İlahi rəhbəron-191

İlahi rəhbəron-191

Əbbosi xəlifə mutəvəkkil ım həyğəti dərəseydəbe ki,bo milləti çı Əhli-Beytiku(ə) bə diyəro kardero oko doə bıə de qırd ım hiyləon bə ico,rujbəruj çəvon mahbubiyyət və nufuz çı milləti miyono ziyod beydəbe. əve bənə məmuni ki,İmom Rızaş(ə) Mədinəku bə Mərv vardeşe və metəsimi həm İmom Cəvadış(ə)  bə Bağdad vardeşe,əv həm İmom Hadiş(ə) bə Samirraş vardeşe.əmmo ım həyğətış çı viro beklarde ki,bənə ıştə əslaf və əjdodon İlahi tədbiron mığobilədə mandey və istiğomət kardey nibəzıneyn və İmomi(ə) mahbubiyyət ki,İlahi məşiyyət və irodəku bə əməl omeydə,çəy vəy bıqəto.boçımi əsos nəyinki,çı milləti bə İmomi(ə) bıə məhəbbət və nufuz ziyod beydəbe,bəlkəm torıxi sənədon nışopn doydə ki,qahi vaxti çın nufuzi təsiron saray əhlədə həm ıştəni nışon doydəbe və çı hukuməti barzə məğamsi soyb bıə məsul şəxson bə ə həzrəti qıləy eşğ və məhəbbətışon hestebe.min cumlə çəvonku bə ərəbi məşhurə şayir və ədib bıə İbn Sikkkiti işorə kardey bəbe ki,əv çı mutəvəkkil əbbosi fərzəndon mellim və tərbiyə doəkəs be…

Qıləy ruj mutəvəkkil əbbosi bəştə dıqlə fərzənd yəni bə mu`təzz və muəyyədi işorə kardə holədə İbn Sikkitiku dəparseşe ki,ıştı palu çımı ım dıqlə vey mahbube ya Həsən(ə) iyən Huseyn(ə)? İbn Sikkit ki,hissış karde ıştə pok və sadiğonə atifə və hisson niyon kardey nibəzıne və zıneydəbe ki,çəy bə Əhli-Beyti(ə) eşğ və məhəbbət deçəy coni ğeyməti obərəxe,bilofosilə cəvobış doe:həzrət Əli(ə) ğulom Ğəmbər həm bəsə tı iyən ıştı dıqlə fərzəndisə bomı vey mahbube.mutəvəkkil ki,jıqo qıləy ğətiyyətin və oşkoə cəvobi çəş kardedə nıbe,bənə zəxm hardə mori aşuftə be və bəyənde qıniye və rəyrə əmrış karde ki,çəy zıvoni çəy xılxiku bıkəşon,bekon.de ın tərtibi həmonə şərofətin iyən şucoətinə ğəhrəmon penco haft sinnədə bə şəhodəti barzə məğami noyil be….

İmom Hadi(ə)  nufuz iyən mahbubiyyıətiku de şiddəti tarsə mutəvəkkil dayima bın fikədə be ki,de qıləy bəhonə bə ə həzrəti şəxsiyyəti qıləy zərəl bırosno.əhlı-sınnəti yolə alim bıə İbn Cuzi nıvıştedə:iruj bə mutəvəkkili xəbəşon doe ki,İmom Hadi(ə)  mənzil və kədə I mığdor siloh,nomə voqlə çiyon mevcude ki,çə həzrəti şiəyon tərəfikuboəy vığandə bıə və İmomi(ə) ğəsdış heste ki,bə hukuməti ələyh silohinə ğıyom ənvom bıdo.mutəvəkkil ki,jıqo qıləy fırsəti çəş kardedəbe,bilofosilə bəştə muzduronku I qrupi əmrış karde ki,ğəfləti surətədə bə İmom Hadi(ə) mənzili daxil bıbon və əyo mevcud bıə qırd sənədon bınəvon, pəydukon və deştə bə saray biyon.xəlifə məmuron bəşəvnəy bə ə həzrəti kə hucumışon karde,əmmo çanədə həm nəvin qıləy çişon pəydu kardey nızınışone.əvon fəğət ımışon mışohidə kardeşone ki,İmom Hadi(ə)  qıləy otağədə de paşmə oləti bəsə hiç qıləy xolçəş nıbə zəminisə nıştə və de Kərimə-Ğıroni tilovəti koy məşğule.əvon ə həzrətış de həmonə holi mutəvəkkili palu bardeşone və izhor kardeşone ki, çəy kədə hiççi pəydu nıkardeşone.həmonə məmuron voteşone ki,əmə fəğət mışohdiə kardemone ki,əv və bə ğıblə nıştə və deştə pərvərdıori razo-niyozi koy məşğule…..

İ tərəfiku məğlubiyyət hiss kardə və co tərəfiku həm çı İmom Hadi(ə) əzəmət və heybətiku bə vəcd omə  mutəvəkkil be ixtiyor bə ə həzrəti ehtıromış noe və əvış təkrim kardeşe və ə həzrətış ıştə kənoəyədə nıştovnoşe.əmmo I mıddət bədiqə de benəhoyətə behəyoəti iyən beabruəti ıştə dastədə bıə şərovi piyoləş bə ə həzrəti təklifış karde.İmom Hadi(ə)  çəy ım behurmətəti mığobilədə de ğətiyyəti ğəssəmış harde ki,çımı qujd iyən xun çın nopok və şəytoniyə çiyku bədiyəroe.əmmo mutəvəkkil ki,ıştə məstı-xumorəti barzə səviyyədə be,çə həzrətiku tələbış karde ki,boəy şeyr bıhando.həzrəti hamyeşe:mı jəqo həm şeyrım hifz kardəni.mutəvəkkili İmomış(ə) təhdid karde ki,hukmən bəpe bıhando.İmom Hadi(ə)  noçorən ım şeyrış ğiroətış karde:”şahpn bandıku ğulləonsə şəvi ruj kardedən.qıləy holədə ki,zumandə merdon əvoni nığo doydən.əmmo ğulləon əvoni çı maqi xətəriku ozod kardey nızıneşone.əvon çandə mıddət izzəton bəpeştə ıştə əmnə məğamonku saru kəşey bin və quronədə ıştə conışon doe.çı yavə və bəxoş nıomə mənzil və vırəy.bə zəmin dəspardey bəpeştə fəryod jıəkəs vanq bəjəne: