Dəhvul-Ərz
Dəhvul-Ərz
Dəhvul-Ərz Zilğə`də manqi 25-ə ruj Dəhvul-Ərz ya zəmini hevujəti ruje.qıləy ruj ki,Xıdovəndi de bə zəmini kurə nəzə kardey bə xok və tulə dınyo qıləy jimonış baxş karde.dəhv hevujəti mənoədəy.Dəhvul-Ərz ya zəmini hevuj bıeyku murad və məğsəd,ıme ki,xılğəti sıftədə zəmini səth qırd de voşiku voyə ov və seyli pur be.ın ovon tədricən bə zəmini nığılə vıron səmt şiin və hışki rujbəruj ziyod be ta zəmini ısətnə vəzyət və şərayit bə vucud ome və çəy sıftənə bə çəş çiyə vırə həm Kəbəy. Peyğombəre-Əkrəm(s) hamyedə:”innə ...həyğətən,şımə jimoni dırozi şımə pərvərdıqori tərəfiku nəsimon qıniye.aqah bıbən!ıştə çəvon mə`rəzədə ğərol bıdən,ğasbu ki,jıqo nəsim səbəb bıbu ki, bədbəxti dayimi şıməku bə diyəro bımando”. Zilğə`də manqi 25-ə ruj de Dəhvul-Ərz ya zəmini hevujəti ruji məşhure ki,çın nəsimon qıniyə rujonkuye.qıləy nəsim ki,sori fəğət ikərə bə ıştə con iyən dıli çəy mə`rəzədə ğərol doə kəson səmt qıniyedə və bəvon qıləy nığılə şoyvonəti iyən oroməti baxş kardedə.. Bə rəvoyəton əsos Xıdovənde-Aləm zəminış Zilğə`də manqi 25-ə ruji çı Kəbə ısətnə zəminədə hevujış karde və əvrəş bo insonon çı oroməti iyən sakin bıey vırə və məhəllış ğərol doe.Xıdovənde-Aləm Kərimə-Ğıroni kali ayəonədə bə ın məsələ işorəş kardə.çoko ki,Naziati mıborkə surə 30-ə şərifə ayədə hamyuedə:”Vələrzu...Zəminış peşo hevuj kardeşe”. Kərimə-Ğıroni mıfəssir və təfsirəvonon veyni,ayədə bıə “Dəhaha” bə devrəon bino bıey ya ruji işorə kardey zıneydən ki,zəmin de Həx-Təala nəzə çı asayiş iyən oroməti vırə ğərol qətışe.bəvədə ruon cari be və şuləon bə əməl ome və pərəndəon barzə şoxəonədə de Xıdovəndi-Mutəali təsbih iyən təmcidi ko məşğul bin.zəminisə bıə əzəmətinə bandon bənə mıx və mısmori bəy kuyə be ki,zəmin bo insoni bənə qıləy qofo bəy oroməti və asayiş doydə.liza,bə ın ruji ehtırom noey və əy əziz qətey,bə Xıdovəndi benəhoyətə neməton ehtırom noey iyən yol qətey mənoədəy. Həlbəttə,bın torıxədə co hodisəon həm bə əməl omə ki,çəy əhəmiyyətış islomi torıxədə dı bərobərış kardə.min cumlə həzrəte İbreym(ə)-i milod,həzrəte İsa(ə)-i milod və həzrəte Rəsule-Əkrəmi(s)-i de “Həccətul-Vida” ğəsdi çı Mədinəku bə Məkkə səmt xaric bıey ki,bın səfədə İmom Əli(ə),həzrəte Zəhro(s) və həmçinin çı peyğombər(s)-i jimoni həmroon həmmə və qırd əshob həm deəvon bə ico be.. De qırd ım hodisəon bə ico,həmməysə bənav Zilğə`də manqi 25-ə ruj de Dəhvul-Ərz ya de zəmini hevuj bıey ruji məşhure.Əmirəl-Muminin İmom Əli(ə)-iku rəvoyət bıə ki,hamyedə:”osmoniku bə zəmini nozil iminə rəhmət,Zilğə`də manqi 25-ə ruji be.hakəs bın ruji rujə bıqəto və bəşəvnəy ibodətko,çəy rujon rujə və şəvonış ibodət bıə sa sori ibodətış bə vırə rosnə.har qıləy dastə ki,bın ruji boştə yolə pərvərdıqori zikri cəm bıbu,volo-volo nibəbe illa ki,çəvon tələbon doey bəbe”.binobərin Dəhvul-Ərzi ruj bo zəmini vey mıborəkə ruje ki,çəy vəş qətə və ğeyzinə çehrə bə rəhməti formə dəşə və bo ov,rəsəy iyən insoni bə əməl omey hozzı bıə.çən,bın mığədddəsə ruji ki,ilahi nəfəhat və nəfəsi qıniyə ruje və həmçinin bo bandəon qınon əfvi mıjdəvoniş bə ərməğon vardə,səlom votedəmon.səlom bıbu bə Dəhvul-Ərzi,qıləy ruj ki,osmono-zəmin bo odəmi ıştə vanqo oj kardedə və ıştə neməton bəçəy səmt rəvonə kardedə.səlom bıbu bə Dəhvul-Ərzi,qıləy ruj ki,sıftənə kərə Xıdovəndi ıştə nemətonış nozil karde ta odəmi avlod çəy məhəbbəti dərəso.səlom bıbu bə Dəhvul-Ərzi,qıləy ruj ki,eşğ pəydu be və bə qırd aləmi otəşış je ta əmə ıştə dusti qim kardə kəson dumo eşği bınəvəmon,bəlkəm qıləy faniyə dınyoədə orom bıdəmon və bə cokəson oroməti həm boyis bıbəmon.səlom bıbu bə Dəhvul-Ərzi,qıləy ruj ki,Xıdovəndi əvış ofəyə ta bə bəhonəon co qıləy bəhonə əlovəko,bəlkəm odəmi zoə çı dınyo zindon iyən şərriku ozodko...
