Ilahi Rəhbəron-121
Ilahi Rəhbəron-121
İmom Huseyn(ə) ki,ıştə ğıyomi hədəfonku qıləyni əmr be məruf iyən nəhy əz munkəri ehyo və bəyji kardey be və ım ko ilahi vocibatonku,Xıdo-Rəsul(s) iyən Əli(ə) siyrə və şıə roy hisob kardedəbe.ə həzrət de çın dıqlə vəzifə və dini,iştimoyi,mədəni və siyosi missiyə icro noiliyyəton koy məşğul beydəbe və hamyedə:əgər əmr be məruf və nəhy əz munkər qırd cəhətonədə və fərdi iyən iştimoyi zəminəonədə əməli bıbu,qırd ilahi vocibaton ısət çı hoston ya saxt,bə həyğət bərəse və bo bə İslomi dəvəti və çəy nufuziro qıləy mınosibə zəminə hozzı bəkarde”.demiyən çı məzlumon həxon mıdofiyə və de zılmkorə hakimon mıborizə bardey ruf bəyji beydə.umumi sərvəton iyən canqi ğəniməton adilonə surətədə təğsım beydə.sədəğə de usuli iyən solımə roy cəm kardey və ilahi həkimonə ğanunon əsos pevolo və məsrəf kardedə.
Kərbəlo vağeyədə yəzidi çand da həzo ləşkər hicrəti 61-ə sori Məhərrəmə manqi de insonon həmməysə fəzilətin iyən pokə şəxs şəhidon sərvəri Huseyn ibn Əli(ə) iyən deçəy hafto dıqlə bəfodorə əshobi dimbədim ome.əvon İmom Huseyni(ə) iyən çəy bəfodorinə qırd əshobi şəhid,çəvon sə çəvon mığəddəsə bədəmiku co kardey iyən əvoni ğətle-am kardeyku əlovə,həmçinin bəçəvon jenon iyən hırdənon cəm bıə xeyməon həmləşon karde və əyo bıə kəsonışon de tars iyən vəhşəti dimbədim kardeşone.İmom Huseyn(ə) ıştə məzlumonə şəhodəti oxonə ləzonədə de yəzidi ləşkəri mışohidə kardey,torıxi qıləy fəryodış vanq je və deştə mələkutiyə vanqi elonış karde:”ha əbu sufyoni xanedani tərəfdoron ha!ehanə şımə dinon nibu və ğıyoməti ruji ğəbul kardedə niyonbu,lamalə ıştə dınyəvi jimonədə ozod gvə hurr bıbənən”.....
Əmmo,ıştə dino həvatə kəson və bə maddi iyən ğudrəti aşığ bıə kəson bə ım insoni nido dığğət nıkardə holədə,əvon ijən bəştə faciyəvi cinoyəton dəvom doşone.əvon həmonə doğ vində jenon iyən hırdənonışon bə əsorət barde və de vey bevəcə ğeyri-insoni rəftoron əvonışon bə Şam iyən Kufə yəni bə ubeydullah ibn ziyodi və bə yəzidi saraya bardeşone.qıləy holədə ki,həmonə şəytonə ğudrəti soybon deştə ğudrəti məstı-xumor bıəbin və həxə sıxanon məşeyışon piyedə nıbe.yəzid və çəy ətrofədə bıə kəson jıqo təsəvvır kardedəbin ki,de insonon cismi həbs kardey çəvon ozod və yolə rufi həm əsir kardey və bə əsorət bardey bəzıneyn.əmmo,ğəflətən vindeşone ki,həzrəte Zeynəb(ə) və İmom Səccod(ə) deştə oğoəkə iyən şucoətinə xutbəon çı Kufə iyən Şami milləti hıtə vijdononış oğo kardeşone və ıştəni çı meydoni səbarz və ğalib hiss kardə çı yəzid iyən ibn ziyodi mığobilədə jıqo ğərra və zumandə xutbəon handeşone ki,oxoyədə saray odəmon etıoz kardeşone və əyo qıləy ğovğa və mırəşulə eqıniye ki,çı əməviyon ğudrəti sutunonış lorzıneşe….
Isət həm əmə bə Aşurə vağeyə iyən əyo bıə ğəhrəmonəti qıləy dığğət kardeəmon.yəzid ki.çı muaviyə məktəbədə perəsəbe,de İmom Huseyni(ə) nomərəd formadə rəftorış karde.əv hejo səy kardedəbe de İmom Huseyni(ə) şəxsiyyəti təxrib kardey,umumi fikədə jıqo nışon doeş piyedəbe ki,əv çı mısılmınon əmire və çəvon xəlifəy.əmmo həmməkəson çəy nopokəti iyən bədə sıfətonku aqah və xəbədo bin. əmmo, Xıdo-Rəsuli(s) pokə nəvə İmom Huseyni(ə) bo ilahi hukuməti bərpo karderoçı yəzidi ğeyri-ğanuni hukuməti mığobilədə mande və ğıyomış karde.əmmo yəzid jıqo ilğa kardeəbe ki,İmom Huseyn(ə) bə ğudrəti rəsey dumoye.əve yəzid çı İmom Huseyni(ə) pokə xuni ru kardeyış muboh və həlolış hisob karde. əmmo,İmom Huseyni(ə) bə əməvi hukuməti duyə təbliğoton bə puç bekardero,ıştə ğıyomi fəlsəfə jıqo şərh kardedə və hamyeşe:”bərosti mı boştə tələbon(şəxsi hədəfon),boştə jimoni xoş dəvordınero,fəsodi tərvic iyən sıtəmkorətiro ğıyomım kardəni.bəlkəm,çımı hədəf əmer be məruf iyən nəhz əz munkəri bərpo kardey,mənəvi erjon oqətey və de bə erjon zidd bıə çiyon mıborizə bardeye.mı dılım heste etığodi, Iştimoyi,əxloği iyən siyosi fəsodon miyoniku bobəm və qıləy islohi hərəkət bə vırə bırosnom.
