Əbutolıb,Həzrət Peyğombəri (s) yolə himoyədor

Əbutolıb,Həzrət Peyğombəri (s) yolə himoyədor

Xosə əməson səlom, şımə ruj bə xəyr bıbu, nabənav ın şanqo Xıdo Rəsul(s)-iməbəs idə şəvi bə şımə təbrik ərz kardəm.

mehribonon ımruj Rəcəbə manqi 26 minnə ruj və bə rəvoyəti əsos, Xıdo Rəsol(s)-i yolə himoyəkə və qıromiyə amo, Həzrəte Əbu Talibi rehləti sorəqardışe, bə həminə mınosibəti xoto, ımrujnə bərnomədə bə Ğoreyşi momen, peyğəmbər(s)-i dust və himoyə əkə iyən Həzrəte Əli(ə)-i yolə dədə, Həzrəte Əbu Talibi jimon və xusiyəton işorə bəkamon, şıməni dəvət kardəm dəmə bə ico bımandən.

Əzizon, Həzrəte Əbu Talibi imoni dərəcə anədə be ki İmom Muhəmməd Bağır(ə) çəy barədə hamiyəşe: “bə Xıdo ğəssəm ki əqə Əbu Talibi imon qıləy tavzıədə ğəror bıqəti, və milləti imon həm tavzı co tərəfədə bıbu, Əbu Talibi imon, milləti imoniku bəpeye.

Həzrəte Əbu Taleb anədə fəziləti soyb be ki Ərəbi məşhurə yolə hakim “Əktəm İbne Seyfi” çəy barədə votəşe: ıştə həmmə çiyonım, çı həmmə ərəb və əcəmon Seyd, elm və ədəbi çokə natiğ, Əbu Talebe İbne Əbdullmottəlebiku umutəme”.

Əmmo Peyğəmbər(s)-i zamonədə və hamonə rujon ki har ruj, Məkkə millət vey bə İslam tərəfi cəzb bıdə bin, mışrikon ım məsələku vey niqəron əbin və har ruj bo islam və mısılon məhv bey xoto, qıləy xəbisə planon əkəşin. həminə şəroyetədə ki İslam bə qıləy ictimai və zumandə şəxsiyəti iştiroki ehtiyocış be, Əbutaleb ım məsələ barədə, ıştəni be tərəfə şəxsiyət nışo ədi. Co tərəfiku Məkkə bıtpərəston , bo ım ki de Peyğəmbər(s) vositə bıə, islami din təbliği, vəy bıqəton, ım roədə ƏbuTalibi vey bənə şəxsiyəti zıneydə bin.

Məkkə yolə şəxsiyəton bo çand minnə kərə bə Həzrəte Əbu Taleb səmti şin və çəyku tələb kardışone ki peyğəmbər(s)-i tərk ko, əvon voteydə bin: “ ey Əbutaleb, əmə tıku tələb kardamon ki ıştı bıvə zoə ım royku mınsərif bıkoş, əmmo tı ım ko əncom dodə niş. əqə Muhəmməd, ıştə dəvətiku dast peqəto, ğudrət, sərvət və məğomiku, har miğdor ki pidəşebu bə bədamon, və illa de şımə canq bəkamon.”

Əbutaleb ım sıxənon bə Peyğəmbər(s) votışe və peyğəmbər(s) həm çəy cəvobədə hamiyəşe: “bə Xıdo ğəssəm ki əqə əvon çıme rostə dastədə həşi və çıme çəpə dastədə ovşum ğəror bıdon ta az ım koyku dast bıkəşom, hiç vaxt ım ko nibəkam, və anədə bə ım ko idomə bədom, ta ya Xıdo əmr əncom bıbu və ya az ım royədə kıştə bıbum”.

Çı Peyğəmbər(s) ım təsirinə sıxənon, jəqo Həzrəte Əbu Talibi dılədə nıfuz kardəşe ki de həmmə təhdidon vucudi, bəştə bıvə zoə votışe: “ ey çıme bıvə zoə, bışi və ışı dılədə bıə çion bıvot, bə Xıdo Ğəssəm ki həmişə de tı bə ico bəmandəm”.

Məkkə bıt pərəston ki ƏbuTalibiku nomid bıə bin, bo təziği əlovə kardey xoto, mısılmonon iğtisodi cəhəto mıhiosirədə ğəror doşone. De iğtisodi sanksiya vıcudi, bo peyğəmbər(s) və mısılmononro şəroyet vey saxt bıə. həminə şəroyetədə Əbutalib millətiku tələb kardəş be ki de Xıdo Rəsul(s)-i bə ico bımandən və Əbutaleb həm ıştı həmmə mol-sərvəti Xıdo royədə xarc kardışe.

Əzizə duston,Həminə sanksiya cərəyonədə ki 3 sor dəkəşə, Xıdo Rəsul(s) deştə mislış nıbıə oroməti və səbri, ıştə tərəfdoron bə səbr dəvət əki, ta ım ki vəhy firiştə, Cebreil bə Xıdo Rəsul(s) xəbəş do ki moconəon, mışrikon miyono bıə sazışi koğəzi hardəşone və çəyku fəğət Xıdo nomi baği mandə.

