İmom Səccad (ə)-i miladi mınosibəti

İmom Səccad (ə)-i miladi mınosibəti

Mehribonə əməson səlom, şımə ruj bə xəyr bıbu, Hicri Ğəməri 38 minnə sor və Şəbanə manqi 5 minnə ruji Mədinə şəhrədə iyən İmom Huseyn(ə)-i kədə qıləy hırdən bə dınyo omə ki imom Huseyn çəy nomi Əli noşe. Çəy inə İroni hakim, 3 minnə Yəzdqırdi kinə, Şəhrbano be ki 3 minnə xəlifə Usmani zəmonədə bə Mədinə vard be. Şəhrbano, ıştən, İmom Huseyni bənə həyot həmro vıjnişe, həminə vıjniye bəpeşt, İmom Əli(ə) bəştə hırdən votışe: "ey Əbaəbdellah çəyku muhafizə bıkə, buçiki əv zəmini əholiku vey çokə kəson bo tı bə dınyo bəvarde və əv çı imomon inə, iyən ə pokon nəslonku bə hisob omeydə"

Bəle Əzizon ə Hırdən İmom Səccad(ə) be. Im milad ruji bə şımə xıdmət təbrik ərz kardedəm. Im bərnomədə ım yolə şəxsiyət və ım əzizə İmomi barədə sıhbət kardedəmon, dəvət kardəm dəmə bə ico bımandən.

Əzizə əməson,(Əbol Həsən) və (Əbu Muhəmməd), İmom Əli İbnelhuseyn(ə)-i ləğəbəonku bə hisob omeydən, əmmo (Zeynol Abedin), (Seyedussajedin) və (Səjjad), ə Həzrəti vey məşhurə ləğəbonin. İmom Səjad(ə) ıştə zəmonədə, bə fəğiron vey komək kardey xoto, bə (əliyyol xəyr) və bə ibodəton vey bey xoto, bə (əliyyol abed) məşhur be.

İmom Səccadi nurinə simaədə, Həxi nur dəvəşedə be. ə Həzrət ıştə zəmonədə vey fazil və abidə insononku be. De İmom Səccadi dırozə səcdəon vositə, səccadəon orom əqətin. muxtəlifə mərefəti mıvzoonədə ə Həzrəti dıvoon, qıləy kitobi ğolibədə, (Səhifəe Səccadiye) nomo bıə kitobədə qırdə bıə. Səhifə bə pust ya koğəzi voteydən ki çəyədə ənıvıştin və çunki ki dıvoon səhifədə nıvıştə bıə, ım dıvo bə Səhifə məşhur bıə. Həmçınin ım kitobi co nomon, Ale Muhəmməd(s)-i zəbur, Əhle Beyt(ə)-i encil, Ğıroni hovə və Komilə səhifə hestin ki çəvonku səhifəe səccadiye vey məşhure.

İmom Səccadi dıvoon vey barzə məerefəton soybin. Co tərəfiku ım dıvoon və mınocoton, həmonə zəmoni hakimon enhırof, zılm və təcavuzi vədə, bənə İmom səccadi tijə siloh be.

İmom Bağır(ə) hamiyəşe: "çıme dədə İmom Səcad, bo Xıdovəndi neməton yod karde şık səəcdə əki əv Xıdo neməton yod nıkardışe, illa ım ki əy şık kardedə be. əqə Ğıroni ayə de səcdə bə ico be, beşək çəy səcdə həm əncom ədi. Har vaxt çəyku əzob diyəro əmandi, har faxt çəy vacibə nımoj bə oxo rəseydə be, har vaxt muminon miyonədə sulh bəğəror əki, səcdə əncom ədi, bə çəy xotoe ki bə çıme dədə, Səccad yəni vey səcdə əkə votedə bin."

Ə Həzrəti elmiyə əhotə bə İslami hıkmon və etığadi prinsipon, İmom Səccad(ə)-i mımtozə xusiyətonku bə hisob omeydən, jəqo ki har qılə sovali vədə, qıləy heyrətomiz və dırıstə cəvob bəyon əki. Həminə mislış nıbıə xusiyət co məzhəbon alimon bə təhsini icbor əki jəqo ki Əbdulmaleke Mərvani dərbaron alim, Zəhəri, İmomi barədə votəşe: Əli İbne Huseyni vədə hiç kəsi nıvindeme ki anədə fəğih və alim bıbu. Həmçınin Sınnion yolə tarixənıvışt və natiğ, şeyx Sebt İbne Cozi, Səhifə səccodiyə barədə votəşe: əqə zenolabedin və çəy səhifə nıbe, mısılmonon de Xıdo sıxən votey və dəy mınocot kardey və ıştə tələbon bəyon kardey metodi zıneydə nıbi, və əv be ki de yolə Xıdo votımon və saxti və muşkilaton vədə bəy şikoyət barey metodi bə insonon umutəşe. Çən umute iyən aqah karde həx, tosə ğiyoməti çı insonon qiədəy.

