Rəhbəriyyəti nəzəku məntəğə dəvominə əmniyyəti tərkib hissə-5

Rəhbəriyyəti nəzəku məntəğə dəvominə əmniyyəti tərkib hissə-5

Əzizon bə şımə xıdmət səlom ərz kardedəm, şımə cımə ruj bə xəyr bıbu.

Mehribonon ımruj bə məntəğədə stabilə əmniyyəti xusiyəton barədə İroni yolə rəhbər Həzrəte Ayətullah Xamenei erjinə sıxənon və nəzəon, işorə kardedəmon. Ə Həzrəti nəzəku de bə co kəson təkyə kardey vositə əmniyyəti təmin kardey qıləy puçə xəyole.

Im bərnomədə bə həzrəte Xamenei nəzə əsos əmniyyəti cəhətiku bə co kəson vabəstə bey behranon və muşkilaton işorə kardedəmon. Dəvət kardəm dəmə bə ico bımandən və bə ım bərnomə quş bıdənən.

Xosə həmzıvonon, İroni İslamiyə Yolə Rəhbər Həzrəte Ayətullah Xamenei, İmom Huseyni(ə) nomo universitədə hərbi ğıvvon tələbəon ali məktəbi sə karde mıştərəkə mərosimədə ki de video vositə bərpo bıə,  məntəğədə xarıcion mıdoxilə ixtilof və zərəl-ziyoni illət bəyonış karde.

Həzrəte Ayətullah Xamenei işorə kardə: de bə co kəson təkyə kardey vositə əmniyyəti təmin kardey qıləy xomə xəyole. əvon ki bə ım xəyol qiriftor hestin vey rə çəy silli bəhardın, buçiki har kişvəri sulh, canq və əmniyyət ki de xarıcion mıstəğim və ğeyre mıstəğimə mıdoxiləon vositə icod bıbu mısibətin iyən dəhşətinə hodisə icod kardedə.

Im nəzə, məntəğədə bıə dəvardə soron təcrubə və ısətnə həğiğətonədə  muşahidə bıdə. 

Təcrubə nışo doydə ki xarıcion həmişə de əmniyyət soxtey bəhonə ım məntəğədə vey noəmni iyən bıhron icod kardəşone. əvon Fars Dıyo məntəğədə de İronfobiya və behron icod karde, peşo Fars Dıyo ətrof bıə kişvəronro əmniyyəti vabəstəti, hədəfışon heste ki milyord dollar siloh bıhəvotən iyən ıştə bazaon muhafizə kon.

Dəvardə 42 sorədə, Amerkə rəsmi şəxson bo bə İroni milləti zərbə jeyro, təhdid, dəqardımoni, sanksiya, ğovmon təhrik kardey,təcziyə tələbəti, canqtələbət, iğtisodi mıhosirə, nıfuz və co metodonku istifodə kardəşe.

Im nışo doydə ki Amerkə deşmənçiyəti vey nığıl və rişədore. Isət vey həğiğəton de səhihə mətləbon bəyn kardey vositə, oşko bıə.

Dəvardə soron təcrubə nışo doydə ki de Amerkə rəhbəriyəti pesoxtə koalisiyaon, fəğət məntəğə əmniyyəti məhv kardey xoto icod bıə. Dəvardə 42 sorədə Amerkə de məntəğədə hərbi baza icod kardey vositə, həğiğətədə be ğanuni, təhdid və noəmni bois bıə.

həminə iştirokiku Sıpiyə kə hədəf ıme ki məntəğə de həmkarion be etebo-befoydə ko. Im hərəkəton çandə daon mıddətədə dəvomışe və ısət çəy bədə nəticəon oşko bıə jəqo ki məntəğədə stabilə əmniyyət reqional həmkarion çərçivədə bə qıləy əsosinə əvəz bey ehtiyocışe.

İslamiyə inğilobi yolə Rəhbər həminə cəhətədə, Əfğanıstoniku Amerkə ərtışi xarıc bey, Amerkə bənə duə iğtidori zıneydə və nə həğiğiyə iğtidor,ijən hamiyəşe:Amerkəvıjon 20 sor bənav, bo Taleboni məhv kardeyro bə Əfğanıston varid bıən və işğalçiyəti mıddətədə, vey ğətliam, cinoyət və zərəl-ziyoni varid kardışone, əmmo modi və insoni zərəl-ziyonon bəpeşt, hukuməti bə Talebon doşone və xarıc bıən ki ım həğiğət bo həmmə kişvəron ibrətomize.

