Ilahi rəhbəron-131

Ilahi rəhbəron-131

De yəzidi əmri bə Məkkə səmt hərəkət kardə və roysə çı dınyoku şıə muslim ibn uğbə vırədə huseyn ibn numeyr çəy xunkorə ləşkəri sərkərdə təyin be.əv həm bənə ıştə sələfi de veyə ğəddorəti çı mısılmınon xunış rukarde və bə Kəbə kəş de məncənaği otəşış je və de Məkkə əhali ğətlı-am iyən deçəvon mol-əmvoli ğarət kardey məşğul be.nəhoyətən Hicri-Ğəməri 64-ə sori Rəbiyus-Sani manqi sıftədə de yəzidi maqi xəbə rəsey,hoseyn ibn numeyr iyən ləşkər Məkkə şəhri mıhosirə kardeyku dastış kəşe.

Odəmi dığğəti cəlb kardə vey muhimmə nuktə ıme ki,kom zəmoniku əməvi xıyzon iyən çəvon muzduron curətışon pəydu karde de bə islomi zohiri rioyət kardə holədə İslomi mığəddəstonışon darışte,bə mısılmonə milləti təcavuz kardeşone və bənə Aşurə faciyə ofəyoşone və bə peyğombəri(s) şəhr bıə Mədinə şəhri həmləşon karde və çəvrə camaatışon ğətlı-am,bəçəvon nomuson təcavuz iyən çəvon mol-əmvolonışon ğarət karde və həmçinin Kəbəşon bə otəş je?ruşine ki,çın əsosə sıvoli cəvob ıme ki,qırd ım inhirofon çə zəmoniku bino be ki,ğudrət tələbon çı İslomi əbzoriku oko doə holədə de Xıdovəndi əmri və de peyğombəri(s) vositə Ğədiri-Xumədə həzrət Əli(ə) bə viloyət və xilofəti məğami nəsb kardeyışon ıştə nəzədəşon nıqəte və ğudrətışon bə dast qəte və nim əsri ərzədə həzrət Muhəmmədi(s) vardə əslə dinışon əvəz karde,çı səhnəşon bekarde və çəy əvəzi əməvi islomışon noe.çın dardnok və telə hodisə isbotədə ım vəs kardedə ki,yəzidi maqi bədiqə çəy zoə muaviyə ibn yəzid ğudrəti hukuməti bə dast sıə zəmonədə qıləy ruj çı əməviyon əməlonış de şiddəti tənğıdış karde,Aşurə fociyə,bə Məkkə iyən Mədinə həmləş məhkumış karde və çı əməvi xanedaniku bəroətış karde və ıştə bə diyəro mandeyış elon karde və qıləy kırtə mıddətədə çı ğudrətiku bə kəno mande və xilofətış fəğət bo peyğombəri(s) xanedani loyığ zıneşe.beşək əgər həzrət Əli(ə) çı islomi nuperəsə umməti imomət iyən xilofəti koş çı sıftəku bəştə ehdəş peqətəbe və çəy İlahi əslə həx ğəsb bıə nıəbe,hiçvaxti islomi dınyoədə bənə muaviyə iyən yəzidi bıə fərdon bə ğudrət nıərəsi və əvon həm jıqo odəmi lorzınə fociyəon bə əməl nıəvəyn.

Mumkine çın sıvoliku bəhs bıbu ki,çıro İmom Səccod(ə) ğıyomış nıkarde.de tağutə rejimon mıborizəş nıbarde  və   bə Məkkə iyən Mədinə şəhri həmlə və bəçəvrə milləti namuson təcavuz kardey vəy nıqəteşe?.

Çın sıvoli cəvob ıme ki,ə həzrət de ıştə cəddi həzrət Əli(ə) Siffeynədə de muaviyə və çəy amu İmom Həsən(ə) bəçəy dınyotələb iyən mınofiğə tərəfdoron xəyonət və nodonəti dəlili xoto  kardə canqonku vində məğlubiyyəti təcrubə kardə holədə ki,vindəşbe əvon çokonə Aşurə fociyədə qıləy rolışon hestebe. əve ə həzrət  de ın dastəon silohinə mıborizə və ğıyomış bə islomi dınyo nəf və xeyri və məsləhətiş nızıne.