De Həzrəte Əli Əkbər(ə)-i milod ruji mınosibəti
De Həzrəte Əli Əkbər(ə)-i milod ruji mınosibəti
Əzizə tolışon səlom, mehribonon təğribən 1410 sor çimi bənav, yəni Hizcri Ğəməri 33 minnə sori Şəbanə manqi 11 minnə rujədə, Mədinə şəhrədə və Huseyn İbne Əli(ə)-i kədə, qıləy hırdən bə dınyo omə ki çəy nom Əli Əkbər noə bıə, çəy sima vey bə Xıdo Rəsul(s)-i sima şəbih be, və duston və xışavəndon və har kəs ki Peyğəmbəri vindey urzoədə bin, bə Əli Əkbər diyə kadedə bin, anədə ki Xıdo Rəsuli xoşə ətr əvonro omeydə be.
Əzizon ım əzizə ruji bə şımə təbrik ərz kardedəm ijən ım ruj bə cıvonon ruji məşhure ki bə həmmə cıvonon həm təbrik ərz kardedəm, şıməni dəvət kardəm bə ımrujnə bərnomə diğğət bıkənən.
Xosə əməson, Əli Əkbər ki bə dınyo omə, Həzrəte Əli(ə) çəy rostə quşədə əzon və çəy çəpə quşədə iğomə votışe həmonə ləzzəon be ki çəy qədə ğəlbədə imoni şiv, zıklə jə və çəy imon prosniyə bıə.
Həzrəte Əli Əkbər(ə) bənə ıştə əmo, dədə və bibi hırdənəti zəmoniku ıştə əzizon dastiku doəş be və Qıləy holədə ki əv qədə hırdən be çəy inə bə rəhmət şə, iyən 7 sorəti sinnədə çəy cəd, İmom Əli(ə) şəhid bıə, ım hadisəku 10 sor bəpeşt, çəy əmo Həsən İbne Əli şəhid bıə və ım soronədə Əli Əkbər ıştə dədə nəzdədə jimoni dərsi umuteşe ki çəy muhimmə dərs velayətmədori və ıştə İmomiku itoət kardey be, ki Əli Əkbər çı dərsi əmələdə iyən səhih surəti nışoş do. Kərbəloədə və Həmonə rujədə ki İmom Huseyn(ə)-i əshabon şəhid bıən, Əli Əkbər bə ıştə İmom və dini oqəte xoto, bə meydon şə. Və meydonədə jəqo ıştəni tərif və mubariz tələb əki ki hiç kəs dəy mubarizəro ciqəmand nıbe. Deşmənon ki quya canq meydnədə çı Həzrəte Rəsul(s)-i sima əvindin vey heyrət və tarsədə bin. Deşmən ğəror be de həmonə şəxsi canq bıkə ki milləton miyonədə vey bə peyğəmbər(s)-i şəbih be. Həmonə peyğəmbər ki deşmenon iddio kardedə bin bə çəy din və Ğıroni tabein və Xıdoku ibodət kardən, ım çand həzo nəfər ki de Peyğəmbəri zoə canq kardey holədə bin, çəvonku hiç qılə, çı islami həğiğəti dərk nıkardə bin və həminə noaqahi və be bəsirəti bois be ki əvon Xıdo vey çokə bandəon vədə mubarizə bıkon, əvon anədə həromə moli hardə bin ki qınoədə qiriftor bin və çəvon quşon həxi sıxəni məsedə nıbe.
Əmmo əzizon, çəmə dınyo və taleədə, təssəvvor ıme ki cıvonəti dovran, həyəconi təcrubə kardey və ıştən bəsəti dovrane, ım dovranədə cıvonon bə təcrubəon nəticə diğğətışon ni və fəğət həyəconi koon dumoədən. İslami yolə şəxsiyəton, həmişə bə cıvonon tovsiyə kardəşone ki ıştə cıvonəti ğıvvə, bəştə ictimai və fərdi xusiyəton prosniye və ozavziyə royədə istifodə kon.