Həzrəte Muhəmməd(s) ım hadisə bə Əbutaleb votışe və Əbutaleb bə Ğoreyşi yolon səmti şe və bəvon votışe: əhdnomə biənən, əvon əhdnomə vardışone və qıləy holədə ki mıhi bəy baği mandə be. ƏbuTaleb votışe: aya ım hamonə əhdnoməy ki nıvıştımone? əvon votışone: bəle, peşo Əbutaleb votışe: çıme bıvə zoə Xıdo tərəfiku qıləy xəbə səşe. əqə ım xəbə rost bıbu, şımə bəpe ım mıhosirə sə kənən, və əqə ım xəbə du bıbu, az Muhəmmədi bə şımə təhvil bədom.

Çən, Əbutale votışe: Muhəmməd(s) voteydə ki mocunə əhdnomə hardəşe. əvon votışone ki Muhəmməd du votəşe. əmmo vaxti əhdnomə vardışone və vindışone ki peyğəmbər(s) rost votəşe, həmmə təəcub kardışone, jəqo ki kali çəvonku ım hadisə mucizə zınıydə bin və mısılmon bıən.

Əmmo ım hadisəku, vey zamon dənıvarde ki Əbutaleb noxəş bıə. Əv ıştı umri oxonə saətonədə, bə Peyğəmbər(s) və çəy dini fik əki və bə ıştə hırdənon votışe: ”az Muhəmməd(s)-i sıforışi bə şımə kardəme, boçi ki əv Ərəbədə qıləy rostə əvotə şəxs və Ğoreyşi əmin və həmmə fəziləton soybe. Əv əməro ə çi vardəşe ki ğəlb əy ğəbul kardedə əmmo tıhməti tarsiku, zıvon əy inkor kardedə. Bə Xıdo ğəssəm qoya az vindeydəm ki ehtiyocinə şəxson və fəğırə odamon çəy dəvəti ğəbul və çəy sıxəni təsdiğ kardedən və əy yol qətəşone. Ey Haşımi hırdənon, əv şımə dədə zoəy, əyro koməkəkə və çəy diniro himoyə əkə bıbən, bə Xıdo ğəssəm hiç kəs bə çəy roy nibəşe, illa ım ki hidoyət bıbu, və har kəs ki çəy hidoyəti ğəbol ko, bə səadət bərəse və əqə çıme umr bə oxo rəseydə nıbe, az mısibəton vədə, çəyku himəyə əkim.”

Əzizə əməson, Bəesəti 10 minnə sori, Rəcəbə manqi 26 minnə rujədə, Həzrəte Əbu Taleb qıləy holədə ki çəy ğəlb Xıdo İmoniku və Peyğəmbər(s)-i eşğiku pur be, bə rəhmət şə. Həzrəte Muhəmməd(s) Həzrəte Əbu Talibi rehlətə rujədə, qıləy holədə ki vey ğəmqin be, hamiyəşe: “ey çıme amo, tı çıme hırdənəti zamonədə, mıni prosneydə biş, iyən yətim bey zamonədə çımı ğəyoməti ğəbul kardə biş, Xədo bə tı çokə mokafati bıdə”.

Ə zamon ki Həzrəte Əbu Talibi pokə bədəni bə ğəbıstoni səmti bardən, Peyğəmbər(s) de pobənəso və qıləy holədə ki şiddətin surəti bəmedə be, votışe:” bomo çokə amo biş, jəqo bo tı əbaxşəti urzo kardəm ki cin və ins heyrət kon”.

Məkkə Həcon məntəğə, və Məəlat məntəğədə ki bə ƏbuTalibi ğəbıston məşhure, Həzrəte Əbu Talibi pokə bədəni çəy dədə ğəbi kənoədə dəkandışone. Xıdo Rəsul(s)-i Həzrəte Əbu Taleb iyən Həzrəte Xədicə(s) rehləti soron, “Amol Hozn” yəni ğəm və mısibəti sor nom noəş be.

Im hadisə bəpeşt, ijən Məkkə bo Peğəmbər əmn nıbe, və həminə sor be ki Cebreil bə Peyğəmbər(s) nozil bıə və bəy votışe: “ ey Muhəmməd Məkkəku xarıc bıbi boçiki ım vırədə boti komək əkə ni”.

Həmmə tarix ənıvışt bovəşon be ki tosə ƏboTalibi bəji bey zəmoni, Peyğəmbər(s) Məkkə tərk kardeyro ehtiyocış nıbe, əmmo ƏbuTalibi bəpeşt, Xıdo Rəsul(s) Məkkəku bə Mədinə səmti mıhocirət kardeşe.

Mehribonon bə ım bərnomə quş doe xoto şıməku təşəkkur kardəm.