Kərimə-Ğıroni təhğır kardey,qırd erjon təhğır kardeye.

Kərimə-Ğıroni təhğır kardey,qırd erjon təhğır kardeye.

Əzizə həmzıvonon səlom, dıvo kardəm Xıdovənde Xalıği dərqohədə şımə nımoj-rujəon iyən zinə Ğədrə şəvi ibodəton ğəbul bıbun. Mehribonon dəvardə soronədə har çand vaxt bə islami muğəddəsə çion tovhin bıdə be, əmmo ısət ki bəşəriyət ıştəni vey sivilizasiya soyb bıə dastə bə hisob vardə, ım bədəxloği iyən nodonəti bəşətə pik noğtə rəsəşe. dəvardə haftə İsveçədə, saxtə xətt nomo bıə anti islam radikalə hərəkəti rəhbər “Rasmos Palodan” deştə qurupi bə ico, Kərimə Ğıroni otəş jəşone. Imrujnə bərnomədə həminə mıvzo barədə sıhbət bəkamon, dəvət kardəm dəmə bəico bımandən.

Əzizə Tolışon, jəqo ki votımone, İsveçədə kərimə Ğıroni otəş jəe, bois bıə ki ın kişvəri muxtəlifə şəhronədə, polis ğıvvon və eterozəkəyon miyono, vey şiddətinə daveon icod bıbu. Dəvardə haftədə İsveçi şəhron bə mısılmonon etırozon şiddəti xoto, vey behroninə şəroyetədə be.

Əmmo boçi əvon Kərimə Ğıroni otəşışon jə. Əvoni ki Ğıroni mıtoilə kardışone, aqah hestin ki Ğıron çı ilahi vəhy və qıləy mucizəey, ki de insoniyəti iyən jimini pokə sirə xıvandəti bə Xıdo Rəsul(s)-i ğəlb nozil bıə. Ğıroni hədəf, imoni ozavziyə və insoni hərəkətiro roy nışo do ğeyd bıə. Dınyoədə İslami iştirok, ım həğiğəti nışo doydə ki Kərimə Ğıron de elmiyə məntığ və çokə fami və əxloği iyən elmi prinsipon, bo bəşəri jimoniro vey komilə nizomnoməy. Bəşər de Ğıroni vositə, karde bəzne, dınyo iyən axırəti həğiğəton həxədə bə vey həğiğəton dast peydo ko.

Peyğəmbər həminə barədə hamitəşe: “Ğıron iyən milləti hikoyət, zəmin iyən voşi hikoyəte, qıləy holədə ki zəmin marde iyən hışk bıə, noğofil Xıdo voşi vığandə, və zəmin larzedə, peşo vey rə voş nozil bəbe iyən zəmin tojədən larzedə və perəsedə, peşo tanqəonədə dumo yande, ruon cari bəben tosə zəmoni ki zəmin və çəy havzəon perəson, və Xıdovənde Xalığ ə çi ki zəmini dərosney iyən millət və həyvonon xorəkonin, çəy dıliku xarıc kardə. Ğıron həm de həmonə milləti ki əy ğəbul bıkon, jəqo rəftor kardedə”.

Bə Kərimə Ğıroni ayəon əsos, Xıdovənde Xalığ bə həmmə insonon kəromət baxşıdə, və həmmə insonon bə ehtıromi loyğin. Çən bə əvon iyən çəvon etığadon tovhin və beehtiroməti kardey coyiz ni, və əğli nəzəku məhkum bənine. Ğıronədə hiç kəs bə ğəre mısılmonon tovhin kardey həxış ni, və Ğıron hidoyəti yeqonə roy elan bıə, ın kitobədə de xoşə zıvon iyən rəftori dəvəton bəyon bıə, nə de tovhin iyən məsxərə karde.

