Fıtrə idi məxsusə bərnomə-1

Fıtrə idi məxsusə bərnomə

Əzizon bə şımə xıdmət səlom ərz kardəm, ımruj mısılmonon vey yolə idonku qıləyni, fıtrə ide. Im idi bə şımə xosə Tolışon təbrik ərz kardəm iyən dıvo kardəm Xıdovənde Xalıği dərqohədə şım Rəməzanə manqi ibodəton iyən dıvoon ğəbul bıbu, bə Fıtrə idi mınosibəti xoto, qıləy məxsusə bərnomə bə şımə xıdmət təğdon kardedəm, şımə əzizonku dəvət kardəm de ım bərnomə dəmə bə ico bımandən.

Moehribonə əməson, Fıtrə id, xalısonə dıvoon iyən insoni bəştə nəfsi səbarz bey id bə hisob omeydə. Imruj həmonə ruje ki iştəni oqəte iyən məşğ kardeyku 30 ruji bəpeşt, mominon bə məerefəti nur dast peydo kardən. Isət mominə inson bənə tojə ziklə mandedə ki ıştə vıcudi zəminədə zizəş okarde. Bə Həzrəte Əli(ə)-i nəzə əsos, ım rujədə qıləy firiştə vanq kardə bə şımə bandəon mıjdəvonəti dodəm ki Xıdovənde Xalığ şımə dəvardə qınohonış baxşedə, peşo diyə kənən ki şımə umri baği mandə rujonədə, çoknə rəftor kardedən.

Bəle əzizon, Fıtrə id qıləy umumiyə id bə hisob omeydə. Dınyoədə və hər vırədə ki mısılmonon çəyədə jimon kardedən ım id qiromi ziney bıdə. Çən islami idon miyonədə ım id, xususi erj iyən məğomi soybe. Jəqo ki sori manqon miyonədə, Rəməzanə mıborəkə manq bəştə xusiyəton xoto vey erjin iyən mımtoz be. Fıtrə id, vəhdət, həmdıləti id, dini əzəməti nımoyeş doe id və bə Xıdovəndi nez bey id bə hisob omeydə. İslam dınyoədə, ımruji de sıxəni vəsf karde nibəbe. Çand rujiku bənav, xiyabonon zinət iyən kəon təmiz bin. Kəon və umumi vırəonədə, mehmoni surfəon eğandəşone. Dınyo muxtəlifə şəhronədə və mısılmonon miyonədə həmmə kəson de şinion iyən məhəli xorəkon, bə vindemonəkəyon xəşomə dodən. Im idədə, İronədə həm ğəşənqə adət-ənənoni bərpo bıdə.

Bəle xosə Tolışon, Fıtrə idə rujədə İronədə qıləy şoə mərosim “urzuon mərosim” ğeyd bıə. Rəməzan mıborəkə manqi mıddətədə kali cihodəkə universiti tələbəon de xəyyeron bə ico, de yande ğərol noşone ki Fıtrə id həğiğətən hırdənonro id bıbu.

Məsələn Qıləy hırdən çəy urzu ım be ki qıləy təbleti soyb bıbu ta korona pandemok şəroyetədə dərs bıhando, ya co qılə hırdən ki  çəy niqəroni boştə inə iyən dədə be ki kə soyb nin, ya co qılə hırdən ki çəy dədə bə rəhmət şə və urzuş be ki qıləy velosipedi soyb bıbu ya qıləy hırdən ki urzuş be hiç vaxt çəvon kə bombarın nıbu ta çəy hənək xərob nıbu və co hırdən ki urzuş be qıləy boziçə soyb bıbu ta şəvonədə ıştə dard və mısibətonku bəy bıvoti.

Əmmo ımruj idə rujədə ım hırdənon dıl iyən çəşon vey şo bıə, boçiki bəştə urzuon rəsəşone.

 Xanım Cokar, Im hırdənonku himoyə əkəyonku qıləynie ki nəzəş heste: bə umum şəxson nəzə əks, hırdənon ıştə jimon və ıştə ətrofi hadisəonku aqahin, əmə hətto ım mərosimədə, hırdənonku bənə zumand iyən huşinəti yod kardəmon ta çəvon bəştə nəfsi etımo əlovə bıbu. çən vaxti əmə bəvon hədyə təğdim kardəmon, çəvon nəfsi izzət həm əlovə bıdə. əv ijən votışe: hali hazırədə har sor, urzuon mərosimiro, təğribən 200 qılə urzu bə vırə bərəse.

