Osmoniyə surəon-31

Osmoniyə surəon-31

وَالَّذِينَ اتَّخَذُواْ مَسْجِداً ضِرَاراً وَكُفْراً وَتَفْرِيقاً بَيْنَ الْمُؤْمِنِينَ وَإِرْصَاداً لِّمَنْ حَارَبَ اللّهَ وَرَسُولَهُ مِن قَبْلُ وَلَيَحْلِفَنَّ إِنْ أَرَدْنَا إِلاَّ الْحُسْنَى وَاللّهُ يَشْهَدُ إِنَّهُمْ لَكَاذِبُونَ (107

Və(çı mınofiğonku i dastə)şəxson hestin ki,bə islami zərbə jıey iyən bo kufri tərvic kardey və mominon miyono təfrığə eğandey iyən bə Xıdo və bəçəy peyğombəri kanə deşmınon(koməqiro) qıləy məçitışon soxte(dute) iyən hejo ğəssəm hardedən ki,xeyə koyku co qıləy məğsədımon ni. (əmmo)Xıdovənd şəhodət doydə ki,əvon duəvojin.

Tobə surədə bəhs bıə mevzuonku qıləyni,mınofiğon iyən dı dimə insonon barədəy.bın ayəonədə jıqo fərdon hiyləgər və dıdimə rəftoron tərsim kardedə.

Əbuamiri Mədinədə Xəzrəci toyfə miyono ziyodə nufuzış hestebe.əv çı islomi peyğombər(s)-i bə Mədinə hicrəti iyən mısılmınon cəmiyyəti vey bıey bəpeştə,çı Mədinəku bə Məkkə vite və de peyğombəri(s) canq kardero çı ərəbi ğəbiləonku  koməqış tələb karde.

Uhudi ğəzvə bəpeştə deməkə ki,mısılmınon bın canqədə de ziyodə muşkilaton dimbədim oməbin,islomi şuhrəti sədo bə həmmə vırə pevolo be.Əbuamir ki,bə islomi inkişofi tov vardey zıneydə nıbe,bə tarıxi sənədon  əsos de Roma podşo Herqeli əloğəş oqəte ta əv ıştə ləşkəri bo mıslımınon etosniyero bıvğando.Əbuamir hətto bə Mədinə mınofiğon həm qıləy noməş nıvışteşe və bəvon mıjdəvoniş doe ki,de romə ləşkəri bəçəvon koməq bome.əv tovsiyə kardeşe ki,boəy Mədinədə qıləy mərkəz bısoxton ta çəy vəomədə bıə fəoliyyəton mərkəz bıbu.əmmo çun jıqo qıləy mərkəzi Mədinədə soxtey imkon mevcud nıbe,mınofiğon vey çok dərəsin ki, boçımiro bəbe əvon Mədinədə qıləy məçit bısoxton.

Hicrəti nəvminə sori iyən peyğombər(s) de mısılmınon idastə bə Təbuki canqi tərəf hərəkət kardeyədə,çı mınofiğonku i qrup çı pəyğombəri palu omin və ərzışon karde ki,bəmə icozə bıdə əmə çı Ğoba məçiti kəno qıləy məçit bısoxtəmon ta zəyif iyən piy bıə şəxson voşə həvosatadə bəşmə məçiti nımoji omey zuşon nıvişko,bə həmonə məçit boon və ıştə dini fərizə iyən vocibaton bə vırə bırosnon. Peyğombər(s) həm bəvon icozəş doe.

Çən,çoko ki,peyğombər(s) çı Təbuki canqiku oqarde,mınofiğon çə həzrəti palu omin və çəyku tələb kardeşone ki,boy çəmə soxtə tojə məçitədə qıləy nımoj bıvoto.bın zəmon vəhyi firiştə nozil be iyən çəvon sırronku qıləy pardəş peqətə.çın osmoniyə xəbə bədiqə,peyğombər(s) nəinki,əyo nımojış nıhande,bəlkəm əmrış karde ki,həmonə vırə xərobəkən iyən çı şəhri qırd ancəvər iyən xəşəlon bə həmonə vırə rukon.