Ilahi rəhbəron-151

Ilahi rəhbəron-151

Qıləy ruj qıləy fərd bə İmom Sadıği(ə) məhzər şərəfyob be və voteşe:ehanə yəhudiyon umum millət bəştə alimon kur-kuronə təğlıd kardey xoto bə mızəmməti məruz bımandon,umum mısılmınon həm həmonə ko kardedən və ıştə alimonku təğlıd kardedən.çən,çəvon miyono çı qıləy farğ heste?.həzrəti hamyeşe:yəhudiyon umum camaat ıştə alimon zıneydəbin və xəbəşon hestebe ki,əvon du votedən, hərom hardedən,rışvə seydən və Xıdo hukmon əvəz kardedən.əgər de ikəsi deşmınətikon çəy həxı zay və poymol bəkardeyn və ehanə de qıləy fərdi dustiyəti rabitə bərpokon,əy mıdofiyə bəkardeyn.həzrət həmçinin bəştə sıxanon dəvom doşone və peşo hamyeşone:umum yəhudiyon deməkə ki,ıştə alimon qırd yavə xıslətonku aqah bin,əmmo bəştə kur-kuronə təəssıbi xoto bəştə alimon sıxanon pemandedəbin və bə həmonə dəlili xoto,Xıdovəndi tərəfiku mızəmmət beydəbin.peşo hamyeşe:əgər umum mısılmınon həm bəştə fəğihon kur-kuronə təğlıdkon,bənə yəhudi umum milləti İlahi tərəfiku bə tejmət iyən mızəmməti məruz bəmande.....

Bın surətədə mumkine çın sıvoliku bəhs bıbu ki,de bə təğlidi əsl və prinsipi rəğmən,çı camiyə və milləti təklif iyən vəzifə çiçe?.beşək har qıləy zəminədə bə qıləy koşınos iyən eksperti təğlid kardey,qıləy ağımandə koye.əmmo, boştə əsosinə ehtiyocon bərtərəf kardero hiç qıləy təhğığot nıbardə holədə bəy ovardkəmon?.yaan ki,de qıləy mutaliyə iyən təhğığoti və çı etımod iyən xotırcəməti bəpeştə bəştə vıjniyə iyən etımdo kardə eksperti təbəiyyətkəmon və pemandənon?.İmom Sadıği(ə) bo təğlidi ləyoğətışon nıbə alimon nəfy iyən inkor kardey bədiqə, etımodin iyən dindorə alimon sıfətonış aşmarde ki,millət bəpe bəvon təğlıdkon.ə həzrət ın dastə fəğihon jıqo təğdım kardedə:”əmmo fəğih bıə kəson,ıştə tuğyongərə nəfsi ləğomi bəştə dast qətedən və İlahi dini hərim iyən sərhədon nığo bıdo və ıştə nəfsoni tələbon mığobilədə bə İlahi fərmonon itoətkon.bın surətədə(çı milləti kutlə dini iyən ağli vəzifə tələb kardedə ki, boştə təklif iyən vəzifə ruşin bıeyro) bəvon təğlid iyən təbəiyyətkənən.peşo həzrəti oxoyədə əlovəş karde:”əmmo alimonku qıləy kamə dastə heste ki,bə jıqo xısusiyyəton soybin”.....

Jıqo əsosinə rahnumaon fəğət bə İmom Sadıği(ə) əsri məxsus ni,bəlkəm bəpe həmmə zəmon iyən məkonədə çı mısılmınon dığğəti mərkəzədə ğərol bıqəto.bəçəy əsos çı İmom Sadıği(ə) tərsim kardə və kəşə həmonə xəttı-məşy çı yəhudi iyən nəsara kali alimonku ki,boştə mənfəəton təminro çı dınyo istikbor iyən imperiyalistə ğıvvon xıdmətədən,şiyə iyən əhlı-sınnəti kali ıştəni bənə alimon nışon kəson həm ıştə dınyəvi iyən həvaye-nəfsi mınfəəton dumon.

De qıləy co bəyoni İmom Sadığ(ə) bə əbbosi iyən əməviyon miyono bıə ğudrəti canqi daxil nıbe və həmçinin bəştə bəəfodorinə duston nıbey xoto ğıyomış nıkarde.əmmo bə ıştə bənav bıə İmomon iyən İlahi rəhbəron mıştərəkə xətti-məşyi əsos,hiçvaxti xilofəti məğami ğəsb kardə ğsbkoron mığobilədə orom nımande və deəvon mıborizə bardey koyku dastış nıkəşe......

Bə qıləy nəğli əsosiruj mənsur əbbosi ki,İmom Sadığ(ə) ıştə imoməti zəmoni da sorış çəy mıosir be,bo ə həzrəti xəbəş vığande ki,boçi bəçəmə saray şıe-omey kardedəniş?.İmom Sadıği(ə) xəbəş vığande ki,nə əmə çı dınyo zər-zibo əhlimon ki,boəmon ıştıku qıləy bəhrə bobəmon  və nə  tı çı axırəti əhl niş ki, boəmon ıştı kəno boştə axırəti qıləy azuğə zəxirəkəmon.mənsur əbbosi nez iyən saray odəmonku qıləyni votedə:qıləy ruj iqlə muçək çəy dimisə nıştə be,əvış deştə dasti tojneşe.əmmo həmonə muçək ijən ome və mənsuri ijən əvış tojne.nəhoyətən əv oqıniye və bın miyon İmom Sadığ(ə)  ome daxil be.mənsuri dəparseşe:Xıdovəndi boçi muçəkış ofəyə? İmom Sadığ(ə) de oşkoə formə hamyeşe:”bəçəy xoto ki,ıştəni qərdəni pekırnəkəson deçəy vositə zəlilko”......