İmom Hadi(ə)

İmom Hadi(ə)

Rəcəbə manqi seminə ruji çı risolət və imoməti pokə xıyzoniku bıə de daminə nur İmom Hadi(ə) şəhodəti sorəqardışi təsoduf kardedə.bəy Hadi  ləğəbışon doe.boçi ki,ə həzrət çı Əbbosiyon zılmkorə sulolə devronədə jiyə zəmonədə bənə İlahi nuri qıləy pokə ovəynə bə dılon dətevedə və çı sıtəmiku tarsə və etosniyə bıə  camiyədə bənə qıləy ruşinəkə və hidoyətəkə voşi rubeydəbe ta həxə roy bəsə dəbvardə devronisə həm vey ruşin bıbu və dəvəşo.

İmom Hadi(ə) çı İmom Cəvodi(ə) fərzənd be ki,Səmanə nomo qıləy pokə moə dovnədə perəse, tərbiyəş vinde və Hicri-Ğəməri 220-ə sori ıştə pı şəhodıəti bəpeştə mısılmınon camiyə hidoyətış bəştə ehdəş peqəte. İmom Hadi(ə) ıştə dovnədə ziyodə şoqirdonış perosne ki,əvon bənə qıləy nuri şoxə de tobə diyəroə sərzəmini rəseydəbin və Əhli-Beyti(ə) xıyzoni aşığon bə İmom Hadi(ə) vəsl kardedəbin,dəçokneydəbin.....

Əimmeyi-Əthor(ə) bə insoni iyən mənəvi fəziləton səmt hidoyətəkə və bəşəri bə dırıst və səhihə roy tərəf nışondoə kəson bıən.ehanə odəmi ağl boəy həmməysə çokə ro nışon doəkəs bıəbe, Xıdovənd həni bə bəşəri səmt peyğombəron və hidoyətəkəyon nıəvğandi.həmonə barzə məğami soyb bıə insonon vəzifəşon hestebe ta ıştə jimoni bo insonon hidoyəti iyən İlahi xəbon bəvon rosnero sərfışon kardə və bın royədə bə qırd məşəğğət və əzob-əziyyəton tov vardəşone.İlahi ənbiya de tosə həzrət Muhəmməde-Mustəfo(s) bə vey ziyodə saxti və əziyyəton təhəmmul kardəşone və tov vardəşone və bın royədə veyə renc iyən əzobon kəşəşone ta insonon de de barzə mənəviyyoti iyən de jimoni adəton oşno bıbon.

Xıdo-Rəsuli(s) bəpeştə bo əslə İslomi təlimonədə inhirofon vəy qəteyro çın buzurquvarə imomonku har qıləyni bəştə zəmoni,siyosi iyən iştimoyi şərayiti əsos,çı mısılmınon camiyə hidoyəti dıjdə koşon bəştə duş və ehdə peqətoşone.qıləy risolət ki,Xıdovəndi tərəfiku təyin bıə və peyğombəre-əkrəmi(s) çandə kərə ıştə bəpeştə bəştə nəsliku bıə hidoyətəkəyon işorə kardəşe ki,əvon  donzə nəfərin və əvon zəmini dimisə çı Xıdovəndi huccətin və zəmin hiçvaxti çı Xıdo huccətiku xali və təyli mandəni.ısət həm bə mısılmınon etığodi əsos həzrət Məhdi(əc)  pərvərdıqore-aləmi zəmini dimisə bıə ğayibə imom iyən huccəte və qıləy ruj ki,zılmo-sıtəm,beədoləti iyən fəsod qırd zəmini dimi dəqəto,zuhur bəkarde və dınyo həmmə vıron de ədoləti pur bəkarde iyən Xıdopərəstəti dınyoədə ğoym və mehkəm bəkarde....