İlahi əsma

İlahi əsma

Xıdovəndi nomonku qıləyni həm Şəkuri isme ki,bə şukri kəsrəti iyən dəvoməti dəlolət kardedə.şukr luğətədə ğədrdonəti iyən həxşınosi mənoədəy.bə Xıdovəndi ğədrdonəti bın mənoədəy ki,hiç qıləy salehə əməli bemıkofot və beəcr haştedəni.Şəkurə Xıdovənd çəy bandəon həxə royədə qəm və ğədəm şodə,ıştə nəfsi piyo ko kardə və qınoku bə diyəro mandə mığdorədə,əvoni bəştə lutf iyən neməton şomil bəkarde və əvoni bə təşəkkur iyən ğədrdonəti loyığ vindedə.həlbəttə ğəti iyən beşəkkə çi ıme ki,hiçkəsi həxış ta Xıdovəndiku qıləy təşəkkur iyən ğədrdonəti tələb və çəşko.əmmo eyni holədə mehribonə Xıdo ıştə bandəon çokə əməlon inev ıştə həxədə qıləy ehson zıneydə və bəçəvon əməlon mıkofoti şukr nomış noə. Xıdovənde-Xalığ İnsoni mıborəkə surə 22-ə şərifə ayədə bə əbror iyən çokə ko soybon xitob kardedə və bənə ğədrdonəti iyən təşəkkuri unvoni hamyedə:”innə....ın bemisl iyən  dıjdə neməton şımə əməlon mıkofote və həxə fərmoni itoəti təriğ və roəyədə şımə səy və cəhdon məğbul iyən məşkure”.Xıdovəndi ım mıjdəvoni,qıləy vey barz iyən bəpeyə neməte ki,əy təsəvvır kardey bəbe.....

Şəkurə Xıdovənd ıştə bandəon qırd məxfi iyən oşkoə çokə niyyət iyən əməlonku komilə surətədə aqahe və çəvon çokə niyyət və əməlon mığobilədə bəvon təşəkkur kardedə və ğədrdonəti kardedə.həlbəttə Xıdovəndi Şəkurəti bın dınyoədə təcəlli pəydu kardeysə həm vey,ğıyomətədə oşko və məlum bəbe.bə zəmon ki,bo məhdud iyən vey hırdə ibodəton xoto ki,həyğətədə çı insoni vəzifə bıə,əbədiyə neməton baxşeydə.çoko ki,Əlhağğə mıborəkə surə 24-ə şərifə ayədə hamyedə:”Kulu....bəhənən iyən peşomənən, nuş bıbı boşmə,bəşmə dəvardə rujonədə kardə əməlon xoto”...

Bandə tərəfiku bıə şukri de Xıdovəndi tərəfiku bıə şukri ziyodə farğış heste.çı bandə şukr həxşınosi iyən təşəkkuri mənoədəy.şukri ım nev seqlə zıvoni,ğəlbi iyən əməli holətış heste.zıvoni şukr de təsbihi şık kardey,bə neməti doəkəsi ğədrdonəti kardey və deçəy sıtoyişi mşğul bıeye.həyğətədə,zıvoni şukr ım məno bə yod dənoydə ki,çəmə çiç heste Xıdovəndi tərəfikuye və bəpe əmə bəy ğədrdonəti bıkəmon və de çokə formə çəyku oko bıdəmon.de zıvoni şukri əmə bəpe bəştə yod biyəmon ki,Xıdovəndi bəmə doə har qıləy nemət,bəpe çı səhihə royku və de mınosibə roy çəyku istifodə kardey bıbu ta çə həmonə neməti təsir iyıən bərəkəton dınyo iyən axırətədə oşko bıbu.ğəlbi şukrədə insoni daxil bəy baxş kardə bıə neməti bə yod kardedə və Xıdovəndi bəy əto kardə çın neməton mığobilədə çəy xuzu iyən xuşuş ziyod beydə.

Əməli şukrədə qıləy şukrəkə bandə səy kardedə ta Xıdo bəy doə neməton bo ibodət iyən itoətiro qıləy vəsilə ğərol doydə.de qıləy co iborəti qırd ım neməton bo insoni həlolə royədə oko doeyro ofəyə bıə. həlbəttə,çoko ki,zıneydon Xıdovəndi bə insoni şukri qıləy ehtiyociş ni,bəlkəm bəy təşəkkur iyən dığğət kardey,bə insoni ruşd iyən ozavziye boyis beydə.çoko ki,Luğmani mıborəkə surə 12-ə şərifə ayədə hamyedə:”və ləğəd....əmə bə loğmani hikmət domone(və bəy votemone:)Xıdo şukri bə vırə bıroson.və hakəs şukrko.çən fəğət boştəş şık kardə.və əkəs ki,(bə Xıdo neməton)kufrko,çən həyğətən,Xıdovənd beehtiyoc iyən bə tarifi loyığe”.