Aşurə,Həx iyən botıli simvol

Aşurə,Həx iyən botıli simvol

Imruj çı Məhərrəmə manqi daminə ruje.Hicri-Ğəməri 61-ə sori Aşurə rujiku i həzo se sa həşto dı sor dəvardedə.dınyo noxəş və təbış heste.ım dıminə sore ki,İmom Huseyni(ə) əzodorəti mərosimon bə Koronavirusi pandemiyə iyən səhiyyəvi protokolon rioyət kardey dəlili xoto,məçit iyən təkyəonədə bə vırə rosney beydəni.çı millətiku tələb kardey bıə ki,kutləvi surətədə bə iynade sə cəm nıbon.

Millət ozodə həvo iyən sferadə və ojə məkononədə de nohə handey iyən əzodorəti mərosimon məşğul beydən.Huseyni əzodorəti mərosimonədə insonon de bəştə dimi maskə jıey,təbl və zəncir jeydən.kuçə və xiyobonon de siyuə parçəon puşniyə bıə və çı şəhri har vırədə de İmom Huseyni(ə) sıxanon dərostə bıə.məddohon və rozəxanon çı xiyobonon ətrofədə de nohə iyən mərsiyə handey koy məşğulin.jıqo bızın ki,ısəte Xıdovəndi oxonə peyğombər həzrət Muhəmmədi(s) nəvə və çı insonon miyono həmməysə pok iyən şucoətinə şəxson yəni həzrəte Əli(ə) iyən həzrəte Fatmə(s) fərzənd Huseyn ibn Əli(ə) bəştə əsri bədxahon sıtəm iyən cəholəti ğıbon be.....

Aşurə ruji Zuhru vaxtiku tikəy dəvardəbe və həşi bəştə çı xuni ranqış qətəbe.İmom Huseyn(ə) ki, çı peyğombəri(s) mahbubə şəxs və çı vəhışti əhli cıvonon sərəvər və əğəy,ısət bə beşərəfə deşmınon mıhosirə eqıniyə.İmom Huseyn(ə) oxonə kərə deştə xıyzoni vidoş karde,ıştə nuyəzandə hırdənış bəştə vanqoş qəte və deştə daston əvış bəpeş rost karde ta bo həmmə kəsi huccəti təmomko ki,az bın royədə hətto ıştə qədə fərzəndım deştə bə ico vardeme.əmmo sığə dılə deşmın tiyış bə həmonə hırdəni xılxi səmt ğandeşe.İmom Huseyn(ə)de sutə dıli ıştə fərzəndi sıə xunış deştə daston bə osmoni səmt peşandeşe və və çıə Xıdovəndiku piyeşe ki,Əv ım ğıboni ğəbulko.

Saxtə ləzə və anon dəvardedəbe,əmmo İmom Huseyn(ə) çanədə bə şəhodəti məğami nez beydəbe,çə həzrəti çehrə ziyod dəvəşedəbe və çə həzrəti vucud de Xıdopərəstəti iyən eşği pur beydəbe.jıqo caqn kardedəbe ki,jıqo bızın Əliyyibni Əbi Tolıbe.həmonə şucoət və dılavərəti.ə həzrəti ıştə oxonə nımojış çı tiy və nizəon jiyədə bərpoş karde və ısət həm çəy yaro-yavəron bə şəhodəti məğami rəsən,ə həzrət canqi meydonədə yali və coyli mandə..ğəflətən zərğə ibn şərik qıləy zərbəş bə həzrəti çəpə dast iyən ami varid kardeşe.İmom Huseyni(ə) ıştə zu və ğıvvəş çı dasto doəşbe və de ziyodə zəhməton və əziyyəton ıştə asbiku bəsə zəminisə eqıniye.əmmo çə həzrəti ubuhət və əzəmət qıləy həddədə be ki,çı deşmıni ləşkəriku hiçkəs bo ə həzrəti şəhid kardero bə nav dəşeydə nıbe.hiçkəsi curətış nıbe ki,boy çı Xıdo-Rəsuli(s) fərzəndi sə bıbırno və çəy bədəniku coko.

Ağıbət və koy oxo ımbe ki,qıləy berəhm iyən sığədılə fərd de şımşi bə İmom Huseyni(ə) mıborəkə səş qıləy zərbəş enovne.şımşi İmomi(ə) sədə bıə dəbilğəş poə karde və bə ə həzrəti mıborəkə sə rəse.xun çı İmom Huseyni(ə) sədə cari be.əmmo təəccıbinə ko ıme ki,bın ləzədə İmom(ə) deştə pərvərdıqori liğa və vindemoni eşği mınocatış karde və voteşe:İlahi! Bəştı roziyəti rozim və bəştı əmron təslimim.yəzidi ləşkəri sərkərdə umər s`əd fəryodış kəşe:vay bıbu bəşmə!ıştə asbonku etatənən və Huseyni(ə)ko təmomkənən və bə oxo bırosnənən. Sinan ibn anəs ıştə asbiku etate və çı İmom Huseyni(ə) səy sape mande.peşo ıştə şımşiş noşe çı İmom Huseyni(ə) xılxisə və voteşe: bə Xıdo ğəssəm az ıştı sə ıştı bədəniku co bəkardem.qıləy holədə ki,zıneydəm ki,tı çı Xıdo-Rəsuli(s) fərzəndiş və ıştı pı-mo çı zəmini dimisə bıə şəxson həmməysə çokə qıləynin.

Osmoni bəştə siyuə ranqış qətəbe.həyğət bəsə nizə piyo ğərolış qətəebe.İmom Huseyn(ə) de tşnə lıvon  Kərimə-Ğıroni ayəon zumzumə kardedəbe və çı Aşurə dıjdə ğəhrəmonətiş bə ovc iyən barzə həddiş rosne....