Mıborəkə Rəməzanə manqədə, Tolışon adət-ənənon(13)

mıborəkə Rəməzanə manqədə, Tolışon adət-ənənon(13)

وَ الْحَمْدُ لِلَّهِ الَّذِي جَعَلَ مِنْ تِلْكَ السُّبُلِ شَهْرَهُ شَهْرَ رَمَضَانَ شَهْرَ الصِّيَامِ وَ شَهْرَ الْإِسْلاَمِ‏

وَ شَهْرَ الطَّهُورِ وَ شَهْرَ التَّمْحِيصِ وَ شَهْرَ الْقِيَامِ الَّذِي أُنْزِلَ فِيهِ الْقُرْآنُ هُدًى لِلنَّاسِ وَ بَيِّنَاتٍ مِنَ الْهُدَى وَ الْفُرْقَانِ‏

Əzizə tolışon səlom, şımə ləzəon mənəvi iyən de Xıdo inoyəti bə ico bıbu.

Rujə moədəmon, Xıdo mehmonəti manqədə şıməro ğəşənqə hol-əhvoli urzo kardəm, Xıdo bə həmmə tolışon ğısmət bıkə ki ın manqi mənəvi erjinə dəğiğəonku istifodə kon.

Imrujnə məxsusə bərnomə ın baxşədə az səidi vıjniyə mətləbi bəşımə təğdim kardəm, dəmə bə ico bımandən.

Xosə həmzıvonon jəqo ki votımone, Qilon ostani millət xususi tolışon miyonədə, Rəməzan mıborəkə manq vey ehtıromin iyən erjinə manq bə hisob omeydə.

Tolışon miyoədə co qıləy adət-ənə ki ın əzizə manqədə vey rəvocin be iyən ısət həm heste, ıme ki ailəon iftoriro ıştə xışavəndon dəvət kardən, tolışon etığadışon be ki Rujə mo har şəv ya vey şəvonədə xışavəndon kəonədə cəm bıbun.

Həmçınin dionədə yolə şəxson qıləy ruji təyin kardedən ta məçitədə, bə rujə əqətə milləti iftori bıdənən, veyni ın ruj de Rəməzanə manqi 15 minnə ruj yani Həzrəte İmom Həsən(ə)-i milad ruji sorəqardışi həmzəman bəbe. Im kollektiv iftoriədə di ya məhəllə sakinon muxtəlifə xorakon vardedən ta bənə ehson iyən nəzri bıbu.

Əmmo əzizə duston, Tolışon ım əzizə manqədə, bə vəyu iyən zımoon vey ehterom nodən, və əvoni dəvət kardən ki iftorə surfəonədə mehmon bıbun. Tolışon etığadışone ki əqə vəyu iyən zımo, iftori surfədə bıbun bə çəvon jimoni xəy iyən bərəkəti, ijən vəyu və zımo xuşbəxtiyəti əlovə bəbe.

Rəməzonə manqədə, iftori hardey bəpeşt, Tolışə xalğ bə məçit bəşen iyən qıləy məhəlliyə ruhaniku dəvət kardedən ki har şəv məçitədə nıtği əncom bıdə. Həminə barədə Tolışon miyono co qılə adət-ənə ıme ki vaxti millət məçitədə iştirok kardedən, həm mırdon vırədə və həm jenon vırədə, 1 nəfər mominə millətiku pul seydə ki bəy “İmomi mol” voteydən. Im cəm bıə pul, Rəməzanə manqədə bıə məçiti xərconədə bənə çay, xımo iyən ruhani məvocibiro istifodə bıdə.

Rəməzanə manqədə, Tolışə mırdon ko kardey saaət vey kam bəbe iyən mırdon səyo cəhd kardən ki ko əvəzi veyni bə ibodət kardey iyən mınocot məşğul bıbun, tolışə mominə jenon həm Ğıron handey mərosimi bərpo kardedən iyən ım manqi rujonədə bə hamsuyə kəonku qıləyni şedən ta həm Ğıroni xətm kardey mokafat bəvon ğısmət bıbu və həm çəvon zəmon iyən vaxt dəvardo.

Əzizə əməson, İnşaəllah vəoməy rujonədə ijən Rəməzanə manqədə bıə Tolışə milləti xususi adəton barədə bə şımə xıdmət məlumat bədamon.

İjən ım əziz və mıburəkə manqədə, Xıdoku şıməro məğfirət və baxşışi tələb kardəm, Xıdo rəhmət, inoyət iyən lutfi sayədə bımandən.