Nuri astanadə-11

Nuri astanadə

Rəməzonə mıborəkə manq insoni ıştə piyo ko kardey manqe.qıləy manq ki,bə insoni qıləy ğudrət baxş kardedə ta əv ıştəni pəyduko və İlahi məsirədə qəm və ğədəm şodo.çın manqi məxsusə ibodətonku qıləyni rujə qəteye.rujədə bıə xısusiyyəton coqlə ibodətonədə mevcud ni.ım ibodət anədə xass və məxsuse ki,Xıdovənde-Aləm bın barədə hamyedə:”rujə bəmı məxsuse və az ıştən çəy səvobi bədom”.ğasbu çın ibodəti məxsus bıey dəlilonku qıləyni həmonə ixlose ki,çın rujə qətə kəsi vucudədə noey bıə.rujə bə həmmə ibodəton əks ki,çı milləti çəşi mə`rəzədə bə vırə rosneydən,ım ibodət qıləy punhoni iyən məxfiyə ibodəte.əmə bo nımoj votero hozzı beyədə, çəmə ğıyom,ruku  iyən səcdəon zohir nışon doydə ki,əmə de nımoji məşğulimon.xoms.zəkot iyən infoğədə həm jıləvoniye.boçi ki,çəy həmməysə kamə qılə ıştə moliku dəvardə kəs əy dərəseydə.həcc,cihod iyən sayir ibodəton həm jıqoye.ım qıləy holədəy ki,rujə de bədəni hiç qıləy hərəkəti iyən zohiri əməli bə ico ni və madəm ki,şəxs ıştən ıştən rujə qətey izhor nıko,hiçkəs çəy zohiriku çəy rujə qətey hiss nibəkardeyn və nibəzıneyn...

İmom Əli(ə) hamyedə:”rujə,çı xalıği de bandə miyono qələy ibodəte.ğərəz Ofəyəkəsi hiçkəs çəyku xəbədo nibəbe və sıvoy Xalıği hiçki çəy mıkofoti nibədoe”.oşkoye ki,bə Kərimə-Ğıroni iyən rəvoyəton nəssi əsos Xıdovənd çı həmmə həsənaton səvob iyən mıkofoti bədoe,əmmo ısət çı rujə həxədə jıqo hamyedə,bə rujə çı ibodəton miyono bıə məxsusə məğami və təsiri xotoye ki, rujə qətey bə ixlosinə insoni məğsədi  noydə.

Odəmi dığğəti cəlb kardə çi ıme ki, həzrəte Fatmə(s) həm Fədəkiyyə xutbə mığəddimədə  çı rujə vucudi illət və səbəbi barədə  jıqo hamyedə:”Xıdovənd rujəş bo ixlosi bərpo kardero ğərolış doe”.binobərin ehanə qıləy şəxs rujə qırd mıddətədə ısət çı xəlvət bıbu ya cəlvət,punhon iyən oşko çı ixlosi əloməte və çəy foydə xəlvətədə ıştə nəfsi piyo ko kardey və çı şəhvətiku pərhiz kardey iyən çı milləti miyono qıləy etıbori kəsb kardeye”......

Əmə həmmə ziyodə hacətımon heste ki, dılımon heste ğəbul bıbu.əmmo,hukmən bəşmə və həm beşə ki,boştə hacəton ğəbuliro çandə kərə dıvoon kardə,əmmo hələ həm icobət iyən ğəbul bıəni. şımə xotırcəm bıbənən ki,Xıdovəndi boəmə çəmə ıştə nəzədə qətə çiysə həm vey çokiş piyedə.boçi ki,əv çəmə koon ağıbətiku xəbədoe.