Ğıroni məntığədə, har vırə ki insonon çəyədə bə ibodət iyən dıvo votey məşğulin vey ehtıromin iyən erjinin, iyən farğış ni ki məçit, məəbəd iyən kilsə bıbu. Mısılmonon həm hətto bə yande prinsipon beehtıromətəti kardey kardey icozəşon ni, Ğıroni təkid bəçəy xotoe ki hətto bəpe bə co dinon tərəfdoron həm tovhin nıbu, boçiki bə co qılə muğəddəsə çion tovhin və ihonət kardey, ehtımolış heste ki bə islami prinsipon tovhin kardey bois bıbu. jəqo ki Xıdovənd Ənami surə 108 minnə ayədə hamiyəşe:

 “Ğərəz Xıdo co kəson vanq jıəkəson nosizo məvotənən ki, əvon həm bə cəholət iyən de Xıdo deşmınəti xoto nosizo bəvoteyn.”

Isət ım soal icod bəbe ki boçi har çand vaxt i kərə, kali şəxson deştə  nıvində ğəyrəti və de ciqəmandəti, bə ım kitob yəni bə Kərimə Ğıroni jığo ihonət və tovhin kardedən? Həmonə kitob ki həmmə şəxsonış bə elmiyə mubarizə iyən məntıği dəvət kardə. Və bə bəyonədə ozodəti iddio bıə prinsipon əsos, boçi ihonətəkəyon barədə ciddi və ibrətomizə rəftoron nibəbe? Aya Ğıroni otəş jəe məno, çı ihonətəkəyon zəif bey və çəvon be məntığəti nışonə ni?

Im məsələ inkor nıkardənine ki ımrujnə əsrədə, İslami din vey rə ozavziye holədəy, və mıxolifon karde zınəşon ni ki ım məsələ vədə mane bıbun, əcumlə ğərdədə ki ın həğiğəti nışonəon vindey bıdə çən bəy tovhin kardən. əmmo həğiğət ıme ki i tərəfiku ım curnə nodonəti rəftor iyən kin-kodorəton islami oğoəti komək kardə və ımruj de islam dınyoədə zumand iyən rişədorə hərəkəti bino bey vositə hukmən islami umməti İstiğlol, izzət və tojədən bəji bey bois bəbe.

əmmo co tərəfiku bə hiç kəsi niyon ni ki hər zəmon islami vədə demənçiyəti hevuj bıə, milləti meyl iyən diğğət həm bə ım məktəb əlovə bəbe. Vaxti (Şarli Əbdo) nomo bıə Fransəvıjə jurnal, bə Xıdo Rəsul(s)-i şəxsiyət tovhin və beehtıromətiş kardə, dınyoədə bo ım yolə şəxsiyəti zıney vey əlovə bıə. Imruj hukmən karde bəzımon vote ki vey iddio bıə çiyon bənə bəşər həxon, mosavat, yande dərk kardey, ədolət iyən demokratiya, ki əsron bəpeşt bo həmmə millətonro bənə irs mandə, peyğəmbəri iminnə sıxənononku be.

Və əmmo ğərbi dıvləton nəzdədə, bəyonədə ozodəti şuar, bə islami muğğəddəsə çion tovhin kardey mənodəy, İsveç cənubədə, polisi sıxənəvot, Kim Hild çımi bənav votəş be ki hədəfışon ni ki ım kişvəri cənub Lanskoron şəhrədə çı rostə partiya aksiyaon icozə ləğv kəmon, boçiki bə, ım kişvəri səbri astanə vey ziyode və İsveçi polis, bəyonədə ozodətiro vey erjinə həxi zıneydə.

Hukmən bəyonədə ozodəti qıləy həx bə hisob omeydə, əmmo qıləy mıtləğə erj ni və nibəbe de ım həxi bəhonə, bə odəmon icozə bıdəmon ki bə co şəxson ya dini tərəfdaron abru, prinsipon, pisixi səloməti iyən əmniyyəti həmlə bıbu və bəvon tovhin kəmon.

Səmimi həmzıvonon bə ım bərnomə quş doe xoto şıməku təşəkur kardəm, lutfən bə Rədio Tolışi co bərnoməon həm diğğət kənən.