Şiiə yolə alimon-86

Yolə fəğih bıə Əllomə Muhəmməd Təği Məclisi İsfəhoni şəhri elmiyyə-hovzəon ali və barzə ustod və  mudərrisonku bıə ki,haruj ziyodə şoqirdon çəy məhzərədə zonu şat kardedəbin və bənə Molla Muhəmməd Bağır Məclisi,seyd Nemətullah Cəzayiri və Molla Muhəmməd Saleh Mazandarani bıə dıjdə alimon çəy şoqirdonku bə hisob omeydə.demiyən Əllomə Məclisi be ki, deştə millət iyən camiyə irtibotış hestebe və deçəvon irşod,hidoyət iyən əmr be məruf iyən nəhy əz munkəri koy məşğul be.çəy çı Ətiği Came məçiti kəno bıə mənzil,milləti şıə-omə vırə be və ın yolə alim əyo çı milləti dınyo iyən axırəti məsələ və muşkiloton həll kardedəbe.Əv bənə isfəhoni şəhri cımə imomi de camaati moyizəvə irşodi koy məşğul beydəbe.çəy nışvıştə ”Hədiğətul-Muttəğin” elmiyyə risolə ki,bo milləti istifodə kardey xoto və de forsi zıvoni təlif kardey bıə ki, ziyodə alimon dığğətış bəştə cəlb kardə və şəri hukmonədə çı milləti muşkilon həll kardedəbe…

Buzurquvarə alim bıə İminə Məclisi  jimoni cəzzob iyən ruşinə səyfəonku qıləyni,çəy de Səyfəye Səccodiyyə bıə ziyodə uns və məhəbbət be və əv milləti de ın erjinə kitobi oşno kardedəbe. Muhəmməd Təği  Məclisi nəğl kardedə:bə hədı-buluği rəsə sıftənə zəmonədə bo İlahi roziyəti kəsb kardero ziyodə cəhd kardedəbiim.şəvi qıləyniyədə çı hani de oğoəti miyono de Əsri İmomi(əc) vindemon bəmı nəsib be.bın vindemonədə çı şərifə İmomi məhzəriku(əc) çandə qılə sıvolom karde və peşo ərzım karde çımı deşmə bıə vindemon hejo bomı mıyəssər beydəni . çən,qıləy kitob bəmı mıərrifikə və nışon bıdə ki,dayima bəy əməlkəm.həzrəti hamyeşe ki,qıləy kitobım bə Muhəmməd Taci doəme ta bətı bırosno.oğo bıey bədiqə həmonə  Muhəmməd Taci dumo şim və peşo tikəy çəy dumo nəvey bədiqə əvım pəydu karde və əy Səyfəye Səccodiyyə kitobış bəmı hədiyə kardeşe.bəmim və həmonə kitobım maçə karde və ıştə çəşi səpe nome”…..

Səhifeye-Səccodiyyə qıləy kitobe ki,çı şiəyon çominə İmom Həzrəte Əliyyibnil-Huseyn Zeynul-Abidin(ə) zıvoniku bə 54 qılə dıvo iyən sıtoyişonku iborəte.Kərbəlo vağiyə bəpeştə İmom Səccod(ə) ki,de Xıdovəndi irodə çı Kərbəlo xuninə hodisədə de solimə coni səlomət mande, bənə Peyğombəri(s) həxə canişin iyən çominə imomi çı imoməti olətış bəştə tanış karde.əməvi hukumət Kərbəlo xəyonəti,Seyyyiduş-Şuhəda şəhid kardey və Peyğombəri(s) xanedani bə əsorət bardey bədiqə,bo Əhli-Byeti(ə) tərəfdoron qıləy vey bevəcə şərayit bə meydon oməbe.çı imomi(ə) şe-omey iyən qırd fəoliyyəton çı nəzorəti jiyədə be və həyğətədə İmom(ə) xanənışin bıəbe və millət de ə həzrəti qıləy rohətə formədə rabitə bərğərol kardey zıneydə nıbe.bın saxtə devronədə İmom Səccod(ə) de dıvo zıvoni İlahi maarifi bəyji oqteyro cəhdış karde və ə həzrət çı mislış nıbə sıtoyişi ğolibədə  həmməysə barzə tərbiyəvi,dini.irfoni,iştimoyi iyən siyosi məzmunonış bo insoni camiyə bəyonış karde.Şiyə yolə şəxsiyyəton Səhifeye-Səccodiyyə Kərimə-Ğıron iyən Nəhcul-Bəloğə bəpeştə ilahi maarifi və çı həğəton xəzinə həmməysə yolə kitob hisob kardedən və de ın tərtibi bəy”Uxtul-Ğıron” yəni Ğıroni hovə,həmçinin Əhli-Beyti İncil və Ali-Muhəmmədi Zəburi ləğəbonışon noə.....

Muhəmməd Təği Məclisi ıştə umri ziyodə zəmonış bo Səhifeye-Səccodiyyə kitobi mıtoliyə kardero sərfış karde və nəğlışon kardə ki,bəsə Səhifeye-Səccodiyyə sape ziyodə məşğul bıey dəlili xoto,əv musətəcabuddəvə be.yəni əv har qıləy dıvo ki,kardedəbe Xıdovəndi dərqoyədə ğəbul beydəbe.şiyə ım yolə alim həmçinin Səhifeye-Səccodiyyə bə milləti təlim doydəbe və ım erjinə xəzinə bəvonış çok-çoki omuteyış zıne və nəticədə çı İminə Məclisi cəhdon bəpeştə İsfəhoni şəhri har qıləy kədə iqlə cildisə həm veyə  Səhifeye-Səccodiyyə kitob pəydu beydəbe və millət de həmonə erjinə kitobi unsiyyət bastəbe.Məclisi ıştən bın barədə votedə:Xıdovəndi de Səhifeye-Səccodiyyə vositə bəmı inoyət kardə elmon,aşmardey zıneydənim.de İmom Zəmoni(ə) ım hədiyyə bərəkəti vositə Səhifeye-Səccodiyyə bə qırd kəon daxil be və milləti veyni dıvo əhl bin və  de dıvo koy məşğul bin və çəvon veyni həm mıstəcabudd-də`və bin....

Yolə fəğih bıə Mollə Muhəmməd Təği Məclisi Hicri-Ğəməri 1070-ə sori Şəbanə manqi yonzəminə ruji İsfəhoni şəhrədə rehlətış karde və çəy pokə bədəm hejo həmonə şəhrədə dəkandey be.çəy bəfot kardey bo elmiyyə hovzəon məxsusən bo İsfəhoni şəhir dıjdə elmiyyə hovzəon vey qonə zayiə bə hisob omeydəbe.boçi ki,İsfəhoni ıştə həmməysə yolə hədidi ustodon qıləyni çı dastoş doəbe.əmmo çın yolə alimi perosnə şoqirdon çəy roşon dəvom doe və çəy hədisi bəyji kardey və təhzib iyən ıştə nəfsi piyo kardey koyədə cəhd kardə şoqirdon məxsusən Əllomə Məhəmməd Bağır Məclisi idoməş doe və elmiyyə hovzəonədə hədisi elmi barizə şikilədə təcəlliş pəydu karde və veyə rovnəğış pəydu karde….