İlahi əsma və nomon.

İlahi əsma və nomon.

Mucib de Xıdovəndi nomi unvoni har qıləy zəmon iyən hakəs əy bıpyişe,əv bəy cəvob doəkəsi mənoədəy.qıləy cəvob ki, bəçəy həkimonə hikməti əsose.qıləy kərimonə cəvob.ım şərifə nom 1 kərə Hudi mıborəkə surə 61-ə şərifə ayədə omə.joqo ki,hamyedə:”fəstəğfiruhu....çəyku baxşeşi tələbkənən,peşo tobəkənən,çımı pərvərdıqor nez iyən icobət(ğəbuləkəy)”.həmçinin Mucib cəmi surətədə Mucibun Saffati mıborəkə surədə omə:”vələğəd.....Nuhi əməş vanq je.əmə çı çokə icobətəkəmon”.......

Mucib “Cubi” rişəku və bırniye,dırniye mənoədəy və həmçinin bə kəlomi oqardemoni məno və çə kəlomi cəvobe ki,dıli nığılə vırəku dəvardedə və çı votəkəsi qəviku bə muxatəb iyən məsəkəsi quşi rəseydə.bın cəhəti xoto bə Mucibi icobət və ğəbuləkə və hocəton rəvoəkə həm votedən.Cubi sıxan de mıxtəlifə formə Kərimə-Ğıronədə 14 kərə zikr bıə.Mucibə Xıdovənd dıvoəkə tələbi icobət kardedə və çə şəxsi muşiloton bərtərəf kardedə və çəy norohətçətiyon iyən iztirobi çı miyoniku bardedə və hətto inson dıvo kardey bənav ıştə fəzliku əy be ehtiyoc kardedə.Mucibə Xıdo ıştə bandəon qırd tələb və ehtiyoconku aqah və xəbədoye,əmmo əy çı insoni dıvoş ıştə deştə bandəon miyono qıləy səmimonə irtibot və rabitə basteyış ğərol doə.Bəğərə mıborəkə surə 186-ə şərifə ayədə hamyedə:”və iza səələkə.....və çun çımı bandəon çımı barədə ıştıku dəparson, (bızınonki) az bəvon nezim.havaxti ikəs mıni vanqko əy icobət.ğəbul bəkardem.çən,əvon həm çımı dəvəti ğəbulıkon və bəmı imon biyon.ğasbu ki,ro pəydukon və bə ruşd(ozavziye)bırəson”.

Kərimə-Ğıroni mıfəssır iyən təfsiərvononku qıləyni çın ayə bəyonədə nıvışteydə:bın ayədə dıvoəkə jıqo ıştə pərvərdıqori məhəbbəti jiyədə ğərolış qətə ki,Xıdovənd haft kərə bo lutfiro “ıştə “ təbiriku oko doydə.ehanə çımı bandəon çımı barədə dəparson,bəvon vuji:az ıştən bəvon nezim iyən havaxti əvon mıni vanq bıjənon ıştən çəvon dıvoon ğəbul bəkardem.çən,bəçımı ıştəni imon biyənən və çımı dəvəti ğəbulkənən”.həlbəttə ım məhəbbətamizə irtibot bəvədəy ki,inson ıştən həm bıpyişe ki,deştə rəbbi mınocotko.bə ın nuktə həm dığğət kardey lozıme ki,əgər çəmə zəyifə insonon irtibot de Xalıği ğət bıbu və Xıdovəndi dığğət kardey nıbu,bəvədə hukmən əmə bə həlokət bərəsemon.liza de Xıdovəndi ittisolvə rabitə bo muminon vey zəruri qıləy koye.Furğani mıborəkə surə 77-ə şərifə ayədə sərif iyən oşko Xıdovənd bə İslomi-Peyğombəri(s) hamyedə: ”ğul ma yə`bəikum.....peyğombər bə milləti vuji əgər dıvo nıkon,Xıdovənd(həm)bəşmə dığğət nibəkarde”.binobərin dıvo iyən razo-niyoz qıləy neməte ki,Ğadir iyən Zumandə Xıdo ki.qırd hestemoni aləm çəy ğəbzə və ğudrəti dastədəy,bəməş doə ta əmə deəy qıləy səmimonə nəcvo və irtibotımon bıbu və ıştə ehtiyocon çəyku tələbkəmon ta çəmə ruf mutəali iyən barz bıbu və çı oxonə ğurb iyən kəmoli məsir iyən royədə ğərol bıqəto və bın royədə hərəkətko.......

Mucibud-Də`vatə Xıdovənd yəni dıvoon icobət və ğəbuləkə.liza hiç qıləy dıvo və tələb becəvob nibəmande.ımi həm zikr kardey lozıme ki,hakəs ki, dıvo tovfiğ iyən ovandəti pəydu kardey bızıno,ımi nışon doydə ki,Xıdovənd bəy bo dıvo kardeyro inoyətış kardə və ım ıştən bə insoni dıvo həmməysə çokə cəvobe.çən,dıvo ğəbul beyədə iminə qəm bo mınocot iyən de Xıdo rabitə bastey iyən sıxan voteyro bıə tovfiğ iyən ovandəti pəydu kardeye.