Həmçınin Peyğəmbər(s), cıvonon bə elm umutey təşviğ əki, bə çəy nəzə əsos, cəvonəti dovranədə elm bənə şikile ki sığədə həkk bəbe, əbədi bəmande. Həmçınin Ğıron umutey və qınoh kardeyku diyəro mandey ki de çəy vositə, vey yolə arifon, cıvonəti dovranədə, de həminə koon əncom doey bə irfoni məğomon rəsəşone.
Əqə cıvon ıştə ğıvvə iyən zumandəti de ciqəmandəti, şucaət və imon bə ico qırdə ko, və de təvazokorəti, elm, ədolət və zılmi diyəro mendey royədə hərəkət ko, həğiğətən Xıdo nəzdədə, əziz və qıromi bəbe və ım həmonə roye ki inson bo bəy rəsey, xəlğ bıə.
bə cıvonon bıə İslami ımrujnə mesaj ıme ki Ğıron bıhandən, və ım barədə mısılmon ya ğəyre mısılmon bey hiç farğış ni, bəlkəm ımruj Ğıron handey bo həmmə insonon lozim və zərruriye boçi ki Ğıron imminnə mənbəonku bə hisob omeydə. Imruj dınyoədə kali şəxon, İslamiku bənə tars və dəhşəti din yod kardedən əmmo İslami həğiğət və huviyyəti zeneyro, bəpe Ğıron bıhandon.
İslami deşmənon de tojə əbzori vositə, insonon fiki xususi cıvonon mıhosirə kardeşone, əvon pidəşon ni ki həğiğət nışo doə bıbu. Cıvonon bə dınyo hənəkon məşğul kardəşone, və bəvon həğiğəti əvəzi vey du voteydən ki məsələn xəbisə terroristoni bənə DAEŞ çı İslomi nımoyəndə.
Əzizə duston, anti islam təbliğonədə co qılə du ıme ki həmonə mısılmonon ki təcavuzkoron və işğolçion vədə ıştə con, sərvət və sərzəminuku muhafizə kardedən, terroristin.quya torix tikror bıə, ım duon bənə həmonə pesoxtə sıxənonin ki İmom Huseyn(ə) zəmonədə həm mıvcud be, və Yəzid pidəş be ki millət əvoni bovə bıkon, Yəzid ıştəni İslomi nımoyəndə zıneydə be, qıləy holədə ki hətto oşko surəti bə çı İslami ğanunon və prinsipon əməl nıəki, və Huseyn İbne Əli(ə)-i diniku xarıc bıə şəxs elanış karde, qıləy holədə ki ıştən zıneydə be ki həmonə vırə və məğom ki ğəror qətəşe, nohəxe, və həğiğətədə ım vırə və məğomi soyb, Huseyn İbne Əli(ə)e.
Əzizon ımruj ə şəxsi milad ruje ki cıvonəti pikədə bə dınyo və çəy ləzzəton peşt iyən bo həx-həğiğətiku oqətey, ıştə coni fıdo kardəşe. Həzrəte Əli Əkbər(ə) ıştə cıvonəti həyəconi de ağılməndəti və şucaəti i kardəşe be, həğiğətədə əv tole torixədə həmmə cıvononro yolə ulqo və simvol be, və tosə bə ısət həm heste. Deşmenon təssəvvor kardedə bin de ım cıvoni kışte vositə, həminə yolə şəxsiyəton nəsl məhv bəbe, əmmo ımruj vey cıvononin ki Həzrəte Əli Əkbər(ə)-i jimoni roy, şivə və hədəfi umutəşone. Həmonə cıvonon ki çı jimoni həyəcon və ləzzəti, həğiğət və ədoləti peydo kardeyədə nəvedən.
Əzizə həmzıvonon tojədən Kərbəlo cıvon, Həzrəte Əli Əkbər (ə)-i milad ruji, iyən cıvonon ruji bə şımə xıdmət təbrik ərz kardedəm.həm bə şımə ki cıvonəti sinnədə hestiron və həm bə şımə ki cıvonəti sinniku dəvardərone əmmo şımə dıl cıvon və həyəconi soybe.
Xosə əməson bə ım bərnomə quş doe xoto şıməku təşəkkur kardəm, dəvət kardəm de tolışi Rədio bə ico bımandən və bə ımrujnə bərnoməon idomə quş bıdənən ki koy həmroon bə şımə xıdmət təğdim bəkan.
