İlahi əsma

İlahi əsma

Xıdovəndi Həlim nom hilmi kəlməku peqətə bıə.helm ıştəni oqətey və ıştə həyəconi kontrol kardey mənoədəy və çun ım holət çı ağliku nəşət seydə, qahi zəmon həm çı ağli mənoədə həm omeydə.çun Xıdovənd bə qınokoron cəzo doey və çəvon uğubətədə vey səbr kardedə və tosə qıləy zəmoni bə kofir, mışrikon, deşmınon və ğasibon həm fırsət doydə ta har qıləy koy çəvon dılon piyedəşone bıdə bə vırə bırosnon.bəçəy xoto Həlimi nom  çı Xıdovəndi vey səbrəkə bıey nışon doydə.Həlim bə Səbri məno vey neze.əmmo,de ın tafuti ki,Səbr cəzə-vəzə və tov nıvardey mğobilədəy.həyğətədə,inson bəpe xariciku bəy daxil bıə harçi mığobilədə ıştəni oqəto və ıştə muşkiloton həlko.əmmo,Helm çı xışm iyən ğəzəbi mığobilədəy.yəni bo insoni qıləy bə xoş nıomə hodisə bənav booy,əmmo əv ğeyzin nıbu,ım səbr ni,bəlkəm helme.

Helm ağli mənoədə həm omeydə.İmom Sadığ(ə) hamyedə:”əlhilmu siraculllah”..helm Xıdovəndi ço mənoədəy.əmə zıneydəmon ki,ağl həm ço və nure.cohili ərəbon mədəniyyətədə həm Həlim bə kəsi votedəbin ki,ağılmand be və çəy rəftor iyən əməlon bə ağli əsos be.İmom Əli(ə) çı helmi həxədə jıqo hamyedə:”çən,helm insoni vucudədə İlahi nuroniyyəte.bəçəy əsos İmom Sadığ(ə) helmi İlahi sirac və ço   hisob kardedə.zira həmonə İlahi çoyku qıləy nur pevolo beydə və bə bə bi dəvəşeydə ki,çə həmonə nuri xatric bıə və əks sədo doə çi ağle......

Həlimi nom Kərimə-Ğıronədə 15 kərə təkror bıə ki,çəy 6 qılə de Ğəfuri ismi həmnişin bıə.Həlimə Xıdovənd çı qınokoron qıno vindeydə,əmmo musamihə kardedə və de qızəşti deəy rəftor kardedə.əv qıləy zumand və ğudrətinə kəse ki,hiçkəs əy qınokoron bə cəzo rosney koyədə bo əcələ vodor kardey nibəzıne.çoko ki,Xıdovənde-Aləm fatiri mıborəkə surə 45-ə şərifə ayədə ımko ıştən jıqo tevsif kardedə: ”vələov....əgər Xıdovənd milləti bəçəvon kardə koon xoto(rəyrə və bəvon hiç qıləy mehlət nıdoə holədə) bəçəvon cəzo bırosno,(həni)zəmini dimisə hiç qıləy inson niəmandi.və lakin Xıdovənd (bəştə lutf iyən kərimi xoto) bəvon de tosə qıləy mıəyyənə zəmoni (tosə ğıyoməti)bə təxir eğandedə.qıləy zəmon ki, çəvon əcəl rəse,Xıdovənd ıştə bandəon vindedə.(və çəvon sıxan,əməl iyən fikonku xəbədoe və çoko ki,bəpe çəvon mıkofoti bıdo).

Liza Xıdovənde-Aləm bəştə bandon tobə kardey fırsəti doydə və əvon qınoku oqardə zəmonədə əvoni baxşeydə.Xıdovənd bəştə bandəon qıno xoto,ıştə nemət,fəzl iyən baxşeşei çəvonku bırniyedəni və çoko ki,qıləy muti iyən bə əmri pemandə kəsi ıştə ruzi əto kardedə,bə qınokorə fərdi həm ruzi doydə.əv səbrəkə Xıdoye və de qınokorn bəçəvon kardə əməlon xoto rəftor kardey beydəni.bəlkəm bəvon mehlət doey beyə ta əvon tobəkon və bəçəy səmt oqardon.Xıdovənde-Xalığ Bəğərə mıborəkə surə 235-ə şərifə ayədə hamyedə:”vələmu....və bızınən ki,Xıdovənd şımə daxili niyyətonku aqahe.çən,deəy mıxolifət kardeyku pərhizkənən və bızınən ki,Xıdovənd vey əbaxş və səbrəkəy”.....

Xıdovənde-Aləm Kərimə-Ğıronədə çı tohid,səbr iyən isari ğəhrəmon bıə həzrət İbreymi(ə) bəçəy helmi dəlili xoto,mədh və tarif klardedə.qıləy helm ki,çı kofiron nisbət doə əzob-əziyyəton mığobilədə səbr kardedəbe.Xıdovənde-Xalığ Tobə mıborəkə surə 114-ə şərifə ayədə hamyedə:”və ma kanə .....və İbreymi boştə pı(amu Azəri) istiğfor fəğət bəy doə vədə xoto be.əmmo çoko ki,boəy ruşin be ki,əv çı Xıdo deşmıne,çəyku bə diyəro mande.yəğinən ibreym mehribon iyən həlim be..Hudi mıborəkə surə 74-75-ə şərifə ayəonədə həm çı həzrət İbreymi de bo Hudi ğovmi bə cəzo rosnero omə məlayikon mıcodilədə sehbət kardedə.bın ayəonədə jıqo omə:”fələmma....qıləy zəmon ki,İbreymi tars nışte və (çəy fərzəndi təvəlludi)mıjdəvoni bəy rəse,Luti ğovmi həxədə deəmə mıcodilə kardedəbe.çıro ki,İbreym səbrəkə,dıləsut iyən(bə Xıdo tərəf)oqardə kəs be”....