İroni həmmə ğıvvon sərkamandir, Əfğanıstoniku xarıc bey zəmonədə, Amerkə ərtışi vəziyəti çı həğiğiyə mohiyəti zıneydə və hamiyəşe:  Amerkə ərtışiku Halivodi şikilon, fəğət qıləy  nımoyişe, boçiku çəvon həğiğiyə mohiyət ıme ki Əfğanıstonədə vindemone.

Hadisəoni bənə Septambri 11 minnə ruj, İrağ canqədə Amerkə daveon və həmçınin Əfğanıston canqədə çəvon rol nışo doydə ki Amerkə tənəzzul peydo kardəşe.

Koşınason bovəşon heste ki dəvardə soronədə Amerkə heqemonəti bənə sultə tələbə ğudrəton tənəzzul peydo kardəşe və ım kişvər ıştə tələbon bə co kişvəron icbor kardey əzı ni və ım həğiğət dəvardəonku vey dınyo bə çand ğutbış bıə nizomi səmti hərəkət doəşe.

Amerkə məşhurə təhliləkə Noam Çamski ım barədə voteydə: Amerkə tənəzzul bino bıə və Amerkə rəsmi şəxson puçə xəyol ım barədə ki Amerkə dınyoədə vey yolə zumandə kişvər heste, qıləy xoşə hane.

Vey soronədə Amerkə səyo cəhdış be ki dınyoədə bənə çokə hərbi və be rəğibə ğudrət bıbu, əmmo həğiğət ıme ki Amerkə dovrani sə omey vey zəmone ki bino bıə. Amerkə tənəzzul fəğət hərbi hissədə nıbe və  bə İroni Yolə Rəhbər nəzə əsos, Amerkəvıjon har vırədə ki mıdoxilə ko, milləton miyon mənforin.

Həzrəte Ayətullah Xamenei ım barədə bə Amerkə və Avropa bəhson işorə kardə və hamiyəşe: kali Avropavıjon, çı Amerkə hərəkəti peştiku xəncər bə hisob vardən,və jəqo votən Avropa bəpe be ım ki bə Nato və Amerkə təkyəş bıbu, ıştə əmniyyəti təmin ko.

İslamiyə inğilobi Yolə Rəhbər ijən əlovə kardəşe: vaxti avropa kişvəron bə Amerkə təkyə kardey xoto, bəştə stabilə əmniyyəti icod beyədə nırəse hiss kardedən, co kişvəron hisob-kitob ki ıştə hərbi ğıvvon Amerkə və co xarıcion jintonədə noəşone,oşko bəbe.

Jəqo ki Həzrəte Ayətullah Xamenei işorə kardəşe, məntəğədə xarıcion hərbi iştirok, ğərəz zərəl-ziyon və xərobion, hiç nəticəş ni. Qıləy holədə ki məntəğədə çok ıme ki həmmə kişvəron mıstəğil və bəştə milləti təkyə kardey iyən de hamsuyə kişvəron ərtışi cəhətədə hərəkət kon.

Təcrubə nışo doydə ki məntəğə ərtışon karde bəznen məntəğə əmniyyəti təmin kon və bəpe bə xarıcion iştirok və mıdoxilə icozə nıdon.

Həğiğətoni bənə Viyetnamədə Amerkə ərtışi məğlubiyət, (RQ170) nomo bıə Amerkə bepilotə təyyorə de İroni vositə kontrol və (Global Hawk) nomo bıə Amerkə hərbi vey inkişofə bepilot təyyorə ki ım həm de İroni vositə məhv bıə və həmçınin Amerkə bezuəti ıştə reqional şərikon bənə Sionist rejim və Ərəbistoni hərbi himoyədorəti, həmmə çı Amerkə heqemonəti tənəzzuli nışo doydə.

Mehribonon bə ım bərnomə quş doe xoto şıməku təşəkkur kardedəm.

Dəvət kardəm bə co bərnoməon quş bıdənən ki koy həmro bə şımə xıdmət təğsim kardedə.