De Həzrəte Zeynəb(s)-i bəvoti mınosibəti məxsusə bərnomə

De Həzrəte Zeynəb(s)-i bəvoti mınosibəti məxsusə bərnomə

Əzizə əməson bə şımə xıdmət səlom ərz kardedəm,

Mehribonon ımruj Hicri Ğəməri Rəcəbə manqi 15 minnə ruj, Bəni Haşımi Əğilə, Həzrəte Fateməye Zəhra(s) və İmom Əli(ə)-i kinə və İmom Həsən(ə) və İmom Huseyn(ə)-i hovə, Həzrəte Zeynəbe Kubra(s) rehlətə ruji sorəqardışe. Im qıromiyə xanımi rehləti sorəqardışi bə şımə xıdmət təsliyət ərz kardedəm.

Əzizon (çıme dıli nimə) qıləy kitobi nome ki İslomi mıtoliəon mərkəzi katolik kişiş, Doktor Kristofer Kelohsi əy nıvıştəte, ım kitob Həzrəte Zeynəb(s) barədəy, ım bərnomədə bə ım kitob və çəy mıhtəvo diyə kardedəmon.dəvət kardəm dəmə bə ico bımandən.

Bəle əzizon jəqo ki həmme zıneydəmon, Zeynəb(s) bənə ıştə inə həzrəte Zəhra(s), hicobədə, iffəti həşi be iyən qıləy muğavimə jen be ki ıştə bıvə Həzrəte İmom Həsən(ə)-i səbri bə irs bardəş be və bənə ıştə Dədə Həzrəte Əli(ə) deştə sıxənon vositə, du və təzviri bə kəno jəş be.

Vaxti İmom Huseyn(ə)-i pokə bədəni Zenəb(s) çəşon vədə tikə tikə  kardışone, və ə Həzrəti jəqo dəhşətin şəroyetədə şəhid kardışone, Həzrəte Zeynəb(s) ıştə sə bə osmon rost kardışe və votışe: xıdo, ım ğıboni çəməku ğəbul bıkə.

Zeynəb(s) qıləy arifə be ki jimoni həmmə saxtion və muşkilaton vədə həmişə bə ilahi təğdir, səbr əki və ğoyim be iyən Xıdoku ğədrdonəti kardedə be. əv Kərbəlo yolə hadisə bəpeşt, Xıdo Rəsul(S)-i nəvvə Həzrəte İmom Huseyn(ə)-i məzlumə mesaji bə dınyo quş rosnişe və de İmom Huseyn(ə)-i xuni ğətrəon, tarixi ranqış karde.

Həzrəte Zeynəb(s) Kərbəlo ğəhrəmonəti və İnsoni həmmə kəroməton və fəziləton nışonə be.

Həzrəte Zeynəb(s) Aşura dəhşətinə hadisə bəpeşt, de mandə jenon və hırdənon bə ico de Yəzidi ləşkəri tərəfo əsir be.

Aşuraədə Həzrəte Zeynəb(s) mısibəton iyən muşkilaton, iyən ə Həzrəti əsirəti rujon, Kufə hakim, İbne Ziyod və Dəmeşğədə Yəzidi iclosonədə, bə hıç kəsi niyon ni. Isət nəfəğət mısılmonon bəlkəm co dinon tərəfdoron həm bə Həzrəte Zeynəb(s) mislış nıbıə şəxsiyəti iyən ım Xanımi səbri meylışone, əcumlə çəvonku məsihiyə kişiş papa Doktor Kristofer Kelohsie, çəy əsər ki əv Həzrəte Zeynəb(s) barədə nıvıştəşe, (çıme dıli nimə) nomo bıə kitobe.

Kristofer ım kitobi nomi vıjniye barədə votəşe: Həzrəte Zeynəb(s) Kərbəloədə ıştə con yənı ıştə bıvə Həzrəte İmom Huseyn(ə)-i dastiku doəşe, ım ğəm jəqo be ki əv Kərbəloədə ıştə dıli nimə bə Xıdo aspardışe, bə çəy xoto ım kitob (çıme dıli nimə) nom noə bəy.

Tosə bə ısət Həzrəte Zeynəb(s) və çəy şəxsiyət iyən fidokorətion barədə qıləy ğeyre mısılmon, hiç qılə kitobi nıvıştəş ni və ım kitob həminə mıvzo barədə iminnə qıləy.

Muğəddəsə papa Kristoferi kitobi nıvıştey macəra həm vey colibe, əv voteydə: əmə Romaədə islami və ərəbi mıtoliəon ostadonku qıləyni bimon, dıyande sıhbət əkimon ki boçi mısılmonon çı islami təsirinə jenon barədə qıləy muhimmə kitobi nıvıştəşon ni?

Im be ki əmə bə ğərol omimon har kəsımon islami i qılə yolə xanımon jimoni barədə bınıvıştımon. Az Həzrəte Zeynəb(s) vıjnime bə çəy xoto ki çəy inəku vey məlomatım be.

Kristofer ki bə Həzrəte Zeynəb(s) ali və mislış nıbıə şəxsiyəti tərəf cəzb bıə be, votışe: Zeynəb(s) qıləy vey heyrətomizə jen be, əv bənə Huseyn(ə) çı siyosi-dini marzonku bəpe be, əv bo həmmə qıləy diniyə simvole.

