Nuri astanadə

Nuri astanadə

Imom Rıza(ə)qıləy odəmi coni lorzınə rəvoyətədə hamyedə:”qədə qınoon dıjdə qınoon zəminə hozzı kardedə.har ki,qədə qınoədə Xıdoku nıtarso,dıjdə qınoədə həm Xıdoku nibətarse”.yəni ehanə ikəs qıləy qədə qıno  əncom bıdo və əy hırd və beçiz hisobko,həmonə ko bəçəy qıno ijən təkror kardey iyən cəsorəti boyis bəbe və həmonə ko Xıdovəndi nəzdədə dıjd hisob beydə və çəy qıno kəbirə və dıjd hisob beydə.Həzrəte Muhəmmədiku(s) rəsə qıləy rəvoyətədə omək ki,ə həzrəti bə Cabir ibn Əbdullah hamyeşe:”ha Cabir ha! ın manq Rəməzonə manqe.har ki,ruji rujə bıqəto və şəvi i hissədə de ibodəti məşğul bəbu və ıştə ləvə iyən şəhvəti həromiku oqəto və ıştə zıvoni oqəto,bənə  Rəməzonə manqi beşey əv qınoku jıqo xaric bəbe ”.Cabiri voteşe:ha Rəsuləllah ha! Iştı ım hamyə hədis vey çoke.həzrət hamyeşe:”ha Cabir ha! Çanədə saxte,çımı ım votə şərayiton”.....

Həyğət ıme ki,qıno insoni çı kəmol,ruşd iyən hidoyətiku bə dumo oqəteydə və inhirofə roon səmt bardedə.Xıdo çokə bandəon iyən mısılmınon veyni adətən kəbirə iyən dıjdə qınoon bə vırə rosneydənin,əmmo çun əvon məsum bıənin,bə səğirə iyən qədə qınoon mırtəkib beydən və çun həmonə qıno qədə qıno hisob kardedən,boçəy tərkiro bə qıləy ciddiyə ğəroli omeydəni.qıləy holədə ki,tobə nıkardə iyən peşmonəti nıbə holədə həmonə qınon dəvom doey,bə həmonə qıno isror kardey tələğği beydə.ehanə qıləy qınokorə kəs bıbu ki,milləti bəy etımodış kardə və bəy pemandon və əv zohirədə qədə qıno əncom doə zəmonədə millət  çəyku xəbədo bıbu və çəy yavəti çəvon nzədə kam bıbu.jıqo qıləy şərayitədə ım səğirə iyən hırdə qıno Xıdovəndi nəzdədə kəbirə iyən dıjdə qıno hisob beydə.bəçəy xoto inson ısət çı dıjd bıbu ya hırd bıbu,bəpe əvoni tərkko ta bın mıborəkə manqədə bə rujə qətey həyğəton dast pəyduko.....

Mınosibe  ki,bızınəmon mıborəkə Rəməzonə manqi bə İslomi fiğhi əsos ıştə lıv-luputi tar kardey rujə botıl nibəkarde.həmçinin qəvi de ovi pur kardey rujə botıl nibəkarde,xorəki təmi çaştey həm bəçəy qəvi qıləy çi daxil nıbə holədə hiç qıləy işkalış ni.ehanə qıləy rujə qətə kəs boştə təşnəti bərtərəf kardero ıştə qəvi de ovi  məzməzəko,qıləy surətədə ki,çəy xılxiku saru nışo,çəy rujə səhihe.ğərğərə kardey həm hiç qıləy muşkilış ni.əmmo ehanə əv çı xırtəku dəvardo,çəy rujə botıl bəbe və həmonə fərd bəpe iftorko.

Qahi zəmon səhəri bəpeştə kali xorəkon təm iyən bu ya dandoni pastə tosə qıləy mıddəti mandedə.ısət əgər de ovi qəvədə qordıney bədiqə ijən həmonə bu iyən təm bımando,həni hiç qıləy işkalış ni.əgər fərd səhəri və çəsənə hardə zəmonədə sərəso ki,əzoni vaxt rəsə.bəpe həmonə loğmə və cılmə ıştə qəviku bekardo və çoko ki,əy əmdən və zıne-zıne ebordıno,çəy rujə botıle və bəy kəfforə həm vocib bəbe.çımisə əlovə əgər rujə qətə kəs bəştə viro bekardey xoto qıləy bıhardo,de co şəxsi vositə bəy təzəkkur doey iyən nəhy kardey vocib ni.əmmo,binobər ehtiyot vey çoke ki,ehanə məxsusən çı milləti çəşi vədə bəy təzəkkur doey bıbu ta bəştə yod biyəy ki, rujəş qətə və əgər həmonə çi ıştə qəviku xaricko,bəştə rujə dəvom doey bəzıne.....

Xıdovənde-Xalığ Fatiri mıborəkə surə 15-ə şərifə ayədə hamyedə:”ya əyyuhənnasu....ha millət ha! şımə(həmmə) bə Xıdovəndi ehtiyociyon heste.fəğət Xıdoye ki,be ehtiyoc və(əv)bə harcurnə həmd iyən sıtoyişi loyığe”.