İnğılobi dıminə ğədəm-8
İnğılobi dıminə ğədəm-8
İron İslom Respublikə nizomi de iftixori pur bıə jimoniku çıl sor dəvardey iyən çın nizomi bə qıləy nuyə mərhələ daxil bıey astanədə, İron İslom İnğılobi Yolə Rəhbər həzrət Ayətulla Xameneyi de “İnğlobi dıminə ğədəm” nomi muhimmə bəyoniyyəş təğdımış karde.çın bərnomə dəvardə şəş qılə ğısmətədə bə ın mətni nisbətən icmoli qıləy nəzə kardemone və çə həzrəti çı inğılobi dəvardə iyən omə rujon barədə bıə nəzə bəyon kardemone.əmmo,çımi bədiqə inğılobi dıminə ğədəm bəçəy əhəmiyyətin, həssosəti iyən təsirinə cəhəti xoto,de dığğəti iyən ziyodə izohi təhğığ kardey bıbu.
İnğlobi dıminə ğədəmi bəyoniyyə bəçəy xoto əhəmiyyət kəsb kardedə ki,İron İslom Respublikə qətə ruşinə ro bə islomi mədəniyyəti icod kardey iyən oxoyədə koon bə bəşəriyyəti munci iyən nicotədə həzrəti Məhdi(ə) aspardeyədə təyin bedə.bın bəyoniyyədə bo ın barzə ideya çokonə real kardey təbyin kardero,bə inğılobi çıl sornə de etat-petati pur bıə roy işorə bedə ki,çokonə de qırd ım saxtəti iyən məşəğğəton bə ico,de Xıdo lutf iyən himoyə və de milləti iştiroki İron İslom Respublikə nizomi nuyə toğəş bə qıləy ğoymə doş təbdil kardə.inğılobi Yolə Rəhbər de islomi inğılobi xısusiyyəton təbyin karde,icmoli boho ğeymətinə noiliyyəton bə cıvonə nəsli rosneydə və əvoni İron İslom Respublikə nizomi roy əslə dəvom doə kəson hisob kardedə və bın zəminədə erjinə tovsiyəonış doşe.
Çoko ki,işorə kardemone İslom İnğılobi Yolə Rəhbər həzrət Ayətulla Xameneyi bəyoniyyə mevzu,İslom İnğılobi dəvəşə dəvardəyon və omə rujon inkişofi roy tərsim kardeye.əmmo,harçi bənav bəpe bızınəmon ki,İnğılob çiye və peşo islomi inğılobi xısusiyyəton və çəy de coqlə inğlobon miyono bıə farği təhğığkəmon.
İnğılob luğətədə vəzyəti əvəz bıey iyən təhəvvuli mənodəy.mıxtəlifə inğılobon mevcud bıən ki,de milləton cəhdi kişvəron siyosi strukturon əvəz bedən.bə ın tərifi əsos,bə ziyodə etırozinə hərəkət iyən isyonon inğılob votey nibəbe.çıro ki,əvon adətən məhdud ,səthi,bebərnomə iyən behədəfin və kali qıləyni həm de kudeta ya peqordımoni vositə kali kamə dastəon silohinə ğıyomi ğudrəti bə dast vardedən.həlbəttə,inğılobon zəminə və amilon miyono muhimmə çiyon həm heste.qıləy inğılob bə zəmon bedə ki,millət ıştə hukumətonku norozi iyən çəvon fəsodiku norohət bıə holədə ğıyom kardedən.əmmo,mevcud bıə vəzyətiku norozi bıey həm kifoyət kardedəni,bəlkəm əvon bəpe ıştə zehnonədə barzə hədəfonışon bıbu ki,inğılobi bə qıləy bə xoş omə vəzyəti səmt hidyətkon.qıləy inğılobi bə əməl omeyədə coqləyni şərt bo fədokorəti,ıştə coniku dəvardey,inğılobi ruhiyyədə bıey və bəştə etımod kardey şərtone.oxoyədə həm lozıme ya zumand,tədbirin,aqah və milləti ğəbul kardə şəxsiyyət ya qıləy təşkilot mevcud bıbu ta inğlobi ğıvvon vohidə şikilədə təşkil bıbon və inğılobi bə səbarzəti bırısnon.bə ğələbə iyən səbarzəti nırəsə inğılobon iqlə ya çandə qılə jıqo səbarzəti amilonku bəhrəşon bardey zınəni.
Kamə inğılobon bənə İron İslom İnğılobi bıəey bəzıne ki,de qırd ın amilon bə ico,həmmə tərəfin iyən de zumandəti bə əməl booy.İroni millət fosidə Pəhləvi rejimi siysəton iyən ixtisodi,sosyal,mədəni iyən hərbi hərəkətonku de şiddəti norozi bin və bəştə islomi fərhənq iyən bə İmom Xomeyni(r) ruşinə bəyonaton əsos,islomi hukuməti bərpo kardey tələbışon karde.
