Asiyə ğərbədə xəbəon

Asiyə ğərbədə xəbəon

Xosə Tolışon səlom, şımə ruj bə xəyr bıbu, şıməro xəy iyən səadət urzu kardəm de “Asiya ğərbədə hadisəon iyən xəbəon” nomo bıə bərnomə şımə xıdmətədəm. ın haftə, Livani parlamenti səçın iyən de israili hərbion vositə əncom bıə, Şirin Əbuağelə terrori barədə reaksiyaon, Asiya ğərbədə vey muhimmə hadisəonku bə hisob omeydən, dəvət kardəm de ım bərnomə bə ico bımandən ta həminə hadisəon barədə tikəy məlumat bə şımə xıdmət təğdim bıbu.

Mehribonə əməson, jəqo ki votımone, Mayə manqi 15 minnə rujədə Livanədə, parlamenti səçın bərpo be, dəvardə haftə Asiya ğərb məntəğə vey muhiommə hadisəonku qılyəni ım xəbə be. ım intixobat, çı Livani parlamenti 24 minnə səçın be. Im səçınədə, milləti iştiroki miğdor, de Miladi 2018 minnə sori muğaisədə, 8 faiz kam be və bə 41 faiz rəsə. Im dıvrədə 3 milyono 917 həzo nəfəriku vey səçenədə iştirok kardey şəroyetışon be əmmo fəğət 1 milyono 605 həzo nəfər iştirok kardeşone. Qıləy holədə ki 60 faiz Livanıjon co kişvəriku həm sədo doşone. Miladi 2018 minnə sorədə, Livani oxonə səçın de 49 faiz sədo doə kəson iştiroki vositə bərpo bıə be.

Imsornə Livani səçınədə, 719 nomzəd, bo ım kişvəri 128 qılə parlamenti kursi dast peydo kardeyro de yande rəğabət kardeşon, jıqo bə nəzər rəsedə ki de ım səçıni nəticə vositə, Hizbullah və mıttəfiğə partiyaon muvəffəğ bəben 62 qılə, parlamenti korsi soyb bıbun. Dəvardə dıvrədə, Livani parlamentədə  Im quruq iyən fraksiyon 71 nəfər nımoyəndə soyb bin.

De Im səçıni, 11 nəfər mıstəğilə namzədon və islohtələbon, iyən 15 namzəd Livani mədəni ictima hərbion bə parlament varid bıən. Im təhəvol iyən əvəzon nışo doydə ki şahrvandon bə məhəlliyə partiyaon bədbinin.

jurnalist, Səmir Yusef, həminə barədə votışe: ım namzədon, Miladi 2019 minnə sori Oktiyabrə manqi təhəvolaton nımoyəndəon iyən şahrvandon tələbon sıxənəvotin ki iğtisodi bevəcə vəziyət iyən təşkilaton be loyğətonku oqıniyə bıən.

Əzizə əməson, Livani tojə parlament səçınədə muğaviməti muxalifon 40 qılə parlamenti kursi soyb bıən, əmmo vey sədo bə Əllobnaniye Ğovvat partiya de Səmir Cəe Cəe rəhbəriyəti məxsuse. Ki muvəffəğ bıə 20 qılə kursi soyb bıbu.

Əlmostəğbel cərəyon ki bə Səed Əlhəriri vabəstəy, və ım dıvrə səşınədə mıstəğil surəti iştirok kardəş be, muvəffəğ bıə 6 qılə kursi soyb bıbu. ım qıləy holədə ki Yanvari manqədə, Livani nakonə i minnə vəzir və Əlmustəğbeli rəhbər, Səed Əlhəriri, ıştə siyosiyə fəaliyəton bə kəno noe iyən Livani səçınədə ıştə siyosiyə cərəyoni iştirok nıkardeyku xəbə doəş be.

Livani parlamenti nəticə elan bey bəpeşt, bə Hizbullah vey təziğon icod bıə, muxalifon veyni Hizbullah və çəy mıttəfiğon məğlubiyəti elan kardən. İşorə kəmon ki ımsor Livani parlamenti səçınədə, Amerkə-Səudiyə mıdoxiləon bə ğəyre mıstəğimə reklamon iyən mali məsələon təmin kardey məhdud nıbe, bəlkəm Vaşenqton iyən Riyaz de “əvəz” nomo bıə kompaniya vositə, bə hizbullah səmti ıştə ittihamon hevuj karde və milləti çəvonku diyəro kardey dumoədə bin ki səçıni nəticəon, çəvon məğlubiyəti subitış kardə.

