Elm və əxloğ ustodi matəmədə

Elm və əxloğ ustodi matəmədə

Əzizə əməson səlom, umidımone şımə hol-əhvol çok bıbu. əzizon tule torixədə, İslam çı İlahi uliya və peyğəmbəron həyotəbaxşə nuronku irson bardəşe iyən ın sahədə mısılmonə alimon bənə təsirin iyən əktivə cərəyoni dəvəşedən. Im yolə alimon çı islam dini adətonku prosniyə bıə kəson iyən Peyğəmbər(s)-i əhle beyt(ə) məktəbi səmtiku, ilahi rəhbəron metod və şivə, ıştə çiroğ ğəror doşone. əvon bə nəslon hidoyti məşğul bin və mısılmonon ictimai, siyosi iyən elmi jimonədə, deştə bəsirət və zıney vositə, vey muhimmə roli ifo kardeşone.

Ayətullah Fateminiya həmonə vey yolə alimonku be ki ıştə jimonış çı dini elmon iyən erjinə kitobon nıvışteyədə dəvardonəş be. və nəhayətədə, bə noxəşəti xoto, Hicri Şəmsi 1401 minnə sori, Ordibeheştə manqi 26 minnə rujədə bə rəhmət şə.

Im bərnomədə bə ım yolə alimi erjinə jimon, çəy əsəron iyən sıxənon işorə bəkamon, dəvət kardəm dəmə bə ico bımandən.

Bəle Əzizon Ayətullah Fateminiya ıştəni zıney zəmoniku, ıştə jimoni bərnoməonədə, bə ıştəni prosniye iyən cəhd kardey məşğul be və fəziləton və əxloği çokətion kəsb kardeyədə vey fəaliyət əki.

Əv hırdənəti dıvraniku bə umutey vey meylış be. Və həmonə zəmoniku bə ıştə dədə(Miresmail-i) elmi və dini prosniye jintonədə ğərorış qətə. Peşo vey soron Ayətullah Mostəfəvi ki Mərhum Ayətullah Sed Əli Ğazi şoqirdonku be, bəştə elm və zıney əlovəş kardə və həmzəman ıştə hovzə təhsilon həm idomməş do. Həmçınin Ayətullah Fateminiya alimoni bənə Əllomə Təbatəbai, Muhəmməd Təği Amoli, Sed Rıza Bəhaoddini, Muhəmməd Təği bəhcət və Əllame Cəfəri nəzdədə bəştə islami elmon iyən erfoni vırə əlovəş karde. İşorə kəmon ki ım yolə alimonku kalion Ayətullah Ğazi şoqird bin.

Mehribonon İslami təlimonədə omə ki ə kəsoni ki bandə bey royədə ğədəm peqəton, Xıdovəndı xalığ həm bəvon vey çokə roon nışo dodə. Jəqo ki Xıdo Ənkəbuti surə 69 minnə ayədə hamiyəşe:

“Və çəmə royədə cihod kardə kəson(çı nezəti) roon bəvon nışon bədomon və həyğətən, Xıdovənd de çokə ko soybone”

Bəle Ayətullah Fateminiya jıqonə şəxson nımunə be ki ıştəni prosniye iyən ıştə nəfsi pok kardey dumoədə, dərk iyən şuhud hissədə bə barzə vırəon rəsedən. Ğasbu jığo vote bəbe ki çı Ayətullah Fateminiya vey yol iyən nımunə xusiyət, çəy təğva iyən təvazokorəti be. Həmçınin kali şəxson tərəfiku çəy barədə vey kəroməton bəyon bıə, əmmo ıştən hiçvaxt ım mətləbon bəyon və təsdiğ nıkardəşe be.

