Ummul-Bənin,Kərbəlo şəhidon inə
Ummul-Bənin,Kərbəlo şəhidon inə
Cəmadiyul-Sani manqi senzəminə ruj qıləy bəfodoroə jimoni həmro iyən mehribonə inə ğəmqinə ğurub və bəfoti ruje.həmonə xanım ki,çəy əxloği fəziləton,insoniyə kəmolaton,imoniyə ğıvvə,səbr kardey, bəsirət iyən zıney, natığəti iyən şayirəti,əvış bo mısılmonə jenon qıləy ulquş kardəbe.
Çə buzurquvarə jeni nom Fatmə və çəy kunyə “Ummul-Bənin” yəni çı zoon inə be.çə həzrəti pı nom Hizam və çəy mo nom Səmamə be.çə həzrəti vilodət və moəku bıey zəmon,təğribən Hicrəti penc sor bəpeştə elon bıə.çəy xanedan de şucoət,kərəm,əxloğ,hınə,iştimayi xadim və yolyəti məşhur be.Ğureyşi bəpeştə çı mıxtəlifə ərəbə ğəbiləon komil iyən yolə qılə bə hisob omeydəbe.fəğih,ədib və 13-ə əsri bioqraf ustad Əllamə seyd Muhsin Əmin votedə:”Ummul-Bənin(ə) qıləy xoşbəyonə şayir və çı əsil iyən şucoətinə xıyzoniku be.”əv qıləy xıyzoniku be ki, çı ərəbi dıjdə nəsəbşunos iyən geneloq Əğil ibn Əbi Talıb bə İmom Əli(ə)-I voteşe:”ərəbi miyono çəvon pıonku vey şucoətin iyən ğəhrəmonə şəxson pəydu kardey nibəzneş”.
Həzrəte Fatimə(s) şəhodəti bəpeştə Əli ibn Əbi Talıb(ə) ıştə bo Əğiliku ki, çı Ğureyşi dıjdə nəsəbşunos iyən qeneloq be,piyeşe ki,boəy şucoətinə nəsliku qıləy jimoni həmro bıvıjno.Əğil Fatimiyyə Kilabiyyə ki,çı Bəni-Kilabi nəsliku be, bə ə həzrəti nışonış doe.İmom(ə) həm çəy vıjnemonış ğəbul karde və əvış çı Ummul-Bənini pı palu vığandeşe.Hizam ki,qıləy vey mehmonpərəstə inson be,komilə surətədə mehmondorətiş karde və de qıləy çokə ehtıromi bəy xəşoməş vote və çəy mığobilədə qıləy ğıbonə pəsış obırniye.çı rəbi adət və dəb ımbe ki,de tosə se ruji bə mehmoni çok-çoki diyə kardedəbin və seminə ruji çəy hacət iyən tələbi dəparseydəbin və çəy omey səbəbi xəbə seydəbin.Ummul-Bənini xanedan həm çı Mədinə şəhriku bə kəno jimon kardedəbin,bə jıqo qıləy rəsmo-adəti əməlışon karde.çominə ruji de ədəb iyən ehtıromi çəyku dəparseşone ki,boçi oməş çəmə kə və Əğili həm cəvobış doe ki,şımə kinə Fatimə bo Əli ibn Əbi Talıbi sıeyro oməm.Hizam hiçvaxti jıqo qıləy çi çəş kardedə nıbe,əve çı heyrəti dılədə mandəbe və de qırd sədoğət iyən rostəvıjəti voteşe:bəh bəh! çı şərofətinə nəsl iyən çı əzəmətinə xanedan! əmmo ha Əğil ha! qıləy badiyənişin iyən səhroədə jimon kardə jen bə Əli ibn Əbi Talıbi loyığ ni. Əğili çəy sıxanon məsey bəpeştə voteşe:Əli(ə) ıştə votə çiyonku xəbəş heste və de qırd ın holon deəy izdivac iyən vəyə kardey fikış heste.
