İlahi rəhbəron-3
İlahi rəhbəron-3
Cohiliyyət,har qıləy cəhəto çı ərəbi jimonədə mevcud be.bə əşarfiyyət və aristokratizmi meyl ziyod be və çə ğəbiləon miyono ğarətgərəti,ğəsovət.irği və ğəbiləvi təəssıbon ,maddipərəstəti və bıtpərəstəti çı cohiliyyəti umdə məzhər və simvolonku bə hisob omeydəbe.çəvon mənəvi və əxloği bovəon nodırıst və norəvo be.qıləy zılm ki,ərəbi kali ğəbiləon ıştə kinon həxədə rəvo vindəşon be,çı cohiliyyə ərəbi yavə əməlon bəyon kardey bə hisob vardey bəbe.
Xıdovənde-Aləm Kərimə-Ğıronədə bəyon kardedə ki,ehanə bə zəmonədə qıləy merdi jeni kinə fərzəndış bə dınyo vardəşbe,çəy çehrə de şiddəti norohət və siyo bedəbe və əv vey ğeyzin bedəbe.(Nəhl-58-Zuxruf-17).bəçəy xoto zıneydə nıbin ki,aya həmonə kinon de arəti ğəbulkon ya bəyjo-bəyji bə qur dənon(Nəhl-59).binobərin,çun kinon ğəbul nıkardey xoto,əve ıştə kinon bəyji-bəyji qurədə dəkandeəbin.
Ayətullah Xameneyi İslomi-Peyğombər(s)-i besəti bənav cohiliyyə devroni insoni camiyə tovsifi barədə jıqo hamyedə:”i tərəfo bə camiyədə pevolo bıə nəfsoni şəhvəton,cinsi şəhvəton və çəy mislədə bıə çiyon və co tərəfo həm bəştə şəhvəton tabe bıə,dılonış ğəsovət bıə və xunrukardə insonon hestinbin ki,de tosə marzi həddi ki,ımi təsəvvır kardey mumkin ni,bənav şeydəbin.yəni ıştə hırdənon həm kışteydəbin...
Həmonə şəvi Amənə qıləy əcibə hissış hestebe.çəy jimoni həmro Əbdullah maqiku çandə manq dəvardəbe və əv rujon iyən şəvon deştə jimoni həmro çı dasto doey ğəmi dəvordıneydəbe.ısət çəy fərzəndi təvəlludi zəmon omə rəsəbe.bə ləzə və anonədə deştə voteşe ey kaş Əbdullah bəyji bıəbe və əvış coyli haştəş nıəbe.bın zəmon de Xıdovəndi lutfi Amənə kə ruşin iyən nuroni be.əv bəştə vində çiyon bovə kardedə nıbe.əv hissış karde ki,osmoni astovəon bəçəy kə nozil beydən.hələ çəy təəəccıb nıştənıbe ki,nuroniyə jenon çəy yonqu palu nıştin.çəy kə bə nuri ğərğ bıəbe.çə jenonku qıləyni voteşe: mı,Asiyəm, fironi jimoni həmro.və coqləyni həm ıştənış de İmrani kinə Məryəmi nomi təğdımış karde.çandə ləzə bədiqə əv qıləy zoə fərzəndış bə dınyo varde ki,bəçəy vucudi dəvəşey xoto aləmi ufuğ ruşin be.bın holədə Amənə qıləy nidoş məse ki,votedəbe:ha Amənə ha!ıştı fərzəndi vucudədə çı ənbiya və peyğombəron xısləton noey bıə.əv bənə Nuh(ə)-i şucoətin,bənə İbreym(ə)-i ixlos və təvəkkulış heste, bənə Yusif(ə)-i simaş heste,bənə Saleh(ə)-i fəsohətine,bənə Mosə(ə)-i istiğomətin iyən zohdış heste və bənə İsa(ə) baxşeşı heste.....
Muhəmməd(s) Əbdullah zoə və əv həm Əbdul-Mutəllıbi zoəy.çə həzrəti inə Amənə həm çı Vəhəbi kinəy. Muhəmməd(s) rəbiyul-əvvəli havdəminə ruji Fili sori (milodi 570) yəni Əbrəhə bə Məkkə həmlə kardə və həmonə vırə viron kardey fikədə bıə sori,joqo ki,Xıdovəndi Fili surədə ın hodisə barədə hamyəşe,bə dınyo ome.de Xıdo-Rəsuli(s) təvəlludi bə ico buməlarzə bə əməl ome ki,çəy təsiron bə dınyo həmmə noxtəon rəse.joqo ki,kilsəon,sovmiyyəon və bıtpərəston pərəstış kardə bıton viron be və çı coduqəron iyən kahinon koon bəyənde qıniye.osmonədə astovəon bə əməl ome ki,çə zəmoni bənav bəçəş çiyə nıbe və İronədə Kəsra eyvon bə larzə ome və çəy senzə ya çordə qılə sutun rıjiye və farsi otəşkədə otəş hamuş be.ım qıləy holədəy ki,çandə həzo sorbe əv okuşiyə nıbe....
