Kərbəlo əsiron,həyğəti mesaji vardə kəson

Kərbəlo əsiron,həyğəti mesaji vardə kəson

Hicri-Ğəməri 61-ə sori Məhərrəmə manqi həşi qıləy holədə ğurub kardəbe ki,həyğiyə həşi bəsə zəminisə eqıniyəbe.İmom Huseyn(ə) ki,bəsə Xıdo-Rəsuli(s) amisə vırəş hestebe,ısət de nizə,tiy iyən şımşiyon vositə poə bıə bədənış bəsə kərbəlo zəminisə eqıniyəbe,mandəbe və jıqo bızın har qıləy poə bıə vırəku bə osmon qıləy nur rost beydəbe.qıləy nur ki,torıxi dırozi ıştəni nışon doydə və bəşəriyyəti çı bexəbəti iyən  ğəflətiku oğo kardedə və əvoni bə həyğət iyən əbədiyyəti səmt vanq jeydə.umər s`ədi sığə dılə ləşkər zınedənıbin ki,de İmom Huseyni(ə) kıştey Xıdo-Rəsuli(s) nəvə bıə Huseyn(ə) iyən çəy yaro-yavəron əbədi bəkardeyn...

 İmom Huseyni(ə) şəhodəti bəpeştə çı kaftorsıfəton bə ə həzrəti xeyməon səmt bıə hucumon bino be.əvon bənə məst iyən vəhşiyə məxloği bə İmom Huseyni(ə) xeyməon tərəf həmləşon karde və xeyməon ğarət kardey bədiqə.bə həmonə xeyməon otəşışon je.jenon iyən hırdənon de bəmə-şivəni çı xeyməonku xaric beydəbin.bın zəmonədə həzrəte Zeynəb(s) çı hırdənon,co jenon və həmçinin həmməysə muhim  ıştə zəmonə imom yəni çı həzrəte İmom Səccodi(ə) vəzyətiku norohət və niqəron bıə holədə be bın tərəf-bə tərəf hərəkət kardedəbe.ə həzrət çı noxəş və zəyifə bədənış bıə İmom Səccodi(ə) kıştey vəyış qəte və bın tərəf-bətərə vitə holədə otəşi çı hırdənon dovnəku hamuş kardedəbe və əvoni bəştə ağuşi dəkırnedəbe.həzrəte Zeynəb(s) çı qıləy jeni ğamətədə bıə qıləy band-ku be və zıneydəbe ki,həni çı hərəmi əhl çəş bə həzrəti Əli(ə) kinə Zeynəbiİ(s) səmt xıyə bəbe

Otəşi xeymənonış sutunəbe və  vo çəy xokonış bə Kərbəlo şəhidon cəsədiş rosnəbe.xeyməon ğarət bıə ,jenı-kinon quşvə və ziynıt əşyoon ğarət bıə və çəvon quşonku okorney bıə və bəzi quşonku xun emedəbe.həmməkəsi vucudi tarsi dəqətəşbe.çiç bəçəvon sə oməbe.jenon deştə ğəmqinə çəşon bə şəhidon erəxeydəbin.həmonə besə iyən xuninə bədəmon  çəvon həmməysə çokə himoyədoron bin.ki,ısət becon bəsə zəminisə eqıniyəbin. əvon bə Furati ru nəzə kardedəbin və Əbbos ibn Əli(ə)-şon bəştə yod dənoeşone ki,çı Hərəmi pərçəmdor,çı ğeyrət iyən alicənobəti simvol be və həmonə həmlə kardə kaftoron hətto çəy nəzəku həm tarseydəbin.ğəflətən çın siyusə dılə ləşkəri sərkərdə umər bin s`əd əmr kardedə ki,jenon iyən hırdənon və həmçinin həzrəte İmom Səccodi(ə) nimə sutə xeyməonədə vırəbəvırəkon və bın zəmone ki,həmməys saxt və çətinə ləzəon bo İmom Huseyni(ə) Hərəmi bino beydə....