İmom Səccad(ə) Xıdo royədə yolə cəhdəkə be ki elm, fik və mərefəti mərkəz be. Çəy dırozə səcdəon, har kəsi bə Xıdo və Xıdo ibodət kardey səmti cəzb əki. Ə Həzrəti bıə zəmonədə ğari və alimə, Tavose Yəmani çəy barədə voteydə:” Məkkə və Xıdo kə kənoədə, İmom Səccadi vindem ki şəv tosə səhr bə ibodəti məşğul be, ə Həzrət ıştə dıvoonədə və bə Xıdo dərqohədə hamiyəşe:” ey Xıdo, osmoni astovəon məhv bıən, çəşon hıtən, ıştə dərqoh bo ehtiyocon və mıhtocon hozzo bıə, bə baxşışi ehtiyocış bıə qıləy mıhtoc bənə mı, bəştə dərqoh omə, əv umidışe ki ğiyomətədə ıştı qıromiyə Rəsuli ziyorətiku əy məhrum nikoş.” Peşo İmom Səccad(ə) bəmedə və bəştə pərvərdıqori dərqoh hamiyəşe: “ Ey Xıdo, aqə ıştə rabitə de mı sə bıkoş, az bə kom mıhkəmə rismoni çanq bıjənom? Həyf, ə zəmon ki mıni ıştə drqohədə hozzo kardedən və həmonə zəmon ki bə həmmə be qınohon icozə bədoy ki dəvardən, və qınoh həmbolon bə cəhənnım daxıl kardedəş, aya həmonə rujədə beqınoh quruponədəm ta nicot peydo kom ya qınohkorə quruponədəm ta əzobədə bıbum? Ah və həyf ki ıştə umrədə bə çıme qınoh əlovə bıə və tubə nıkardeme, boçi az Xıdoku xəcolət kəşedə nim?

Tavus votışe, ə Həzrət həmçınan bəştə mınocoti idoməş do, ki anədə bə çəy səmti şim və çəy sə bə çıme zonı nome və vey bəmedəm, ə Həzrət votışe: kiye ki mıni çıme mahbobiku co kardə və bə co çi məşğul kardə? Az votəme, Tavusım, ey Xıdo Rəsul(s)-i zoə ım vanq, bəme və nolə bo çiye? əmə tıku vey qınohkor və xətoəkə odəmimon ki bəpe jıqo bə Xıdo dərqoh nolə bıkəmon, əmmo şımə boçi? şımə ki şımə dədə Həzrəte Seyeduşşohəda(ə) və şımə inə Həzrəte Fateməye Zəhra(s) hestin?

Ə Həzrət hamiyəşe: ey Tavus! Dədə, inə və cəddi sıxənon vo bıdə, Xıdo behşti bə xəyrinə odəmən xoto, xəlğ kardə, əqəçı ə odəm Həbəşi siyohpustə şəxs bıbu, məqə məsedə niş? Və Cəhənnımi bo qınohkorə odəmon təyin kardəşe aqəçı Ğoreyşi fərzəndon bıbun. Peşo ə Həzrət Mumenon surə, 101 minnə ayə təlovət kardeşe və hamiyəşe:

“Çən, çoko ki, bə suri pu kardey bəbe, həmonə ruji çəvon miyono nə qıləy ğohuməti əloğə bəbe və nə əvon iyəndeyku sıvol kardedən.

İroni Yolə Rəhbər, Həzrəte Ayətullah Xamenei(r), İmom Səccad(ə)-i ibodəton barədə hamiyəşe:” şımə təssəvur kardən ki Əeme Taherin(ə) iyən Həzrəte Səccad(ə)-i noləon bo təlim be və pidəşon be bə co kəson təlim bıdən? əvon de ım vucud ki mənəvi və yolə vırə soyb bin, əmmo Xıdoku tarsedə bin, və zıneydə bin ki çəvon roy çanədə muşkil və saxte. əvon Serotə mıstəğim royku dəvardey muşkilaton, saxtionku, xəbəşon be , həmonə roy ki çəy i tərəf dınyo və çəy co tərəf axırət bəbe. Bə çəy xoto hiç vaxt orom nebin və həmişə axırəti şiddətinə ağıbətiku bə Xıdo pənoh əbardin.”

Əzizon bə ım bərnomə quş doe xoto şıməku təşəkkur kardedəm, şıməni dəvət kardəm de Tolışi Rədio co bərnoməon həm bəico bımandən.