Bəle xosə həmzıvon, islamədə idi məno ıme. Boçiki Fıtrə id inson deştə Xıdo mənəviyə rabitə bərğəror kardey mənoe, co tərəfiku de co insonon rabitə bərğəror kardey mənoon dodə. Həzrəte İmom Səccad(ə) Fıtrə idi bənə mısılmonon de yande şo bey, ictima iyən komək kardey ruji elanış kardə. ə Həzrət həminə barədə hamiyəşe: "Pərvərdıqara, ım Fıtrə idədə ki ıştı tərəfo bo imon vardə kəson, id iyən şoəti ruj və boştə milləti əholi, ictima iyən komək kardey ruj ğəror doə bəy, əmə bəştı tərəf oqardedəmon."  

Çən Fıtrə idə rujədə, mısılmonon ıştə moli de baxşış iyən infoğ doey vositə, Fələstin, Yəmən iyən Əfğanıstonədə bəştə dardmandə bıvəon iyən hovəon dodən ta çəvon dard iyən mısibəton kam bıbu. Boçiki bə Həzrəte Əli(ə)-i nəzə əsos, İlahi bandəon xusiyəton ıme ki bəştə nəffəsi dard iyən zəhmət dodən, əmmo bə millət oroməti hədyə kardən.

Həlbətə islam bə baxşış iyən hamdıləti vey təkid karde. Jəqo ki Fıtrə idi şəvi əlməlonku qıləyni iyən bə co kəson komək kardey xoto, Fıtrə zəkot doe bə hisob omeydə. Fıtrə idi bənav şəvədə, Mısılmonon Fıtrə zəkot nomo bıə puli bə kəno nodən iyən idə rujədə ım puli bə ehtiyocinə şəxson bədon. Im qıləy İlahiyə adəte ki islami umməti həmmə vırəonədə icra bıdə, və fəğrəti məhv kardey iyən mısılmonon iğtisodi və ictimai muşkilaton həl kardeyro vey erjinə amil bə hisob omeydə.

Zəkot yəni ictimaədə, təbii surəti iğtisodi cəhəto bərobərəti iyən balansi icod kardey. Jəqo ki fəğırəti iyən məhrumiyətiku kam bıbu. Həğiğətədə Fıtrə zəkoti doey, ki de ibodət hədəfi və bə Xıdovənde xalıği nez bey xoto, əncom bəbe, mənəvi ali dərəcə rəseyro, modi çiyonku istifodə kardey mənodəy.

Fıtrə zəkotiku karde bəbe, mısılmonon mədəniyət, mıolicə iyən səhiyyəvi vəziyəti çok kardey, iyən ğarzxoon ğarzi doey, məçiton, məktəbxonəon, pardon, rabitə roon və noxəşxonəon duteyro istifodə bıbu. Həğiğətədə bə Rəməzanə manqi varid bey vey muhimmə nəticəonku qıləyni, islami ictimaədə fəğırəti iyən məhrumiyəti məhv kardey. Boçiki beçizəti, harcurnə əxloği iyən ictimai tənəzzul bə hisob omeydə. İmom Əli(ə) ıştə sıxənonədə bəştə hırdənonku qıləyni hamiyəşe: " ey çıme hırdən, fəğırətiku tarsedəm, boçiki fəğırəti, insoni dini noğis, çəy əğli iyən fiki niqəron kardedə. Fəğırəti milləti bə fəğırə odəmi iyən bə co kəson bədbin kardedə."

Bəle əzizon, Fıtrə idə ruj, qıləy roy binoe. Im royədə əqə inson bəştə rəftor iyən əməl mığət bıbu, səlomət bə məğsəd rəsedə. Fıtrə id, hidoyət iyən poki royədə stabil bey, de Xıdovənde xalıği əhd bastey mənodəy. Peşo ım idə rujədə har kəs har çəxtə məerefət ki kasb ko , həmonə miğdor bə ilahi dərqoh roş heste.

Millət idə rujədə bə yeqanə Xıdo xalısonə ibodət kardey ğədrdonəti kardeyro iyən bə İlahi surfəon kəno nıştey xoto, şıkə nımoji voteydə iyən de təşəkkur və ğədrdonəti vanqi, dınyo de eşğ iyən mənəviyətipur kardedən.

Əzizə əməson bə ım bərnomə quş doe xoto, şıməku təşəkkur kardəm, dəvət kardəm bə co bərnoməon diğğət kənən ki koy həmroon bə şımə xıdmət təğdim bəkan.