Ilahi Rəhbəron-109

Ilahi Rəhbəron-109

İmom Huseyni(ə) çı muaviyə zəmonədə jimoni barədə bə ın vırə rəsimon ki,ə həzrət hiçvaxti çəy zılm iyən sıtəmon mığobilədə sukutış nıkarde və bitafutin nıbe.min cumlə Hicri-Ğəməri 58-ə sori yəni çı muaviyə çın dınyoku şıey 2 sor bənav İmom Huseyni(ə)  Həcci mərosimi zəmonədə və Mina sərzəminədə ğəhrəmon və etırozinə xutbəonədə ruşinə bəyonon ımi təsdığ kardedə.çın xutbə əhəmiyyət ıme ki,ım xutbə çı Ənsariku bıə hafto qıləy şəxsi,çı tabeyinonku dı sa nəfər və çı Bəni-Haşımiku se sa nəfəri huzurdədə votey be.qıləy zəmon ki,ım həzo nəfərinə millət çı qıləy soğnə jiyədə cəm bin,İmom Huseyni(ə) çı həmdo-səno bədiqə sıftədə bə muaviyə siyosəton plani işorə kardə holədə hamyedə: ”əmmo bəəd.ım tuğyongərə şəxs deəmə iyən deçəmə şiəyon qıləy rəftorış kardə ki,şımə həmmə vindəyone və bəy şoydiyon.az həm ısət şıməku dəparseydəm,ehanə az rostım votə şımə ımi təsdığkənən və əgər dum votə təkzibkənən”.peşo ə həzrəti hamyeşe:”şımə bə Xıdo şımə gərdənədə bıə həxı ğəssəm doydəm,bə Xıdo-Rəsuli(s) həxı və çımı deşmə peyğombəri bıə nezəti xoto,şıməku tələb kardedəm ki,çımı ımrujnə sıxanon punhon və məxfi oməqətənən və çımı votə sıxanon bo cokəson bəyonkənən”…..

Peşo İmom Huseyni(ə) bə Xıdo-Rəsuli(s) Əhli-Beyti(ə) fəziləton işorə kardə holədə hamyeşe:”şıməni bə Xıdo ğəssəm doydəm aya şımə zıneydon ki,peyğombər ıştə əshobi miyono uxuvvət və bıvətiş icod karde, Əliyyibni Əbi Tolıb(ə) çı peyğombəri(s) bıvə be və hamyeşe:”tı çımı bıvəş və mı ıştə boəm dınyo iyən axırətədə”.həmməkəsi voteşone:bəle,bə Xıdo ğəssəm jıləvoniye.ijən hamyeşe:”şıməni bə Xıdo ğəssəm doydəm aya peyğombər(s) qırd vıronədə ki,bə məçiti səmt oj beydəbe nıbasteşe və fəğət çımı pı Əli(ə) kəybəş oj nıhaşte və peşo ki,cokəson etıroz kardə zəmonədə Xıdo-Rəsuli(s) bəvon hamyeşe: Xıdovəndi bəmı fərmonış doə ki,şımə kəon bəon bıbastom və fəğət Əli(ə) kəy bə oj bıhaştom”. həmməkəsi voteşone: bə Xıdo ğəssəm jıləvoniye…..

Şəhidon əğə və sərvər Huseyn ibn Əli(ə) ıştə sıxanon co baxşədə hamyedə:”şıməni bə Xıdo ğəssəm doydəm bəqəm peyğombər(s) Əli(ə) Ğədiri-Xumi ruji bə imomət iyən viloyəti məğami nəsbış nıkarde və çəy xilofətış de barzə vanqi bə milləti nırosneşe və nıhamyeşe:hozzı bıə kəson bə ğayibon ım xəbə bırosnon?həmmə kəson voteşone:bəle bə Xıdo ğəssəm əmə bımi şoydəti kardedəmon.İmom Huseyni(ə) ijən bəştə sıxanon dəvom doə holədə hamyedə:”aya peyğombər(s) Təbuki canqədə nıhamyeşe:ha Əli ha! Tı bomı bənə Haruni(ə) bə Mosə(ə) məğami nisbətədəş və çımı bəpeştə tı çı har qıləy mumini yol və rəhbəriş?aya Xıdo-Rəsuli(s)  Xeybəri canqədə pərçəmış bə Əli(ə) nıaspardeşe.qıləy holədə ki,çəy iruj bənav hamyeşe ki,maşki pərçəmi bə ikəsi bədom ki,Xıdo iyən çəy Rəsul əvış piyedə  və əv həm Xıdo iyən çəy rəsulış piyedə.əv dumo yənde həmlə bəkarde və çəy luğətədə canqi meydonədə fərol kardey ni və Xıdovənd nufuz ğəbul nıkardə ğalə deçəy dasti fəth bəkarde?aya çın mevzuku xəbəon ni ki,Rəsuli-Əkrəm(s) Bəroət(Tobə) de Əli(ə) vositə bo Məkkə mışrikon vığandeşe?qıləy holədə ki,hamyeşe:ikəs ğərəz çımı tərəfiku ya çımıku bıə kəsi tərəfiku,hiçki ımi bə milləti rosney nibəzıne?......

Qırd ım vıronədə həmməkəson etırof kardeşone ki,bə Xıdo ğəssəm jıqoye ki,şımə hamyedon.ə həzrəti oxoyədə həzrət Əli(ə) fəziləton coqlə baxşon nəğl kardey bəpeştə hamyeşe:”aya etırof kardedon ki,Xıdo-Rəsuli(s)  ıştə oxonə xutbədə hamyeşone:”mı şımə miyono dıqlə boho ğeymətinə çi baği noydəm,Xıdo kitob iyən çımı Əhli-Beyt(ə).ehanə bə ım dıqlə çanq bıjəniyon,hiçvaxti bə zəlolət niebəqıniyon. həmməkəsi bə ico voteşone ki,bə Xıdo ğəssəm jıqoye ki,şımə hamyedon.peşo ə həzrəti əvonış ğəssəm doe ki,Peyğombəre-Əkrəmiku(s) məsəşon ni ki,hamyəşe:”hakəs qımon kardedə ki,mış piyedə,qıləy holədə ki, Əli(ə) deşmın bızıno,du votedə.mumkin ni ki.de Əli(ə) deşmın bıbuş,mıni bıpiyo,(əmmo) mınış piyedə. qıləy şəxsi bə ə həzrəti voteşe:ha Xıdo-Rəsul ha! Boçi beydəni?ə həzrəti hamyeşe:zira Əli(ə) mıku iyən mı həm çı Əlikum.hakəs Əliş bıpyo və mış piyə və hakəs mış bıpyo,Xıdoş piyə vıə hakəs de Əli(ə) deşmınətiko,demı deşmınətiş kardə və hakəs demı deşmınətiko,çı Xıdo deşmıne”.əvon həmmə oxonə dəfə voteşone ki,bə Xıdo ğəssəm ki,məsəmone.