Osmoniyə surəon-94

Osmoniyə surəon-94

Peyğombər(s)  və mısılmınon bə Mədinə hicrət kardeyədə,Ənsar deştə ağuşi əvonışon ğəbul kardeşone.əmmo ərəbon əksəriyyət de əvon mıborizə bardero bəsə po əyştin.bə mısılmınon ələyh hoziyəti iyən deəvon mıxolifət jıqo be ki,əvon noçor mandin ki,ıştə silohon ıştəku bə diyəro nıkon və hejo deştə bəico bışkırnon.əvon bəşəvnəy həm de əslihə və silohon hıtedəbin,bəruj de silohi oğo bedəbin və dayima de silohi nəvedəbin.ın holət bo mısılmınon vey saxt iyən tov vardənin nıbe.çəvonku idastə oşkoə holətədə izhor kardeşone ki,de tobə keynə ım vəzyət dəvom pəydu bəkarde?aya qıləy zəmon bərəse ki,əmə asudə,rohətədə formədə iyən de xatırcəməti bəhıtemon iyən istirohət bəkardemon? Bın holədə Nuri mıborəkə surə 55-ə ayə bə peyğombəri(s) noizl be və bəvon bəşorətış doe ki,bəle jıqo qıləy zəmon bome bərəse.joqo ki, hamyedə: Xıdovənd bə şıməku imon vardə kəson iyən ləyoğətinə koon əncom doə kəson və`dəş doə ki, hukmən əvoni bənə çəvon bənav bıə kəson zəmini dimisə canişin ğərol bıdo.55

Xıdovənde-Aləm bə ləyoğətinə əməl əncom doə muminon və`dəş doə ki,solim iyən ədolətinə nizom bın dınyoədə bərğərol bəkarde və camiyə çı zılm iyən noəmnətiku pebəroxne və dınyoədə aşişəti iyən əmniyyət bərpo bəkarde.qıləy və`də ki,çımi bənav həm bo salehə umməton real bıə.çən,ısət har qıləy millət imon iyən salehə əməli soyb bıbu,Xıdovənde-Aləm bəştə və`də əməl bəkarde və bəvon hukumət iyən ğudrət baxş bəkarde.həlbəttə,Kərimə-Ğıronədə çandə kərə bə dınyoədə çı salehə şəxson oxonə hukuməti de ojə-oşkoə holəti işorə bıə.bə ın ayəon əsos,vəomədə dınyo çı muminon səbarzəti iyən kofiron məğlubiyyəti şoyd bəbeyn.

Bə rəvoyəton əsos çın ayə komilə misdoğ iyən nımunə həzrəte Məhdi(əc) –e ki,deştə zuhuir iyən qlobal hukuməti dınyo qırd vırədə həx iyən ədoləti bərpo bəkarde.

İslomi-Peyğombər(s) hamyedə:”ehanə jimonədə hərbaxtəti və marqədə şəhodət tələbkon,əgər həsrəti ruji nicot və məhşəri qamə ruji  qıləy soğnə vırə bıpyone,və ehanə ğıyoməti ruji sərqərdonətiyədə hidoyət tələbko,Kərimə-Ğıroni omutənən.zira əv çı Xıdo kəlome və şəytoniku əmonədə obəqəte və mizonədə bəpe bıey boyis bəbe”.

Isət əmə de Kərimə-Ğıroni coqləyni surə yəni de Furğani mıborəkə surə oşno bəbemon. Furğani mıborəkə surə çı Kərimə-Ğıroni vistı pencminə surəy və Məkki surəonkuye.çın surə 77 qılə ayəş heste.Furğan çı Kərimə-Ğıroni nomonku qıləyniye ki,çəy nom çın surə iminə ayəku peqətə bıə və çəy məno həm həxı çı botoliku coəkəy.

Firğani mıborəkə surədə bəhs bıə mevzuon mıxtəlifə baxşonış heste.çın surə sıftədə çı mışrikon sıst iyən beəsosə məntığ və çəvon bəhonə vardeyku bəhs kardedə və çəvon cəvobi doydə. ğıyoməti ruji milləti həsrət,Xıdovəndi təbyətədə bıə tohid iyən əzəməti nışonəon və muminon de kofiron mevzuonkuye ki,bın surədə bəvon işorə bıə.əmmo çın surə vey muhimmə baxş ə ayəonin ki,çı “İbadurrhəmani”-yəni Xıdo rostə bandəon xısusiyyəton həxədə sıxan votedə.

 (Kofiron)voteşone:ım çı peyğombəre ki,xorək hardedə iyən vıjorədə ro poyedə.boçi bəy qıləy firiştə nozil bıəni ta deəy bə ico tars bıdəy(ya çəy iddo təsdığkəy).ya (boçi)bəy qıləy xəzinə nozil bıəni ya çıro çəy qıləy boğış  ni ta çəy(məhsulon)bəhəy.və sıtəmkoron(bə muminon)voteşone:şımə fəğət bə qıləy sehrin (əfsun bıə)merdi itoət kardedən.odyəs botı çokonə misolon jeydən.çən,(əvon) ro dəqıjniyəşone.nəticədə əvon qıləy ro pəydu kardey nibəzıneyn.7-8