Ilahi rəhbəron-148

Ilahi rəhbəron-148

Bəni-Əbbos ki,bə ğərəz hukuməti rəsey co qıləy hədəfışon nıbe,zohirədə de Əbdullah Məhzi zoə Məhəmmədi beyətışon karde,əmmo boştə hədəfon bə həyğət rosero,Kufədə Əbu Sələmə Xilal nomo qıləy fərdışon nəzədə qəte və bo umum milləti bə dast dənoeyro bəy Ali-Muhəmmədi vəziri ləğəbışon noe və Əbu Muslim nomo co qıləy fərdışon bərujnə Xorasani hevujə məntəğəonədə vıjniyeşone və bəy Ali-Muhəmməd əmiri ləğəbışon noe.Əbu Muslim bə ğudrəti rəsyero ıştə rəğib Əbu Sələmə bə ğətl rosney fiikədə be  və nəhoyətədə həm ıştə ım fikış icroş karde.Əbu Sələmə ki,ıştə maqi bənav dərəsəbe ki,əv bə  ğudrəti təşnə bıə kəson tor eqıniyə, əve peşmon be və bə ın fik dəşe ki,xilofəti Ali-Əbbosiku bıstəno və bə Ali-Əbutolıbi oqordıno.bəçəy xoto de noməon vardə ğasidi vositə bo İmom Sadıği(ə),Əbdullah ibn Həsən iyən Umər ibn Əliyyibni Həsəni bə Mədinə qıləy noməş vığandeşe və bəy voteşe ki,sıftədə çı həzrəte İmom Sadıği(ə) palu bışi.əgər ə həzrət həmonə noməş oj karde,əmandə dıqlə nomə poəkə, şodə.ehanə ğəbulış nıkarde,Umər ibn Əliyyibni Həsən ibni Əli palu bışi.əmmo,İmom Sadıği(ə) çı Əbu Sələmə noməş nıhande sutuneşe və hamyeşe ki,əv  bə cokəson tabeye.peşo çı Kumeyt bin Zeydi şeriku i misraş hande:otəşı pekarde,əmmo cokəson çəy nuriku okoşon doe.ezımı cəmı karde,əmmo çı cokəsi rismonisə rukarde və cokəs cəm bıkarde və bəbarde”.....

Əbu Sələmə vığandə ğasid dıminə noməş çı Əbdullah Məhzi palu bardeşe.əmmo əv  bə İmom Sadıği(ə) əks çın noməku vey şo və xoşhol be.peşo noməş deştə bardeşe və bə İmom Sadıği(ə) məhzər səe və voteşe:ım çı Əbu Sələmə noməy ki,bomı nıvıştəşe və vığandəşe.çəmə qırd şiəyon Xorasanədə hozzın ta xilofət iyən viloyəti bəmə oqordınon və mıku tələbış kardə ki,ım ko çəyku ğəbulkom.məşhurə ənıvışt Məsudi nıvışteydə ki,İmom Sadığ(ə) bəy voteşe:”Xorasani millət keynəku ıştı şiyə bıən ki,votedəş ki,çəmə şiəyon nıvıştəşone?aya tı Əbu Muslim bə Xorasanı vığandə?aya tı çı Xorasani millətiku ikəsi zıneydəş? Əbdullah jıqo sıxani məsey çəş kardedə nıbe,norohət be və ıştəku qıləy cəsorətış pəydu karde və bə ə həzrəti voteşe ki,tı ım sıxanon bəştə həsodət iyən pəxıləti xoto votedəş.İmom Sadıği(ə) bəy hamyeşe:bə Xıdo ğəssəm ki,mı ğərəz xeyrxahəti coqılə nəzəm ni.jıqo hərəkəton bəştı məsləhəti ni və tı bə hiç qıləy nəticə nibərəse.peşo ə həzrəti hamyeşe:Əbu Sələmə həmonə nomə ki,botış vığandə,bomış həm vığandə. əmmo az həmonə nomə nıhande əvım bə otəşi dıləm şode.Əbdullah Məhz tiki həm vey norohət be və çı İmomi(ə) məhzəriku xaric be.....

Bəhs bıə çi çımiku hikoyət kardedə ki,bə Əbdullah Məhz iyən bəçəy fərzəndon əks ki,bə ğudrəti qıləy səthi nəzə soyb bıey iyən bəy təşnəti dəlili xoto,bə Bəni-Haşımi ziyodə umuşon hestebe.İmom Sadığ(ə)deştə nığılə siyosi nəzə çok-çoki zıneydəbe ki,Peyğombəri(s) amu Əbbosi fərzəndon de duyə şuoron ğərəz bə ğudrəti rəsey co hədəfışon ni və bo Əhli-Beyti(ə) çərçivə mıdofiyəro və İslomi hifziro hiçvaxti qıləy ko nibəvindeyn və bə həmonə dəlili xoto əvon bə ğudrət və ixtidori rəseyədə,ıştə bənə Əbu Muslimi bıə muzduron,bəlkəm ıştə qırd mıxolfonışon ğətlı-am kardeşone.İmom Sadığ(ə) de qıləyt muşkili dimbədim oməbe və çı dıqlə roy piyo ğərolış qətəbe.nə çəvon kardə koon təsdığ kardey zıneydəbe və nə bə bəfodorə duston nıbey xoto ğıyom kardey zıneydəbe ta çı xilofəti ləğomi bə dast bıstəno......