Tibbə Dodon,İlahi rəhməti firiştəon

Tibbə Dodon,İlahi rəhməti firiştəon

Xıdo firiştə və mələkonku kali qıləyni de insoni surəti zəmini dimisən.əvon sipiyə olət bə tan kardedən və çı noxəşon səy sape de dıləsutəti bəvon xıdmət kardedən.zəmini dimisə bıə firiştəon nom tibbə dodo və ya bə noxəşon xıdmət kardə sipiyə olt bə tan kardə kəsonin.de həzrəte Zeynəbi(s) vilodəti ruji mınosibəti  Cəmadiyul-Əvvələ manqi 5-ə ruji həmonə barzə məğami soyb bıə banu deştə mislış nıbə utufət və mehribonəti bə yətimə hırdənon iyən bə həzrəti Səccodi(ə) həmonə əsorəti məşəğğətinə rujonədə bıə yolə ğəhrəmonəti iyən xıdməton xoto,ım ruj ironi kişvərədə de Tibbə dodon ruji ğeyd kardey beydə. həzrət ayətullah Xameneyi bın de bərəkəti pur bıə rujədə de həzrət Zeynəbi(s) nom və yodi ğeyd kardey,çı həmməkəson dığəəti bə ım mehribon iyən bəştə koy aşığ bıə Tibbə dodo muhimmə koy dığğət kardey tələb kardedə.ımsor həm İnğılobi Yolə rəhbər de televiziyə bəyjiyə bərnomə de ım ruji təbrik votey.Tibbə dodonış rəhməti firiştə və mələkonış zıne və hamyeşe:ım qıləy həyğiyə təbire,de hiç vəchi mıboliğəamiz ni......

Həzrət ayətullah Xameneyi dəvardə soronədə həm çşandə kərə tibbə dodonış İlahi mələk və firiştə elon kardəbe və ıştə xısusi ğəlbi irodət və məhəbbətış bə ın zəhmətkeşə insonon nışonış doəbe.İnğılobi Yolə Rəhbər bın rujədə çı tibbə dodon erjin və ğeymətinə ko tevsifədə hamyedə:Tibbə dodon həm de noxəşon cismi və həmən deçəvon rufi koşon heste.çı noxəşi cismi barədə tibbə dodo həyğətədə  çı doktori şərik,həmko və bəy koməkəy.çı noxəşi cismi çok bıey  koyədə muhimmə baxşi həmonə Tibbə dodon bə vırə rosneydə.Im çı məriz və noxəşi cismi noxəşəti barədəy.de mərizi rufi rabitədə Tibbə dodo həyğətədə Tibbə dodo çı noxəşi ğəmxor,nəvozəkor iyən bəy oroməti baxş kardə şəxse.ım rol vey muhim  və əhəmiyyətine.tibbə dodon həm bə noxəşon cismi çokəti komək kardedən və həmən bəçəy çok bıey qıləy surət baxş kardedə.əvon həmən bə  noxəşi con,ruf və əsəbi oroməti baxş kardedə.de qıləy təbəssım iyən sırədiyənəti,de qıləy qamə sıxani və  de qıləy mehribonə hərəkəti çı noxəşi vucudədə qıləy çokə hiss bə vucud vardedə və bəçəy rufi təsir noydə...

Noxəş əkəse ki,bə qıləy nığo doey ehtiyociş heste.çəy doj və əzob-əziyyətonış heste.qahi zəmon çəy nığlıə zəxmon ,çəy doj doə arşiyə astəon və co nəxoşətiyon ki,əvış zəyif kardə və çəy bə qıləy komək, mehribonəti və dılvandəti ehtiyociş heste.çoko ki,noxəşi dast çı har vırəku kuto beydə və hətto çəy jimoni həmro,çəy fərzənd,pı-mo və co nezə odəmon çəy səy pyi nin,əve əv ıştə umu çəşi bə Xıdo iyən bə Tibbə dodon xıyə kardedə.həmonə Tibbə dodon bənə İlahi rəhməti firiştə omeydə və bəçəy dojon,muşkiloton və cismi iyən rufi ehtiyocon cəvob doydə.

Həzrət ayətullah Xameneyi çı noxəşon çok bıey barədə bıə çı Tibbə dodon muhimmə rolon həxədə jıqo hamyedə:Tibbə dodon çı həkimon şərik və həmkoon.noxəş ki,bə qıləy xdımət kardə kəsi ehtiyociş heste,ehanə həmməysə çokə doktor həm çəy səy sape bımando və əmrko və koməkko,əmmo əy himoyə kardə və ıştə mehribonə vanqo bəy Tibbə dodo nıbu,çə həmonə noxəşti çok bıey vey saxt və çətin bəbe.yəni çı noxəşi çok bıeyədə çı Tibbə dodon qıləy dıjd və muhimmə rolış heste və əgər Tibbə dodo nıbu,mumkine bəzi vıronədə muolisə bə nəticə nırəso.ım bəpe vey muhim  hisob kardey bıbu.çunki,həyğətən vey muhimme....

Noxəşə inson bəştə cismi iyən rufi zəyfəti dəklili xoto,qahi vaxti noumu,oqıniyə və behovsələ beydə.qıləy holədə ki,cismi noxəşəti çok bıey prosesədə çı noxəşi bə qıləy ğoym və mehkəmə ruhiyyə ehtiyociş heste.qıləy ruhiyyə ki,de noumu iyən mənfiyə nəzəş heste.ijən Tibbə dodoye ki,deştə mehribonəti bənə qıləy boğəvoni pəjmurdə,pəleşk  və darşiyə vılon tərmim kardedə və bə noxəşon qıləy səlomətəti mıjdəvoni iyən umu ətri hədiyyə kardedə.