Ilahi Rəhbəron-105

Ilahi Rəhbəron-105

İmom Huseyni(ə) həmonə de bərəkəti pur bıə təvəlludi sıftənə ya havdəminə ruji,İlahi vəhyi vardə Cəbrəyil-Əmin nozil be və voteşe:Xıdo səlom bıbu bətı ha İlahi peyğombr ha!çın nuyəzandə hırdəni nomi de həzrəte Mosə(ə) canişin Haruni qədə zoə Şubeyri nomi ərəbi Huseyn bınə.çunki,Əli(ə) botı bənə Haruni bo Mosə ibn İmrani (ə) bıə nisbtədəy.de ın tafuti ki,tı çı peyğombəron xatəm və oxonə qıləyniş və ıştı bədiqə Xıdo tərəfiku həni co qıləy peyğombər nibome və risoləti məbus nibəbe.demiyən  Huseyni əzəmətinə nom Xıdovəndi tərəfiku bo ismət iyən təhorəti xanedani dıminə fərzəndi noey be.Nəsəbşunos və geneloji elmon alim nıvıştedə:jıqo bızın Əzzə və Cəllə Xıdo ım dıqlə Həsən iyən Huseyn nomonış milləti nəzəku məxfiş oqətəbe  və tayinki,bə həzrəte Fatmə(ə) dıqlə fərzəndi ım nomonış noe.boçi ki,ğədimul-əyyamiku hiç kəsi de tosə ə zəmoni ım dıqlə nom boştə hırdənon noəşon nıbe və jıqo nomon məlum nıbin.....

Xıdovənde-Mutəal boçımi xoto ki,çı Xıdo-Rəsuli(s) Əhli-Beyti(ə) vırə və məğami ki,de İmom  Huseyni(ə) nomi əvon tiki həm dəvəşin,məlum kardero,de bənə  Əhzabi surə(33) Tətrhir,Ali-İmrani surə 61-Mubahilə,Nisa 59-ə ayədə Ulul-Əmri ayəon və həmçinin de İnsoni məborəkə surəon enovney bə ə həzrəton barzə məğamon şoydətiş kardə.həmçinin Xıdovənd əmr kardedə ki,çımı tərəfiku bə milləti vuji:mı ıştə risoləti mığobilədə şıməku ğərəz bəştə nezə odəmon(əhli-beyti) məhəbbətiku co hiççim piyedəmni.ım çı Xıdovəndi bə ismət iyən pokəti xıyzoni bıə məxsusə inoyəti nışon doydə ki,ijən çı İmom Huseyni(ə) sima bəvədə cilvə pəydu kardə və həyğətədə bə Əhli-Beyti(ə) məhəbbət və məvəddəti mənbə de İlahi sərostə fərmon vositə bə əməl ome......

Səlmon Farsi votedə:bə peyğombəri(s) palu şim.Həsən iyən Husyen xorək hardedəbin.peyğombər(s) ikərə xorəki bə Həsəni və ikərə həm bə Huseyni qəv loğmə və cılmə dənoydəbe.çoko ki,xorək hardey bə oxo rəse,Xıdo-Rəsuli(s) Həsənış bəştə duş qəteşe və Huseynış həm bəsə ıştə zonosəş noe.çən,peşo hamyeşe:”ha Səlmon ha!hakəs ımoni bıpyo,jıqo bızın mınış piyə.və hakəs mınış bıpyo,Xıdoş piyə”.peşo ıştə dastış bəsə Huseyni duşisəş noe və hamyeşe:”əv imom iyən çı imomi zoəy.çəy nəsliku 9 qılə çok, əmin iyən məsumə imomon hestein ki,çəvon nəvminə qıləyni Ğaime(yəni Ğıyoməkə)”.bın cəhətədə Kərimə-Ğıroni yolə mıfəssır İbn Əbbosiku nəğl bıə ki,peyğombəri(s) hamyəşe:”Əli çımı vəsiyy iyən canişine,çəy jimoni həmro çımı kinə Fatmə(s) çı dınyo jenon sərvəre və çımı zoon Həsən iyən Huseyn çı vəhışti cıvonon əğən.hakəs əvoni bıpyo,mınış piyə və hakəs əvoni deşmın bızıno,mınış deşmın qətə və hakəs çəvon mığobilədə ğıyomko və(deşmınətiko) çımı mığobilədə mandə və hakəs bəvon cəfo iyən sıtəmko,bəmış sıtəm kardə və hakəs bəvon çokiko bəmı çokətiş kardə.Xıdovənd deəvon rabitə bərpo kardə kəson rabitə bəbaste və çəvonku co bıə kəsonku Xıdovənd ıştə irtiboti ğət bəkarde və hakəs bəvon koməkko əv həm bəvon komək və əvoni coyli haştəkəsi əv həm coyli bıhaşto”......

Xıdo-Rəsuli(s) ğasbu həmməysə rəsə və reçinə sıxan ım bıə ki,hamyəşe:”Huseyn mıku və az həm çəykum”. çım sıxani məfhum nəsəbi və geneloji rabitəku əlovə,Xıdo-Rəsuli(s) qırd etığodi, mənəvi, əxloği, ideoloji iyən əməli cəhəto de Huseyni(ə) bıə əsosinə rabitə bəyon kardedə.ın məno isbotədə bə İmom Huseyni(ə) ın bəyoni istinod kardey bəbe ki,qıləy zəmon ki,ə həzrət ıştə ğıyomi fəlsəfə həxədə jıqo hamyeşe:”...mı bın zəminədə bəştə cədd Xıdo-Rəsuli(s) iyən ıştə pı Əli(ə)şıə siyrə və şivə tabe bəbem”.və ya qıləy zəmon ki,İmom Husyeni(ə) bəsə dıqlə roy səpe yəni de yəzidi beyət kardey ya şəhid bıey rosyə ğərolış qəte,hamyeşe:”Xıdo,çəy peyğombər,rostə muminon iyən çımı perəsə pokə vıron,boəvon bə xoş nıomə çiye ki,mı zılləti ğəbulkom”.binobərin İmom Huseyni(ə) qırd jimoni zəmonədə çəy ulqu və usvə İslomi əzizə peyğombər(s) bıə.ğasbu bəçəy xoto votey bıə:islomi bina de Xıdo-Rəsuli(s) dasti təsis bıə və de İmom Huseyni(ə) ğıyom iyən şəhodəti əv əbədi mande”....