Ilahi Rəhbəron-114

Ilahi Rəhbəron-114

Məələsəf peyğombəri(s) mələkutiyə rehləti bəpeştə  İslomi camiyədə bıə inhirofon və Ğədiri tale həlləkə ğəhrəmonətişon nəzədə nıqəte.əve millət şe-şe məxsusən osmani xilofəti zəmonədə de muaviyə və yəzidi bə hukuməti koon daxil bıey,islomi rəhbərəti əsos və prinsipon xısləton çı viro bekardey be və ko bə qıləy vırə rəse ki,islomi ummət de yəzidi bıə beyətışon ğəbul karde.həlbəttə,kali zəmononədəmillət çı beədoləti iyən sıtəmonku bə xırtə oməbin və bə peyğombəri(s) pokə əhli-beyti(ə) pənoh bardedəbin. əmmo jəqo həm dıroz dəkəşeydənıbe və de təhdid iyən tətmion,bə dumo pekıreydəbin.min cumlə çı Kufə millətiku i dastə be ki,çı bəni-uməyyə beədolətiku həni çəvon səbri kasa peşe və de çandə həzo nomə bə İmom Huseyni(ə) vığandeşone və çə həzətiku bə Kufə səmt hərəkət kardey piyeşone.İmom Huseyni(ə) həm çı Kufə milləti tələbonış becəvob nıhaşteşe.əmmo çun zıneydəbe ki,əvon İlahi rostə rəhbəriku qıləy məlumotışon ni və de muaviyə və yəzidi hakimiyyəti rozi bıən.əve hamyeşe:bəçımı coni ğəssəm bıbu,həyği və rostə imom və rəhbər ə kəse ki,bəştə kitobi əməl kardedə və çı ədoləti royış qətə və de bə həxı pemandey ıştə vucudi bə Xıdo fərmoni vəğf iyən fido kardeydə”....

İmom Huseyn(ə) bənə İlahi co navəjən və imomon itərəfiku bəpe ıştə zəmonə hukuməton inhirofi hərəkəton mığobilədə mande və co tərəfo həm bo İslom iyən mıəsılmınon vəhdəti oqətey və hifz kardero,noçor be çı sulhamizə şivə və roonku oko bıdo.ə həzrət de qıləy nomə vositə bə Bəsrə vali xəbəş vığande və voteşe:Xıdovəndi Muhəmmədış(s) milləti miyono vıjniyeşe və deçəy nıbuvvəti bəy kəromətış baxş karde və əv ıştə risoləti çok-çoki bə vırə rosney və milləti hidoyət kardey bədiqə,bə mələkutiyə osmoni səmt şe və əmə çəy umməti miyono  bo canişinətiro həmməysə ləyoğətımon bıə şəxsonimon. əmmo qıləy ğasıbə dastə ım həxış çəməku sıə və əmə deştə elm,aqahəti iyən ləyoğəti bo mısılmınon miyono ixtilofi buruz iyən nifoğ icod kardero və çı deşmınon bəsə mısılmınonsə səbarzəti vəy qəteyro ,çı mısılmınon oroməti iyən əmniyyəti bəsə ıştə həxısə bənav qətedəm....peşo İmom Huseyn(ə) bə İslomi camiyədə islomi bıə inhirofon plani işorə kardeşe və hamyeşe:şıməni bə Xıdo kitobi iyən bəçəy peyğombəri dəvət kardedəm.zira,qıləy şərayitədə ğərolım qətə ki,Xıdo-Rəsuli(s) siyrə və sınnətiku hiç qıləy nışonə mevcud ni və çəy əvəzi pesoxtə bıə bidəton qətəşe.ehanə bəçımı sıxan iyən dəvəti quş bıdon,şıməni bə dınyəvi iyən uxrəvi hərəbaxtəti iyən xoşbaxtəti səmt hidoyət bəkardem və İlahi səlom, rəhmət və bərəkət bəşmə nəsib bəbe”.....

Seyyiduş-Şuhəda Imom Huseyn ibn Əli (ə) çı yəzid ibn muaviyə bə hukumət omey bədiqə koon idorə kardedəbe.ə həzrət Mədinə şəhriku xaric bıey bədiqə,de namə canqi roy vositə bo umum milləti hodisəon bəyon kardedəbe və deştə xısusi vindemonon,xutbəon handey və noməon nıvıştey çandə qılə qəmonış ğande.ə həzrət qahi vaxti de Xıdo-Rəsuli(s) Əhli-Beyti(ə) mənəvi,elmi iyən əxloği məğam və fəziləton şərh kardey məşğul be və qıləy zəmon ki,ə həzrəti çı əməvi xanedani məxsusən çı muaviyə və yəzidi mohiyyəti barədə həyğəton foş kardedəbe və nışon doydəbe ki,çə həzrəti bəy beyət nıkardey dəlilış,usuli iyən əsosoə ixtilıofonədə zıneşe.İmom Huseyn(ə) həxı bərğərol kardey fikədə be.əmmo çı yəzidi hədəf botılə cəbhə zumand kardey be.

İmom Huseyn(ə) bo İslomi baği mandeyro fik kardedəbe və yəzid çı islomi məhf kardey dumo be.İmom Huseyn(ə) çı məzlumon nicot doey və ədoləti bərpo kardey fikədə be,əmmo yəzidi hukumət bə zəlm iyən fəsodi əsos be.binobərin bo de yəzidi saziş iyən beyət kardero hiç qıləy ro mandə nıbe.həmməysə vey muhimm və tale həlləkə mevzu ım be ki,İmom Huseyn(ə) çı insonon hidoyət və ozavziye fikədə be ta çəvon dınyo iyən axırəti obodko,əmmo yəzid səy kardedəbe ta çı insonon axırəti vironko  və əvoni bə Xıdovəndi vəş qətə və odəmi sutunə cəhəndımi səmt bıbardo......