Ğərbi siyosətmədoron tojə əxloği skandalon

Ğərbi siyosətmədoron tojə əxloği skandalon

Ğərbi informasiyə vositəon ımrujnə iminə dərəcə xəbəonku,çın məmləkəton siyosətmədoron ğeyri-əxloğiyə rısvoyəti mevzuye.qıləy zəmon İtalyə sabiğ iminə vəzir Berloskoni ğeyri-əxloğiyə rəftoron bo çın kişvəri mətbuati sujetonku be və çəy jimoni həmro Veronika Laryo bə İtalyə “Ansa” aqentəti vığandə de qıləy emayli vositə çı Berloskoni bə cıvon iyən reçinə jenon bıə həvəsi barədə ıştə etırozış elon kardəşbe.qıləy zəmon ki,ğərbi mediya çı Fransə kanə rəyis Nikola Sarkozi ğeyri-ğanuniyə cinsi rabitəonku sıxan votedəbin iyən çı Amerkə sabiğ prezdent bill Klintoni de Monika Levinski Sipiyə Kədə ğeyri-ğanuni cinsi rabitəon ziyodə sər-sədo iyən skandalış bə əməl vardəbe.

Çın skandal iyən rısvoyətiyon mevzu həxədə oxonə manqonədə ciddi surətədə bəhs bedə.macəra çiyo bino be ki,Hollividu məşhurə produsser Harvey Vaynsteyni barədə 40 qılə jeni çın şəxsi de bəvon təcavuz kardey nomi çəyku şikoyətışon karde.çın məçşhurə produsseriku ğəfləti surətədə seksual zəminədə şikoyət kardey iyən ın macəra ifşo bıey bədiqə,bın zəminədə etırofon ləpə bə cuş ome.joqo ki,ğərbədə çı seksual xaraktırinə hodisəon ğıboni bıə jenonku idastə ıştə”Tvitter”-ədə mobil telefonon mesaj qruponədə “mı həm çın ğıboniyonkum” tezisi qıləy səfərbərəti kompaniyəşon bə ro dəğande.qıləy kutoə zəmonədə məşhurə bə ın kompaniyə anqıl qınin.Marqot Vallstrom Sued ya İsveçi sabiğ xarici koon vəzir min cumlə çın fərdonku be ki,etırofış karde ki,ıştə bə devləti xıdməti zəmonədə bə cinsi təcovusi məruz mandə.

Bilofosilə ın rısvoyəti ləpə bə Avropə Parlamenti həm rəse.İngiltərə “Sandi Taymz” rujnomə deştə qıləy hisobati ifşoş karde ki,bə 87 qılə jeni iyən 6 qılə merdi ələyh Avropə Parlamentədə seksual xaraktırinə təcavuzon bıə.çın cərəyoniku tikəy dənıvarde ki,joqo skandalon İngiltərə ıştən parlamentədə oşko be.bə intişor bıə məlumaton əsos,İngiltərə “Muhafizəkoron” partiyəku çandə da qılə vəzir iyən nımoyəndəon bə joqo ğeyri-əxloği rısvoyətiyon mıttəhəm bıən.İngiltərə navkonə mıdofiyə vəzir Maykl falon çın fərdonku be ki,oxoyədə bəştə nomınosibə rətfroron xoto istefoş doe.çın rısvoyətiyon otəş həmçinin bə “Fəhlə” partiyə həm siroyətış kardə.çın partiyə 76 sinnə nımoyəndə Kloyn Hapkenz de qıləy cıvonə jeni hoziyə rəftoron xoto ıştə koyku bə kəno noey be.çın skandalon bəpeştə Yolə Britaniyə sərvəzi Treza Mey bə çın kişvəri siyosi partiyəon yolon qıləy noməş nıvışte və çı İngiltərə parlamenti abru şıey həxədə çəşnaviş doe.

Çı Amerkə Konqresi vəzyət həm bəsə Britaniyə iyən Avropə Parlamentonsə vey çok ni.joqo ki, ”Assoşeyted-Press” aqentəti bın zəminədə de qıləy hisobati elonış kardə ki,ısətnə Konqresi iqlə nımoyəndə və navkonə qılə se qılə jenə senatoron ıştə merdə həmkoron tərəfiku bə seksual təcavuzi məruz mandən.ın jenon çımonku iborətin:Linda Sançez Kaliforniyə ısətnə nımoyəndə,Barbara Bakser sabiğ senator,Meri Bono iyən Hilda Solis.