Kristofer Klohosi de Sulalə nomo bıə Rədio məsohibədə ıştə kitobi barədə voteydə: Zeynəb(s) şəxsiyət Kərbəlo hadisə ruji bənav iyən çəy bəpeştiku vey farğışe. əv kərbəlo canqi bənav, çand kərə ıştə hovəti və pokə hisson jintonədə ğəror qətəş be və çand kərə bə təziğon xoto, çəy hol-əhvol bevəcə be. əmmo Aşura rujədə şəroyet əvəz be, Zeynəb(s) 3 kərə xeyməku bə meydon omeydə. İ kərə Əli Əkbər(ə)-i şəhodəti zəmonədə, i kərə bə İmom Həsən(ə)-i hırdəni xoto ki bəştə əmo komək karde xot bə meydon omeydə be, və i kərə həm bo əvon ki İmom Huseyn(ə)-i şəhid kardey xoto bə meydon omeydə bin, məşhure ki hətto Omərebne Səed ım səhnəon vindey zəmonədə bəmedə be, hətto kali çı Əhle Beyt(ə) mıxolofon votedə bin ki Aşura rujədə Həzrəte Zeynəb(s) bənə həşi dəvəşeydə be.

Muğəddəsə papa Kristofer ıştə kitobədə Həzrəte Zeynəb(s) dışmənon vədə şəxsiyəti bənə qıləy muğavim və ğəhrəmonəti xanım zənıydə. Bəle Zeynəb(s) qıləy şucaə jen be ki kərvoni royədə, Kufə vujurədə, muxtəlifə kəonədə, İbne Ziyod və Yəzidi məclisədə, de ğəşənq iyən zumandə sıxənon vositə İmom Huseyn(ə) və Aşura əbədiyə mesaji nışo doşe. Məsələn Kufə vujurədə, qıləy şəroyet ki kali çəşon bəmedə be və kali xoşhal bin və kalion əsiron və şəhidon təmşo əkin, əmmo Həzrəte Zeynəb(s) əsiron miyonədə bənə əzəmətinə həşi be, və bənə Həzrəte İmom Əli(ə)-i xotbəonku i baxşədə hamiyəşe: aya şımə miyonədə ğərəz beədəbəti və bədnomi, dılon kin-kudorət, 2 diməti və təməloğ, zəlolət və həğorət  co çi peydo bəbe? Ya bənə havzəonin ki həyvoni nəcasətonədə şımə rişə heste ya bənə dəfn bıə cənozə ki çəy ğəbi sə de nığə dərostə bəy? Bo axırətiro çı bədə çi vığandəyone, həmonə çi ki Xıdo ğəyzin kardə və əbədiyə əzobədə bəmandion.

Muğəddəsə pap Kristofer ıştə kitobədə, Həzrəte Zeynəb(s) bənə qıləy mırd zıneydə ni, bəlkəm həğiğətən etığadış heste Zeynəb(s) qıləy jene  ki insoni barzə fəziləton soybe. Həmonə barz və erjinə fəziləton ki həm jenon və həm mırdon karde bəznın bəy dast peydo kon. əv voteydə: əmə pidəmon ni ki bıvotəmon Zeynəb(s) qıləy mırd be, nə ım vey bədə nəzə heste, əv qıləy zumand və muğavimə jen be ki həmmə insoni fəziləton ki jenon və mırdon miyono mıştərik be bə nımoyiş noəşe. sıxəni zumandəti  və beədoləti vədə sakit nımandey, Həzrəte Zeynəb(s) yolə ko be, həğiğətədə əv Əhle Beyt(ə)-i kərvoniku vey bənav hərəkət kardəş be.

Həzrəte Zeynəb(s) əsir bey zəmonədə, çəy şəvi nımoj iyən təhəccud, tətil nıbe. Riyahinoşşəriə kitobədə omə ki: Həzrəte Zeynəb(s) şəvi bəji mandey və ibodət kardeyku hiç vaxt co nıbıə hətto Mıhərrəmə manqi 11 minnə şəvədə.yəni həmonə şəv ki ıştə həmmə əzizoış dasitiku doəş be.

Kristofer Klohosi ıştə mısohibə oxoədə bə calibə nuktə işorəş karde və voteydə: karde bəznım bıvotəm ki Həzrəte Zeynəb(s)  be ım ki İmomət məğomi və qıləy İmomi ixtiyoron soyb bıbu və əsir bey saxtə zəmonədə ki İmom Səccad(ə) noxəş be, qıləy imomi həmmə xusiyəton soyb be və əsiron kərvoni Yəzidi ləşkəri zılmonvədə ləyoğətinə surəti mudiriyət kardeşe, bə çıme nəzə əsos, ım yolə Xanım, qıləy İmomi vey xusiyəton soybe və az bə çıme sıxəni bovəmandim.

Səmimi həmzıvonon bə ım bərnomə quş doe xoto şıməku təşəkkur kardedəm,dəvət kardəm de Tolışi rədio bə ico bımandən və bə co bərnoməon həm quş bıdənən.