Ilahi rəhbəron-145

Ilahi rəhbəron-145

İmom Sadığ(ə) nəğl kardedə ki,əmə bə bə Dəməşğ daxil bimon və hişami se ruj əmənış ğəbul nıkarde.çominə ruji əməşon bə əməvi saray daxil kardeşone.hişam qıləy taxtisə nıştəbe və çəy saray əhl çəy mığobilədə de tiy ğandey və hədəf qətey koy ıştə səşon tasbonəbe.hişami çımı pış deçəy nomi vanqış je və voteşe:deştə ğəbilə yolon tiy bığand.çımı pı hamyeşe:az piy bıəm.həni mıku dəvardə.mıni bıbaxş.hişam ki,çımı pı təhğır kardey fikədə be və dılış hestebe əy ociz nışon bıdo,təhdidış karde ki,hukmən bəpe ımko bə vırə bırosno və bə əyo bıə kəson qıləyni voteşe ki,ıştə kəmoni bəy bıdo.çımı pı çoko ki,vindeşe həni çəy co çorəş ni,əve kəmonış bəştə dastış qəte,okışrnışe və tiyış bə hədəf ğandeşe.iminə tiy dırıst bə hədəfi qıniye.dıminə tiy həm bə iminə tiyi miyon dəşe və əvış poə karde.seminə tiy bə dıminə və çominə qıləyni həm bə seminə qılə sape və de tosə nəvminə qılə hakəza.həmmə vırədə əhsənt və təşviği sədo rost be.hişam ki,ım səhnə çəş kardedə nıbe,beğərol vanqış je:affərin Əba Cəfər.tı ərəb iyən əcəmədə çı tiy ğandə kəson sərvəriş.boçi jıqo nışon doey piyedəbe ki,tiy ğandey ıştıku dəvardə?Ğureyşi bənə tı qıləy odəmış heste və bəsə ərəb iyən əcəmisə fəxr kardedə.tı de jıqo qıləy məhorəti tiy ğandey kiyku və kom zəmon omutə?çımı pı hamyeşe:tı zıneydəş ki,Mədniə millət bə tiy ğandey adət kardəşone və az ıştə cıvonəti zəmonədə de ım koy məşğul bim. Hişami voteşe:mı ıştəni zınə zəmoniku de tosə ısət jıqo mahirə şikilədə tiy ğandeyım vindəm nıbe və qımon kardedənim ki,zəmini dimisə bənə tı jıqo tiy ğandey bızıno.aya ıştı fərzəndon həm bənə tı tiy ğandey zıneydən?çımı pı hamyeşe:əmə “kəmol “iyən “təmomi” bə irs bardedəmon.çoko ki, Xıdovəndi ım ayəş bəştə peyğombəri(s) nozilış karde və hamyeşe:”ımruj dinım boşmə komil iyən nemətım boşmə təmomım karde və rozi bim ki,İslom şımə din bıbu”(Maidə-3).İmom Bağır(ə) peşo hamyeşe: ”zəmin hiçvaxti jıqo dıqlə xıslətış bıə ilahi huccətiku xali və təyli nibəmande”.hişam ki,həni çımisə vey bəçımı pı təhəmmul və tov vardey nızınışe və bənə mori jıə kəsi bəştə dəqətey be və hissış karde ki, həmonə zəmoniku bə ğərol ome ki,çımı pı bə şəhodət bırosno.....

Hişam ibn əbdulməlik bəştə hevujə surətədə bıə hiyləon və təbliğoton rəğmən nəyinki,çı İmom Bağır(ə) rujbəruj ziyod bıə elmi,əxloği,iştimoyi iyən siyosi fəoliyyəton vəy qəteyış nızıne,bəlkəm haruj əv bə həzrət Bağıri(ə) çı ziyodə millət,alimon,dini iyən elmi mərkəzonədə bıə iştiroki şoyd be.joqo ki,İmom Bağır(ə) bo həzrəte Muhəmmədi(s) vardə əslə İslomi bəyji kardero ziyodə cəhdon kardedəbe və de ruşinə formə həyğəton bə milləti rosnedəbe.əve hişam bə həmonə dəlili xoto,sıftədə de İmom Məhəmməd Bağıri(ə) iyən çə həzrəti buzurquvarə fərzənd İmom Sadıği(ə) Mədinəku bə Dəməşğ vanq jıey və ijən əvoni bə Mədinə oqordınə zəmonədə çə həzrəti dumo noloyığə sıxanon kardey və bə ə həzrəti iftiro ğandey,dılış hestebe çə həzrəti şəxsiyyəti terrorko,darışto və çə həzrəti mahbubiyyətiku bəkamko.əmmo,çoko ki,ə zolımi mışohidəş karde ki,çəy məkrinə plan və hiyləon bərəks be,əve bə ın fik dəşe ki,İmom Məhəmməd Bağır(ə) bə şəhodəti məğami bırosno və bəştə muzdurə məmuron əmrış karde ta bə ə həzrəti zəhr bıdon və əy şəhidkon.Hicri-Ğəməri 114-ə sori Zilhəccə manqi haftminə ruji ə həzrət penco haft sinnədə bə İlahi dəvəti ləbbeykış vote və ıştə conış bə con ofəyə Xalıği təslimış karde.ə həzrət ıştə şəhodəti şəvi zəmonədə bə İmom Sadıği(ə) hamyeşe:”az ımşəv ım dınyo tərk bəkardem.ısət həm ıştə pı həzrəte Səccodım(ə) vinde ki,qıləy nuş kardəninə şərbətış çımı palu vardeşe və mı əvım peşome və bəmı qıləy əbədiyə məkon iyən bə həxı vindemoni səmt bəşorət və mıjdəvoniş doe.

Peşonə ruji İmom Məhəmməd Bağıri(ə)həmonə pokə bədəmışon Bəği ğəbostonədə və çı İmom Həsən(ə) iyən İmom Səccodi(ə) ğəbi palu dəfn kardeşone.Xıdo və çı İlahi firiştə və məlayikon səlom bıbu bə həzrəti....

Əzizə əməson,ısət həm şımə dığğəti bə İmom Məhəmməd Bağır(ə) nışon doə kali kəlməon və nuroni bəyonaton səmt cəlb kardedəmon.joqo ki,ə həzrət hamyedə:”kəmol iyən çəy ovc və barzə noxtə çandə qılə çiyədəy:dinşınosi,bəlo iyən saxtiyonədə səbr,bo jimoni idorə və məişəti təminiro qıləy plan kəşey”.ə həzrət həmçinin hamyedə:”insoni bəştə mısılmonə bıvə təbəssım kardey,qıləy çokə əməl bə hisob omeydə və əgər  çı toşə və leşti ğədərə həm ğəmi çəy çehrəku peqəto həm çokə əməl bə hisob omeydə”.həmçinin İmom Bağıri(ə) hamyəşe:”peyğombəriku(s) dəparseşone ki,Xıdovəndi həmməysə çokə bandəon kom kəsonin? Həzrəti hamyeşe:”ə kəsonin ki,çoki kardə zəmonədə şo beydən və bevəci vidnə zəmonədə bəbaxşeyn və bəvon qıləy nemət rəsə zəmonədə şukr bəkardeyn və de qıləy giriftorəti dimbədim omeyədə səbr bəkardeyn və ğeyzin bıə zəmonədə çı cokəson xətoon piyo çəş vi bəkardeyn”.......