Fatməye-Zəhro(s),Peyğombəri(s) yodiqor

Fatməye-Zəhro(s),Peyğombəri(s) yodiqor

Səlom bıbu bə Fatmə(s).bə aləmi həmməysə barzə banu.səlom bıbu bə peyğombəri palu çı insonon həmməysə azizə qılə.səlom bıbu bə Kovsəri xey və rəhməti.səlom bə Fatmə ki,qıləy mutəal və barzə insoni eyniyə nımunə......

Xıdo-Rəsul(s) Məkkəku xaricədə bıə qıləy vırədə ibodət kardə holədə be ki,Cəbrəyil-Əmin nozil be və ərzış karde:Yolə Xıdo bətı səlom vığandedə və hamyedə:tı çıl şəvı-ruj ıştə jimoni həmro Xədicəku co bımand və de ibodət iyən təhəccudi məşğul bıbi.Peyğombəre-Əkrəm(s) hejo həmonə vırəku de Əmmar Yasiri vositə bo Xədiceye-Kubra(s) qıləy xəbəş vığande ki,tı qıləy barzə məğami soyb bıə xanımiş və Xıdovənd haruj çandə kərə deşti vucudi ıştə məlayikon miyono fəxr kardedə.bəşəvnəy çı kə bəon çok bıjən və ıştə vırədə istirohətkə və çı Xıdovəndi əmr iyən fərmoni intizorədə bımand.mı bın mıddətədə ıştə Əbu-Tolıbi kədə bəmandem.

Peyğombəri(s) bə hikməti soyb bıə Xıdovəndi əmri əsos,çıl ruj bə Xədicə kə nışe və bın mıddətədə şəvon de nımoj iyən ibodəti koy məşğul beydəbe və rujon həm rujə qəteydəbe. Xədiceye-Kubra(s) həm bə Xıdo-Rəsuli(s)  dəsturi əsos rəftorış karde və bə mıddətədə bəştə mahbubiku bə diyəro iyən coyli mandey xoto,bəmedəbe və ğəmqin be.

Çoko ki,de ın minvali çıl ruj dəvarde.Xıdo firiştə bə Muhəmmədi(s) nozil be.Əy vəhıştiku qıləy xorək vardeşe və ərzış karde:ımşanqo çın vəhışti xorəkonku tənavulkə,bəhə.Xıdo-Rəsuli(s)   de həmonə ruhoni iyən vəhışti xorəkon iftorış karde.çoko ki,bəsə sapoysə əhışte ta de  nımoj iyən ibodəti məşğul bıbu,Cəbrəyil-Əmin ome və ərzış karde:ha Xıdo azizə peyğombər ha! Imşanqo çı mıstəhəbə nımojiku dəvard və bə Xədicə kə səmt hərəkətkə.zira Xıdovəndi irodəş kardə və piyəşe ki,ıştı sulbiku qıləy pokə fərzənd ofəyo.əve Peyğombəre-Əkrəm(s) bə Xədicəye-kubra kə tərəf hərəkətış karde.

Xədicə votedə:həmonə şəvi bənə addi şəvon kəybə bastə bıəbe və ıştə vırədə de istirohəti məşğul bim.ğəflətən kəybə jıey be və voteme kiye?ğərəz Muhəmmədi(s) hiçkəsi ləyoğətış nıbe ta çımı kəybə bıjəno.peyğombəri(s) bə dıl nıştə sədo bəçımı quşi rəse ki,hamyeşe:ojkə,az Muhəmməd(s).az rəyrə kəybəm oj karde və ə həzrət de ojə dimi bə kəy dılə daxil be.....

Besəti pencminə sori Cəmadiyus-Sani manqi vistı şəşminə ruji Muhəmmədi(s) kə de vəhışti bu pur be.həmonə ruji Xıdo-Rəsuli(s) Kovsər bə hestemoni aləmi ərsə ğədəmış noe və hə  zrət Muhəmmədi(s) iyən çə həzrəti jimoni həmro Xədicə(s) bə şoyvonəti iyən xoşholətiş ğərğ karde. peyğombər(s) Xıdovəndi həmdo-səno kardey bədiqə,ıştə kinəş bəştə vanqo qəteşe və çəy çəkutış pusə karde və bəçəy əzəmətinə çehrəş diyə karde.çın hırdəni nuroniyə çəşon bə peyğombəri(s) qıləy oroməti baxş kardedəbe.jıqo bızın əv qıləy xəzinə be ki,Xıdovəndi bə peyğombəri baxşış kardəbe.çoko ki,Xıdovəndi de qıləy vey xosə tevsifi  bə peyğombəri(s) jıqoş hamye:”İnna ətaynakəl....əmə bətı Kovsər(ziyodə bərəkət) əto kardemone.çən,boştə pərvərdıqori nımoj bıvot və ğıbonikə. Və(bızın) hukmən ıştı deşmın əbtər və nəslış bırniyə bəbe”......