40-ə Fəcri Teatri Festival

40-ə Fəcri Teatri Festival

Əzizon səlom, şımə ruj bə xəyr bıbu, mehribonon ın şanqonə şəvi, Həzrəte Zeynəbe Kubra(s) rehlətə şəvi sorəqardışi bə şımə xıdmət təsliyət ərz kardedəm. Umidımone ım əzizə Xanımi lutf və inoyət bə şımə ğesmət bıbu.

Əzizə duston, har sor İroni islamiyə inğilobi səbarzəti sorəqardışədə əlovə bə Fəcri festivoli kino baxşədə, Teatr baxşədə həm qıləy festivol bərpo bəbe.

Im bərnomədə Fəcri teatri festivoli çıl minnə dıvrə barədə ki Bəhmənə manqi 14 tosə 26 minnə rujədə Tehronədə bərpo bıə, bə şımə xıdmət məlumat dodəmon.

Dəvət kardəm de Tolışi Rədio bə ico bımandən və bə ımrujnə bərnomə quş bıdənən.

Xosə Tolışon, Teatr hınə çı İnsonon jimoniku tikəy iyən ictimaədə bəji hınə ğolibədə həmişə şo, oroməti və umidi rohiyə əlovə kardeyədə vey muhimmə təsirışe. Dırıste ki bə korona pandemiya xoto, Festivolon, nımoyeşi qurupon qırd bey ki əcumlə Teatri baxşonin, tətil bin, əmmo tojədən de umumi vaksinasiya iyən səhiyyəvi protokolon rioyəti vositə, teatr salonon həm oj bin.

İctimai və fərdi muxtəlifə baxşədə,Teatri xususi rol bois bəbe ki bə ım hınə bənə bə inkişof rəsə funqsiyaon qıləyni diyə bıbu. Mədəniyəti siyasəton icod bey iyən İroni inğilobi stabil bey bəpeşt, teatriku bənə mədəniyəti əsosonku qıləyni yod bəbe iyən dıvlət bəpe ım hınə bə inkişof rəsey iyən hınə soyb bıə kəsoniku himoyə kardey cəhətədə hərəkət ko.

İdori təşkiloti zumand kardey və İslami İrşod və mədəniyəti vəzarətxonə hınə koon moavenətədə, nımoyeşiyə hınəon mərkəzon icod kardey, nımoyeşi onemonon və kişvəri həmmə məntəğəonədə hətto kamə cəmiyətışon bıə şəhronədə çəy mərkəzi icod kardey, Fəcri teatri festivoli bərpo kardey və ostanonədə teatri festivolon dəvoniye əcumlə hadisəonin ki inğilobi əvvələ daonədə teatri strukturi icod kardeədə vey təsirışon be.

Dəvardə soronədə infrastrukturon zumand kardey zərrorət bois bıə, İroni həmmə məntəğəonədə hınə və mədəniyəti binaon və salonon soxteyədə sərmoyə noe əncom bıbu. əlovə bə ım bə təlimon diğğət kardey zərruriyət iyən tojə nəslon meyl bə teatri akademiya təlimon, bois bıə ki teatri universition iyən təlim mərkəzon həmçınin teatri tələbəon əlovə bıbu və ım hınə bə təsirinə ictimai quruponku qıləyni əvəz bıbu.

Beynəl xalğ meydonədə həm teatri baxşədə dəvardəyonku vey əctivə dərs handə və cıvonə cəmiyət, bo İroni teatri beynəl xalğ bey şəroyəti icodış kardə. Beşək bəpe bıvotəmon ki Asiya ğərb məntəğədə, İroni teatr mislış ni iyən Asiyaədə həm bənə qıləy vırəş bıə hınə ğeyd bıdə.

İronədə Fəcri teatr beynəl xalğə festivol, teatri muhimmə festivolonku qıləynie. ım festivol muxtəlif baxşonışe, əcumlə: səhnə nımoyeş, beynəl xalğ, rədio nımoyeş iyən xiyobonə nımoyeş. Im festivoli bərpoəkəyon İslamiyə irşod və mədəniyəti vəzarətxonə (nımoyeşi hınəon mərkəz), İroni nımoyeşi hınəon onemonon iyən teatri beynəl xalğə şirkətonin.

Imsor Yəzd şəhrədə, Fəcri teatri festivoli çıl minnə dıvvrə okarde mərosim bərpo bıə. Im festivol, rəğabəti səhnə nımoyeşon baxşədə, kişvəri həmmə məntəğəonku 109 qılə nımoyeşi qurup, 7 qılə mehmonə kişvəron və Tacikistoni kişvəriku ki ım festivolədə bənə xususi mehmon be, bərpo bıə.

Həmçınin ğeyre rəğabəti baxşədə, de təcrubin və veteranə hınə soyb bıə şəxson vositə vey erjinə əsəron nımoyeş doə bıə və ım baxşədə əsəron mıvzo, icra metod və keyfiyət cəhətiku mımtozə xusiyəton şomil be.

Mehribonon,(Rıza Saberi) teatri recisoronku qıləynie ki 75 sor sinneşe, bənə yolə veteran, teatri iminnə dıvrə yəni 1359 minnə soriku tosə çıl minnə dıvrə yəni ımsor, ım festivolədə iştirok kardəşe və har sor ım festivolədə bənə Xorasane Rəzəvi Ostan yəni Məşhədi nımoyəndə iştirok kardedə.

ımsor və ım festivolədə Saberi (poşte divare ğədimi koştarqah) nomə bıə teatri recisorəti və ənıvıştəti baxşədə iştirok kardışe.

