İmom Huseyn (ə)-i viladəti ruji məxsusə bərnomə

İmom Huseyn (ə)-i viladəti ruji məxsusə bərnomə

Tolışə əməson səlom, şımə ruj bə xəyr bıbu, əzizon ımruj Şəbanə manqi 3 minnə ruj və Həzrəte Əbaəbullahel Huseyn(ə)-i milad ruji sorəqardışe, həmçınin ın şanqonə de Həzrəte ƏbulFəzle Əbbas(ə)-i milad şəvi sorəqardışi bərobəre ki ım bərəkətinə mınosibəton bə şımə təbrik ərz kardedəm. Umidımone ım yolə şəxsiyəton və əzizon şəfoət bə şımə ğısmət bıbu. əzizon həmçınin İroni təğvimədə ımruj pasdaron ruj iyən islomi məktəbiku pasdari kardey ruj ğeyd bıə, jəqo ki həmmə zıneydəmon, imom Huseyn(ə) islam və dınyoro ıştə həmmə çion fido kardeşe, ta əzizə islami oqəto, həmçınin İron İslam Respublika muğğəddəsə nizom pasdaron həm islami erjon oqəteyro, vey səyo cəhd kardeşone və hətto şəhid bin. Bəpe ım əzizə ruji bə pasdaron həm təbrik bıvotəmon.

Im bərnomədə İmom Huseyn(ə)-i xusiyəton və çəy vırə və məğomi barədə sıhbət bəkamon, şıməni dəvət kardəm de Tolışi Rədio bə ico bımandən.

Əzizon, İmom Huseyn(ə) Xıdo Rəsul(s)-i 2 minnə nəvvəonku, behşti əholi 2 qılə yolə cıvononku və kəsa 5 qılə əshobonku qıləyni bə hisob omeydə. Həmonə ləzzə ki İmom Huseyn(ə) bə dınyo omə, əy bə Xıdo Rəsul(s)-i nəzd bardışone və çəy miladi bə peyğəmbər(s)-i xəbə doşone, peyğəmbər(s) çəy rostə quşədə əzon və çəy çəpə quşədə iğomə votışe. Xıdo Rəsul(s), İmom Huseyn(ə) dəvənqo qəte vaxti çəy sə ta po maç əki. Qıləy rəvoyətədə omə ki Cebreil omə və bə Peyğəmbər(s) votışe: ey Xıdo Rəsul(s) çanədə ım hırdəni pidə ki anədə əy maç kardəş? Peyğəmbər(s) hamiyəşe: şəmşi və nizə vırəon, maç kardəm, vaxti Xıdo Rəsul(s) ım sıxəni votışe, dılış larzə və bəmedə, peyğəmbər(s) de ım kəlməon vositə, ım hırdəni sənıvışi bəyon kardeşe.

İslam dınyo yolə alim , Koleyni "kafi" kitobi qıləy rəvoyətədə votəşe: İmom Huseyn(ə)-i bə dınyo omey bənav, Cebreil çı İmom Huseyn(ə)-i milad, şəhodətə ruj və həmçınin çəy nəsliku Əhle Beyt(ə) bə dınyo omey xəbəon, bə Peyğəmbər(s) doəş be. İmom Sadeğ(ə) həm hamiyəşe: Cebreil bə Xıdo Rəsul(s) nozil be və votışe: ey Muhəmməd, pokə Xıdo ıştı kinə, Həzrəte Zəhre(s)-iku qıləy fərzəndi bə dınyo omey barədə bə tı xəbəş doə, əmmo ıştı ummət tıku bəpeşt, əy bəkıştın, tıni bə ım muhimmə xəbə bəşorət bıdəmon ki ə Hırdəni nəslədə, imomət və viloyət ğəror doə bəbe. Peyğəmbər ım mesaji qəteyku vey şo bıə və votışe: ğəbul kardəm və ruzim.

Peşo peyğəmbər(s) bəştə kinə Həzrəte Fatiməye Zəhra(s) ım muhimmə mesaji rosnişe və Həzrəte Fatimə(s) cəvob doşe: çıme dədə mıni bə qıləy hırdən ki ıştı ummət əy bəkıştın, ehtiyocım ni. Xıdo Rəsul(s), bə Həzrəte Zəhar(s) Xıdovəni bəşorəti rosnişe və bəy votışe: ha çıme kinə Fatemə(s), Xıdovənd de həminə hırdəni təvəlludi vositə, çıme nəslədə imomət, viloyət və canışini ki muhimmə koonin ğəror doəşe. Həzrəte Fatiməye Zəhra(s) bəştə dədə votışe: çıme əzizə dədə, az həm bə ım hərəbaxtə miladi xoto, vey xuşhalim. ********************************

Əzizə duston, Fotros qıləy zəxmin iyən pəjmurdə pərış bıə firiştə be ki qıləy cəzirədə jimon əki, vaxti İmom Huseyn(ə) bə dınyo omə de Cebreil bə ico bə Xıdo Rəsul(ə)-i nəzd omə və ıştəni bə Huseyn(ə)-i qofe dəsuje və tojədən Xıdo bəy pər doşe iyən bə osmon şə. Əv ki İmom Huseyn(ə)-iku şifo peydo kardəşe, əhd kardeşe ki İmom Huseyn(ə)-i zairon səlomi bə İmom Huseyn(ə) bırosno və hamiyeşe: “çıme ohdəy ki Ə Həzrət(ə)-i şifo əvəzi bıdəm, hiç qılə zair ni ki İmom Huseyn(ə)-i ziyorət bıkə, illa ım ki az çəy səlomi bə Ə Həzrət(ə)-i bırosnom, və hiç kəs bəy durud vığandəş ni, illa ım ki az çəy durudi bə Ə Həzrət(ə) vığandəm”. Bə Ğıroni məşhurə təfsirəkə və İmom Əli(ə)-i bəfodorə əshob, İbne Əbbas-i votəyon əsos, beheştədə ım mələk de “Huseyn İbne Əli nokə” unvani zıney bəbe.