Bəzi vaxt minbərədə bə ım kəroməton işorə əki, əmmo vey rə çəvonku dəvardedə be. Ayətullah Fateminiya ıştən “sıxənonku nuktəon” nomo bıə kitobədə, votışe: Həzrəte Əmirəlmomenin Əli(ə) Homam xutbədə bə Xıdovənde Xalıği pok iyən pərhizqorə bandəon və çəvon xusiyəton işorəş karde iyən hamiyəşe: çəvon jimoni sirə və metod bə təvazokorəti əsos be”

**************************************************

Əzizə duston, Şivə yəni jimoni şivə və metod, ki 2 cur heste: qıləyni hiss cəhəto heste ki həmonə royədə hərəkət kardeye və co qıləni ğəyre hissi cəhəto ki bə jimoni metod iyən şivə əsose. Həzrəte Əli(ə) hamiyəşe: ım şəxson çəvon jimoni metod iyən şivə de təvazokorəti şedə. Təvazokotəri həmməy xəy iyən çokətion kilid bə hisob omeydə. həlbətə ım mətləbədə səhv nıbu, təvazokorəti zəifəti və bə təcrid şey mənoş ni, ki har kəs har çi ki bıvoto və har çi ki əncom bıdə ğəbul iyən təsdığ kəmon. Təvazokorəti yəni hiç vaxt co kəsonku ıştəni bəpe və yol hisob məkəmon.” Və əv, ıştən, jıqo be.

Ayətullah Fateminiya, səadət royku hərəkət kardey iyən zıney və elmiku istifodə kardeyro, kərimə Ğıroni bənə vey çokə mənbə zınəş be və etığadış be ki əqə həminə royədə, natığ de ğəşənqə şivə iyən surəti ıştə zıvon və ğələmiku istifodəş bıbu, karde bəzne vey təsirin bıbu, və ıştə moxatəbi bə həxi səmti hərəkət bıdə. əv həminə barədə votəşe: “ əqə sıxən və kəlom vey ğəşənq bəyon bıbu, vey cozibədor bəbe, çən əqə natiğ çı dınyo həğiğəton vey saxt iyən mənəviyə misolonku bəkəno bəyon ko, jığo nibəbe, diyə kənən Kərimə Ğıron, ıştə təbyin və təfsiron çoko vey çokə şikil iyən oşko ğolibədə bəyon kardə, əqə Ğıron bə ım ğəşənqə bəyoni əsos nıbu, ayaon karde nibznen bə dılon ğələbə kon, de ım vıcud ki Ərəbon şer iyən şaerəti baxşədə vey məşhur bin və vey barzə təxəsusışon be iyən şer voteyədə həm vey məhorətin bin əmmo vaxti Ğıron nozil bıə, çəvon şeron bə kəno mandə və ım nışo doydə ki Ğroni məno vey kırtə sıxənon və kəlməon ğolibədə bəyon bıə. çən bəpe Ğıron iyən nəhcul Bəlağəku təbəiyət kardey çərçivədə de millət sıxən bıvotəmon və diğğət kəmon ki çəmə sıxənon ğəşənq bıbu və hışk məbu”.

Əzizon, Ustad sed Əbdullah Fateminiya recal iyən kitob şınosi hissədə, islami elmon təhğiğəkəyonku qıləyni be. Əv de ğələm iyən zıvoni silohon istifodə kardey vositə, dini elmon baxşədə vey şoqirdon tərbiyəş kardə. Həmçınin İroni İslam Respublika tele-Rədio məerefəti bərnoməonədə, bənə koşınon iştirok əki. Və deştə şin iyən nufuzinə zıvon iyən kəlomi vey şobhəon həl əki.

Ustad Fateminiya Səhifəye Səccadiyə və Nəhculbəlağə kitobon barədə vey məşhur iyən mohirə təfsir əkə bə hisob omeydə be və həminə kitobon barədə muxtəlifə iclosonədə nıtğ əkardi. “şərh və təfsire ziyarəte came kəbirə”, “nukteha az qofteha”, “fərhənqe intizor”, “Fərcame eşğ” ki Həzrəte İmom Xomeyni(r)-i ğəzəlon barədəy , “yek nukte əz hezaran”,“ərməğane ğədir” ki Ğədirexomi barədəy və şiə və sınni mənbəonku, 40 qılə hədison şomile, ım ustade əxloği iyən erjinə natıği əsəronin.

Xosə əməson bə ım bərnomə quş doe xoto şıməku təşəkkur kardəm, dəvət kardəm de tolışi Rədio bə ico bımandən və bə ımrujnə bərnoməon idomə quş bıdənən ki koy həmroon bə şımə xıdmət təğdim bəkan.