Ilahi rəhbəron-145

Ilahi rəhbəron-145

İmom Məhəmməd Bağıri(ə)məktəbədə tərbiyə vində kəson hədison omutey iyən əvoni pevolo kardey və de milləti sərostə formədə dimbədim omeyku əlovə,bə milləti dini iyən siyosi sıvolon cəvob doydəbe və elmi mınozirə və debaton bə vırə rosneydəbe və əvon bənə fiğh,usul,kəlom,hədis  və Kərimə-Ğıroni təfsiri sahədə mıxtəlifə kitobon təlif kardəşone.İmom Bağır(ə) bə Əban ibn Təğləbi hamyeşe:”ha Əbanha! Mədinə məçitədə huzur pəydukə  və bo milləti fətvo bıdə ki,mı dılım heste çəmə şiəyon miyono bənə tı dıjd və təsirəkə insonon pəydu bıbu.İmom Sadığ(ə) ıştə pı məktəbiku beşə yolə alimon barədə jıqo hamyəşe:”ehanə ımon bıə nıəbin,çımı pı hədison və təlimon çı miyoniku əşin….

Imi həm votey lozıme ki,de təhdidon,de deşmınon yavə təbliğoton və de təzyiğon pur bıə qıləy fəzoədə pencminə İmomi(ə) fərhənqi bərnomə və səyon bə vırə rosney beydəbe.İmom Məhəmməd Bağıri(ə) jıqo qıləy fəzoədə bıə səbarzəti çə həzrəti fevğəaldə surətədə bıə huşinəti və ağılmandəti nışon doydə ki, çokonə qıləy qıləy mədəni iyən fərhənqi inğılobış bərpo karde və bə əməviyon məkrinə planon rəğmən bo həzrəti Muhəmmədi(s) vardə əslə islomi ehyo və bəyji kardero barzə qəm və ğədəmonış ğande.xulosə İmom Məhəmməd Bağıri(ə) həyğətədə qıləy elmi mərkəzış təsisış karde ki,kəmiyyət iyən keyfiyyət nəzəku anədə muhimm be ki,İslomi dınyo elmi cəhəto qırd barz və bılındə məğami soyb bıə kəson bəçəy elmi təsiri ji dəşin və əvon ıştəni çə həzrəti elmi və şəxsiyyəti mığobilədə hırd hisob kardedəbin.Həkəm ibn Uteybə İmom Məhəmməd Bağıri(ə) zəmonədə jiyə qıləy məşhurə alimonku be və əv bə ə həzrəti huzuri şərəfyob beyədə,jıqo ıştəni qim kardedəbe və ociz beydəbe ki,coqlə alimonku qıləyni bıə Əbdullah ibn Əta votedə:əv deştə əzəməti ki,çı milləti miyono hesteşbe,İmom Məhəmməd Bağıri(ə) məhzərədə bənə ıştə ustodi palu qıləy hırdən və əğıli be…….