Xıdovənd Fussiləti mıborəkə surə 27-28-ə ayəon bo bə Kərimə-Ğıroni ayəon quş nıkardey iyən bəy ləğvə sıxan ğandey əmr kardə kofiron qıləy dardnokə əzobi xəbərdorəti doydə.

Imruj həm islomi deşmınon hevujə surətədə de həxə dini mıborizə bardedə.əvon bp həx iyən ədoləti sədo hamuş kardero,jıqo muhiti bəyənde jeydən və hay-huy kardedən ki,hiçkəs çəvon sədo məseydəni. demiyən Kərimə-Ğıron çordə ğərn və əsrisə veye ki,deştə nığılə ayə və maarifon nəslon bə səodət iyən hərəbəxatəti dəlolət və təsbit kardedə.

Çın surə 41-42-ə ayəonədə bə Kərimə-Ğıroni qırd əsr və devrəonədə əbədi bıey işorə kardedə və bə mışrikon ğeyri-rasionalə sıxanon qıləy çəşnavi doydə ki,əvon Ğıron bəçəvon soyəx omeyədə,kofir bin,ım bomə məxfi iyən punhon nibəmande.

Peşo Kərimə-Ğıroni vəsf kardə holədə hamyedə:beşəkk,ım qıləy erjin iyən məğlub nıbə kitobe.qıləy kitob ki,hiçkəs bənə lımi qıləy kitob vardey nibəzne.qıləy kitob ki,misliş ni və çəy məntığ ğoym,çəy təlim rəğ-rişənin və çəy hukm iyən təlimon de bəşəri həyği ehtiyocon həmahənq və mıtobiğe.