Ilahi Rəhbəron-111

Ilahi Rəhbəron-111

İmom Huseyn(ə) həmçinin deştə ım xoş və ruşinəkə sıxanon dılış piyə bə səhobə,tabeyin iyən bə Bəni-Haşımi huccəti təmomko ta həni ikəsi bo Əhli-Beyti(ə) hərim və xanedani mıdofiyə kardeyro hiç qıləy bəhonə vırəş nımando və nıvoton ki,əmə zınəmon ni və ehanə zınəmon be şımə kənoyədə əmandimon.bənə ımi qıləy səhf və beəsosə istidloli ki,kali nəzə soybon İslomi sədrədə və aşurə ğəhrəmonəti zəmonədə bəy istinod kardəşone ki,muaviyə zəmonədə millət islomi peyğombəri(s) devronışon vindənıbe,həzrət Əli(ə) adilonə hakimiyyətiku jəqo həm qıləy xəbəşon nıbe və muaviyə həm zohirədə de ıştəni bənə mısılmoni bardey,bə həzrət Əli(ə) zidd hevujə surətədə təbliğotış barde və çı peyğombəri(s) əhli-beyti(ə) kin-kudurəti donəş çı milləti dılonədə kaşteşe.binobərin millət təbiiye ki,çı həzrət Əli(ə) iyən çəy fərzəndon fəzilətonku xəbəşon nıbe,əve çı əməvi hukuməti kənoyədə de həzrət Əli(ə) və de İmom Huseyni(ə) canqışon karde.jıqo bızın ki,ın fərdon bəştə nəzəon əsos,dılışon hestebe çı bəni uməyyə məxsusən çı əbu sufyan,muaviyə və yəzidi və bebəsirətinə milləti ki,bə İslomi peyğombəri(ə)  xanedani ələyh ğıyomışon karde Siffeyni canqədə de həkəmiyyəti  ğəbul kardey nokoməti telə zəhrışon bə həzrət Əli(ə) komi ekardəşone,boəy bəhonə vardedən ta İmom Həsəni(ə) məcbur kardeşone qıləy sulh imzoko və Aşurə yolə fociyəşon bə əməl varde ta ımi həm qıləy addiyə ko cilvə bıdon.qıləy holədə deməkə ki,çı bənə səhobə və tabeyini aqahətiku ki,bə zəmon milləti miyono iştirokışon hestebe,təğribən si həzo nomə İraği milləti tərəfiku bo İmom Huseyni(ə) vığandey be və çə həzrətiku tələb kardey be ki,bə Şami səmt hərəkətko ta deçəvon koməki çı bəni-uməyyə rınə bıpəlon. binobərin hiç qıləy uzr iyən bəhonə nıbə holədə əvon  Xıdo-Rəsuli(s) Əhli-Beyti(ə) coyli haşteşone və bəvon peştışon qordıne və əvon bə bəni-uməyyə cinoyətkorə hakimon pənoh bardeşone.həmonə həvopərəst iyən dınyo tələbə millət ki,həzrəte Zeynəbi(ə) iyən İmom Səccodi(ə) ruşinəkə xutbəon bədiqə çı ğəfləti haniku oğo bin və boştə xəyonəton və səhlənkoərti əvəzi bekardey xoto,bənə təvvabin iyən moxtari ğıyomonışon bərpo karde..

İmom Huseyn(ə) ki,çı nıbuvvət iyən imoməti mərkəzədə tərbiyəş vinde,perəse və həzrət de ğətiyyət iyən şəffofəti və de oşkoə holəti çı yəzidi mığobilədə mande və Mədinə şəhri ostandor ,İmom Huseyn(ə) palu bo yəzidi beyət sıeyro omeyədə,İmom Huseyn(ə) bəy hamyeşe:ha əmir ha! Həyğətən,əmə peyğombəri(s) Əhli-Beytimon.əmə çı risolət iyən imoməti mərkəz iyən çı firiştə və mələkon şı-omey və çı İlahi rəhməti nozil bıə vırəy.Xıdo islomış çəmə xıyzoniku binoş karde və de tosə oxo həm deçəmə xıyzoni bə ico bənav bəşe”.

Bəle,İmom Huseyn(ə) boştə de yəzidi beyət kardey ğeyri-mumkin bıey elon kardero,hejo çı sıftəku risoləti xanedani barzə məğami tərsim kardedə və bə qıləy ğaydə təkid kardedə ki,bəvon məxsuse.peşo çı yəzidi zəyifə noxtəonku bəhs kardedə və bə Mədinə şəhri sotandori hamyedə:əmmo,yəzid.ım merd ki, mıku intizorış heste deəy beyətkom.əv qıləy şərovxorə fərde ki,çəy dast bə beqınoə insonon dasti aludə bıə.əv qıləy fərde ki,ilahi hərim və ğanunon darışteydə və oşkoə formadə çı milləti çəşi mığobilədə bə qıno iyən fısoğ-fucuri mırtəkib beydə.çın mığoyisə bədiqə ki,itərəfo İmom Huseyn ibn Əli(ə) ki,çı pokəti və fəziləti mərkəz və vırəy və co tərəfiku həm yəzid deştə qırd mənfi iyən inhirofiyə sıfəton mandə.əve, İmom Huseyn(ə) hamyeşe:aya rəvoye ki,(Xıdo-Rəsuli pokə nəsliku bıə)bənə mı qıləy şəxs de jıqo fosid iyən qınokorə fərdi beyətko?.bın zəminədə şımə iyən əmə ayəndə və vəomə nəzədə bıqətəmon və bəvindemon ki,çəməku kom qıləyni bo millətiku beyət və bo İslomi umməti rəhbərətiro vey loyığe?...