Ilahi rəhbəron-146

Ilahi rəhbəron-146

Pokə İmomon(ə) zəmoni miyono İmom Sadıği(ə) zəmon har nəzəku çı coqlə zəmononku farğ kardedəbe. zira,ə həzrət siyosi,fərhənqi iyən iştimoyi cəhəto de qıləy şiddətinə behroni dimbədim oməbe.siyosi nəzəku şəhidon əğə Huseyn ibn Əli(ə) məzlumonə şəhodət iyən çandə qılə ğətl iyən ğarəton  bəpeştə çəvon dudumon iyən nəsli bırniye nışonəon məşhur be.bə həssosə zəmonədə əsosə muşkil ım be ki, Haşımi ğəbilə rəyison çı Məkkə de Mədinə miyono Əbva nomo qıləy vırədə  cəm bin və qıləy məhramonə formədə qıləy iclosışon dəvordıne.çəvon miyono İmom Huseyni(ə) nəvə Əbdullah ibn Həsən Musənna ki, de Əbdullah Məhzi nomi məşhur be və həmçinin çəy zoon Muhəmməd iyən İbrahim və həmçinin peyğombəri(s) əmu Əbbosi nəvəonku çandə qıləyni  yəni İbrahim İmam,Əbuləbbos Səffah iyən Əbu Cəfər Mənsur və həmçinin co amuyə zoonku idastəku iborət be əyo cəm bin....

Əvon həmmə ıştəni bə peyğombəri(s) xanedani nisbət doydəbin.əmmo,çəvon həmmə hədəf bə ğudrət və hakimiyyəti rəsey be.əvon bo umum milləti bə dast dənoeyro “Ərrəziyy bin ali Muhəmməd” ya “Ərrıza min ali Muhəmməd” yəni dılomon heste Ali-Muhəmmədiku qıləyni bıvıjnəmon və çı ğudrət və hakimiyyəti koy bəy bəspardəmon.qıləy hiylə ki,bın şuorədə oko doydəbin ım be ki,İmom Sadığiku(ə) qıləy noməşon nıvarde,əmmo kulliyə fomaədə çəyku qıləy bəhsışon karde ta deçəy vositə əvon hakimiyyəti bə dast biyon.bə həmonə nəzə əsos İmom Həsəni(ə) nəvə Əbdullah Məhz bə əyo bıə odəmon dimış qəte və voteşe:”ha Bəni-Haşım ha! Həmmə çəşon bəşmə səmt xıyə bıə və çı camiyə qırd fərdon bəşmə umumşon bastə.ısət ki,Xıdovəndi şərayitış hozzı kardə və iyo cəm bıəyon.boənən şımə həmmə deçımı cıvonə zoə beyətkəmon və əy boştə rəhbər bıvıjnəmon və bə əməviyyon ələyh canqkəmon....

Əbdullah Məhz ıştə poş çımisə həm vey dırozış karde və çı məxloği miyono voteşe:ha millət ha! Şımə həmməy zıneydon ki,”Umməti Məhdi” çımı həmonə zoəy.çən,şımə həmməkəson boənən və deəy beyətkənən.Bəni-Əbbos ki,sıftədə zəminə bo ğıyomiro hozzı vindedənıbin,əve fikışon hestebe sıftədə Ali-Əliku(ə) ikəs ki.çı milləti miyono ziyodə mahbubiyyətış heste,bıdə əv ğıyomko və əv hukuməti bə dast vardey bəpeştə,əvon əy çı miyoniku pebəqəteyn və hakimiyyəti bə dast bəvardeyn.bə həmonə dəlili xoto,Mənsur Əbbosi bə Əbdullah Məhzi dimış qəte və voteşe:de “Umməti Məhdi” nomi ne,əmmo deştı zoə Muhəmmədi beyət bəkardemone.ha məxloğ ha! ŞIMƏ HƏM DEƏY BEYƏTKƏNƏN.həmmə kəsi voteşone ki,rost votedəş və əvon həmmə de Nəfsi Zəkiyyə nomo məşhur bıə Muhəmmədi beyətışon karde.....

Əbdullah Məhz bo İmom Sadıği(ə) himoyəti cəlb kardey iyən ıştə zoə mevğıyyəti təsbit kardero,i dastə odəmış çı İmom Sadıği(ə) dumo vığandeşe.həlbəttə bə Əbulfərəc  İsfəhani nəğli əsos,Əbdullah voteşe ki, Cəfəri dumo odəm məvğandənən.zira əv əgər booy.əmmo ijən deəmə mıvofiğ nibəbe.torıxəvononku idastə votedən ki,Əbdullah jıqo qıləy sıxanış votəni,əmmo umuməm torıxi fakton və ğərinəon nışon doydə ki,Əbdullah ziyodə meylış hestebe ki,çı İmom Sadıği(ə) nəzə cəlbko.bə həmonə dəlili xoto,çoko ki, ə həzrət bəçəvon məclisi daxil be,ıştə vırəku əyşte və bə ə həzrəti qıləy məxsusə hurmətış nışon doe. peşo ıştə miyono ğəbul kardə həmonə təklifışon bə ə həzrəti ərzışon karde və voteşe ki,bə ısətnə aşuftə iyən  bəyənde qıniyə vəzyəti nəzə kardeyədə,şımə həmmə kəson zıneydon ki,çımı ım zoə çı Umməti Məhdiye və şımə deəy beyəton kardə və tı Cəfər həm deəy beyətkə.İmom Sadıği(ə) de oşkoə formə hamyeşe:”peyğombəri(s) çəy zuhuri və`də doə Məhdi(ə) ıştı fərzənd ni və tı ehanə jıqo təsəvvır kardedəşbu,jəqoədə səhfədəş.peşo bə camaati dimış qəte və hamyeşe:”əgər şımə de “Umməti Məhdi” deəy beyəton kardeyon piyedə,az beyət nibəkardem.ım iddio qıləy duyə iddioe və çı bəşəri camiyə imom iyən oxonə huccət bıə Məhdiye-Məvudi(əc) zuhuri zəmon ısətnə əsr və zəmonədə ni,əmmo ehanə şımə ğıyom de əmr be məruf iyən nəhy əz munkəri niyyəti və de zılm iyən sıtəmi  mıborizə bardey hədəfi bıbu. bəvədə az beyət bəkardem”....