Səçıni xəbə iclos və mediyaon mığubilədə, Livani vətəni ozod hərəkəti rəhbər, Cebran Basil, həm elanış kardə: zıneydəmon ki həmonə pul ki səçınədə xərc bəbe, məlum reqional mənbəş heste, və ım nışo doydə ki səçıni mubarizə bə daxıliyə məsələon məhdud ni.

Həmçınin Asiya ğərbədə, siyosiyə məsələon koşınos, Həsən Hanizodə həm həminə barədə votışe:  Livani muğaviməti məhv kardeyro Amerkə, Ərəbiston, Fransə və İ bıə Ərəbə Əmirəti 40 milyon dollar xərc kardışone.

Livani Hizbullah sərkatib, Seyed Həsən Nəsrullah həm həminə barədə votışe: de bə çəmə zid iyən muğaviməti mıttəfiğon hevujə pisixi reklamon həmləon vıcudi, həmçınin iğtisodi təziğon və Livanədə muxtəlifə bıhranon dumoədə və de həmmə təhdidon ki millət de çəvon dim bə dim mandəy, əmmo dışmən muvəffəğ nıbe ıştə çokə nəticə bə vırə bırosno.

Əv ijən votışe: əmə bəpe bə ım yol iyən əzəmətinə səbarzəti fəxr kəmon, xususi zəmoni ki diyə kəmon ki ım səbarzəti çoknə bevəcə şəroyetədə bə dast omə və çəy vəy qəteyro çandə xərcon əncon bıə.

Livani parlamenti səçıni nəticə nışo do ki hiç qılə cərəyon mıtləğə vey sədo kəsb kardəş ni. həmçınin nışo do ki ım kişvəri millət həmçınan bə muğaviməti hədəfon bəfodorin.

Əmmo əzizə duston, dəvarəd haftədə Asiya ğərbədə co qılə hadisəon, Ğətəri Əlcəzirə kanali Fələstinıjə jurnalist, Şirin Əbuağelə terrorədə, bə sionist rejimi cinoyət reaksiyaon barədəy.

Hollandiya xarıci vəzir, Voopke Hokestra Əbuağelə şəhid bey vey niqəronəkə zıneydə be iyən tələbış kardə ki həminə barədə şəffof və komilə təhğiğaton əncom bıbu.

Tojədən Miladi 1967 minnə sorədə bıə, işğal bıə Fələstinıjə bəşər həxi məxsusə jurnalist, Françeska Albaniz, ğəyre ğanuniyə edamon barədə məxsusə jurnalist, Moris Tidbal Binz, bə jenon ələyh vızməti koonədə məxsusə jurnalist, Rim Əlsalem iyən fik və sıxəni ozodi həxiku himoyə və rəvoc doe məxsusə jurnalist, İren Xan, qıləy bəyoniyədə təkid kardeşone ki Əbuağelə terror bə jurnaliston ələyh xususi Fələstinıjə jurnaliston təcavozon əlovə kardey cəhətədə, əncom bıə, jəqo ki Miladi 2000 minnə soriku tosə bə ısət, 40 nəfəriku vey Fələstinıjə jurnalist kışte iyən sa nəfər həm zəxmin bıən.

Həmçınin Fələstini Xarıci vəzarətxonə qıləy bəyoniyədə elanış kardə ki sionist rejimi ərtış səyo cəhd karde holədəy ki Şirin Əbuağelə terrori dussiyə bıbasto iyən de muxtəlifə bəhonəon həminə məsuliyətiku fəror ko.

Həmçınin beynəl xalğə Əf (aminitsiyə) təşkilat həminə mıvzo barədə təkid kardə ki İsrail bəpe bə Fələstinıjon ələyh ıştə cinoyət məsuliyəti ğəbul ko və əmə bəpe həmişə Əlcəzirə kanali jurnalist, Şirin Əbuağelə terrori çəmə yodədə oqətəmon.

Səmimi əməson,bə ım bərnomə quş doe xoto şıməku təşəkkur kardəm, dəvət kardəm dəmə bə ico bımandən.