Xıdo Rəsul(s) bə İmom Huseyn(ə)-i vey pidəş be və çəy barədə hamiyəşe: “ Huseyn(ə) mıku heste, və az Huseyn(ə)-iku.” Həmçınin hamiyəşe: “Huseyn(ə) çıme dıliro, roh, nəticə və oromətie, har vaxt bə Huseyn(ə) diyə kardedəm çıme vəşi bə sə bıdə və Huseyn(ə) çıme reyhanə və çıme 2 qılə çəşon nure”.

Ənəs İbne Malik nəğl kardə, vaxti Peyğəmbər(s)-iku soval kardeşone, ıştı əhle Beyt(ə)-iku kom kəsi, vey pidə? Həzrət(ə) hamiyəşe: Həsən və Huseyn(ə). Xıdo Rəsul(ə) çand kərə Həsən və Husey(ə)-i dəvənqo əqəti və əvoni bu və maç əki, bəzi vaxt əbi ki Huseyn(ə) səcdədə Peyğəmbər (s)-i şonəku bəpe əşi, Peyğəmbər(s) ıştə səcdə anədə dıroz əki ta Huseyn(ə) deştə ixtiyori saru bışi, Peyğəmbər(s)-i əshabon səcdə dıroz beyku soval əkin ki Aya vəhy nozil bıə Peyğəmbər(s) hamiəşe: “nı, çıme hırdən Huseyn(ə) çıme peştədə nıştə be”

Səlmane Farsiku, İmom Huseyn(ə)-i nəslədə imoməti dəvomiyəti barədə, qıləy rəvoyəte ki votəşe: “ az əvindim ki Xıdo Rəsul(s), Huseyn(ə)-i bəştə zonı ənışandi və əy maç əki və hamiyedə be: “ tı yolə şəxs, yolə şəxsi zoə və yolə şəxson dədə hestiş, tı İmom, İmomi zoə və İmomon dədə hesti, tı Xıdo huccət, Xıdo huccəti zoə və Xıdo huccəti dədə hestiş ki 9 nəfərin və çəvon xatəm İmom Zəmon(əc) bəbe.

Xosə əməson, Əeme Əthor(ə) miyonədə, İmom Huseyn(ə) yolə vırə soybe. Jəqo ki İmom Sadeğ(ə) ə Həzrəti mənəviyə əzəməti barədə hamiyəşe: " əmə Əhle Beyt(ə), həmmə çı nicoti qəmimon, əmmo çəmə cəd Huseyn(ə)-i qəmi vey rə hərəkət kardə". Yəni har kəs ki bə İmom Husey(ə)-i qıromi və mislış nıbıə şəxsiyəti təvəssul ko, vey rə bə səadət və xuşbəxtiyəti bərəse və har kəs ki dəy vey nığılə rabitəş bıbu, həm dınyo və həm axırətədə vey çokə jimonış bəbe.

Har kəs ki dılış bə həğiğəti səmti hərəkət ko İmom Huseyn(ə)-i nicoti qəmiədə pebənışte və çəy lutfədə ğərğ bəbe və çəy viloyət və məhəbbəti sahilədə bə oroməti bərəse.

Mehribonon ım idə rujədə bə İmom Huseyn(ə)-i hədisonku qıləyni işorə kardedəmon:

Qıləy mırd İmom Huseyn(ə)-i nəzdədə omə və votışe: pidəme qıno nıkəm əmmo karde əzı nim, bə mı qıləy tovsiyə bıkə ta qınohku diyəro bımandom, İmom Huseyn(ə) hamiyəşe: “ ım 5 ko əncom bıdə, və peşo har çəxtə ki pidə qınoh bıkə, i minnə ıme ki Xıdo ruzi məhard, və har çəxtə ki pidə qıno bıkə, 2 minnə ıme ki Xıdo viloyətiku xarıc bıbu və har çəxtə ki pidə qınoh bıkə, 3 minnə ıme ki qıləy vırə ki Xıdo ni, qınoh bıkə, 4 minnə ıme ki Məlekolmoti ıştə coni qətey zəmonədə, əqə karde bəzneş çəy vədə muğavimət ko və çəy dastiku xilos bıbi, peşo har çəxtə ki pidə qınoh bıkə, və 5 minnə ıme ki əqə cəhənnımi məmur pidəşbu tıni bə cəhənnım varid ko, əqə karde bəznış muğavimət ko peşo har çəxtə ki pidə qınoh bıkə.”

Əzizon bə ım bərnomə quş doe xoto şıməku təşəkkur kardedəm, şıməni dəvət kardəm de Tolışi Rədio co bərnoməon həm bəico bımandən.