Saberi muxtəlif vey mokafaton qətəşe, ki çəvonku Fəcri teatri festivoli muxtəlifə dıvrədə,  əti, plan kəşe və ənıvıştəti baxşonin. Im hınə soyb bıə şəxs ıştə hınə karnomədə əlovə bə teatrədə recisorəti iyən artistiyəti, çand qılə kitob həm nıvıştəşe və kinoədə həm rol ifo kardəşe, ki əcumlə çəy əsəron: (ismət), (sayehaye bolənd),(məzlome pəncom), (şena dər atəş) və (əşiğ) nomo bıə nımoyeşnoməonin.

Im festivoli beynəl xalğ baxşədə, (dastane Zal) nomo bıə nımoyeşnoməe ki bə Ferdosi Şahnamə əsos be və Bulqarıstani kişvəriku (Elena Panayotova) əy recisorəti kardə nımoyeş doə bıə.

(Elena Panayotova) de Ferdosi və Şahnamə çoknə oşno bey barədə votışe: əmə zıneydəmon ki şahnamə bo həmmə odəmon qıləy ali və cəzbəkə ədəbiyoti soybe. az diğğət kardedəm ki ım şahnamə be ki Farsi zıvoni oqəte bois bıə. Im həğiğəte ki əmə co mədəniyətiku bə hınə soyb bıə şəxsi aşiğ bıəmon, buçiki  çəy əsər mıosire, bəmə çokə hissi ovoştoniyəşe. Jəqo ki zıneydən Milodi 2010 minnə sor Yunisko təşkilati səmtiku bənə şahnamə handey 1000 minnə sori oxo elan bıə, iyən həminə məsələ bois bıə çəmə diğğət bə şahnamə cəlb bıbu.

Əmmo İron və Ermənistoni teatr, dəvardə soronku dıyande kanə rabitəşon heste.

Imsornə Festivolədə Ermənistoni recisor (Narine Qriqoriyan) de (sako əhle loretsi) nomo bıə teati nımoyeş doe iştirok kardə. əv de işorə bə İron və Ermənistoni diplomatiya rabitəon 31 minnə sorəqarış votışe: ım rabitəon sorəqardışi çok zıneydəmon əmmo İron və Ermənistoni bıvə rabitəon çand sa sor kanətiş bəbe.

(Narine Qriqoriyan) həmçınin votışe: az ım nımoyeşnomədə pidəme bıvotəm ki əmə bə çəmə hırdənon çiç doydəmon iyən mığubilədə çiç bəqətemon. Dəhşətinə dastanon və niqəronəkə filmon ki bo çəmə hırdənon voteydəmon, şayəd həmonə ləzədə çəy nəticə oşko nıbu, əmmo be şək vəoməy zəmonədə çəy nəticə bəvindemon.

*************************************

Bəle əzizon, co qılə əsər,(ta yek nəfəs) nomo bıə nımoyeş de Səmir Ğolamevi recisorəti be ki Azərbaycan Respublika kişvəeiku ım dıvrə festivolədə iştirok kardəşe, ım əsər Azərbaycani 44 rujə canq, əsqəron iyən canbazon muğavimət iyən isori rəvoyət kardedə ki de qıləy qurupi vositə nımoyeş doə bıə.

İraği mədəniyəti vəzarətxonə nımoyeşiyə mudir (Heydər Əlcumə) Fəcri teatri festivoli mehmononku qıləyni be ki qıləy mısohibədə votışe: vaxti İrağədə (Muhəmməd Rəsuləllah(s)) nomo bıə film ki Məcide Məcidi çəy recisor be, nımoyeş doə bıə çəyku vey xoşımon omə jəqo ki 8 manq salononədə nımoyeş doə bıə. Pidəmone ki teatri festivolonədə həm İroni səmtiku nımoyəndəon bə İrağ boon.

Ərbili hınə sendika nımoyəndə həm etığadış heste ki: əmə de İroni  Kırdıston hevujə marzımone iyən mıştərikə koon dıyande əncom dodəmon. Umidımone artistiyəti və recisorəti hissədə İroni ostadonku bə çəmə kişvər boənən və əmə şımə təcrubəonku istifodə kəmon.

Əlovə kəmon ki İraği kişvəriku ım festivolədə (səndəliha) nomo bıə nımoyeş iştirok kardəş be. Im nımoyeşi recisor (Necat Nəcm Maced) be ki de işorə bə İrağ və İroni hınə soybon mıştərikə həmkarion votışe: İronıjon ofəyevonəti bə sitoyeşi loyiğe və az neziku de əvon vey rabitəm heste.

Fəcri teatri festivol Çıl minnə dıvrə co qılə əsəron, Əfğanıstoni kişvəriku (Tabot) nomo bıə nımoyeş de (Senator Huseyni) recisorəti, iyən İron və Əfğanıstoni mıştərəkə nımoyeş (kohe çıl doxtər) de (Emaduddine Tacik) recisorəti be.

Həmçınin ım festivolədə Dışənbə şəhri Əbulğasıme Lahoti dıvləti teatriku (Ferdosi) nomo bıə nımoyeş de (Sultan Osmanevi) recisorəti iştirok kardəşe ki miladi 2019 minnə sorədə Tcikiston Respublika (Pərəsto festivoli) nomo bıə festivolədə iminnə mokafati qətəş be.

Ğorban Saber (Ferdosi) nomo bıə nımoyeşi artistonku qıləynie ki çand kərə bə İron səfərış kardə, qıləy mısohibədə votışe: az korona pandemiya şəroyeti zəmonədə vey oqıniyə və noumid bıəm, əmmo korona şəroyeti bəpeşt, ım çıme iminnə səfəre. Az ım festivoli sərkatibətiku vey təşəkkur kardedəm, və həmmə kəsonku ki pidəşone iyən umidışone teatr bəji bımando.

Əzizə əməson bə ım bərnomə quş doe xoto şıməku təşəkkur kardəm.