İlahi əsma və nomon

İlahi əsma və nomon

İştimoyi behrononədə hə bə Xıdovəndi təvəkkul kardey,bə insoni rufi iyən psixoloji təsiron noydə. məsələn milodi 2020-ə sori koronavirusi noxəşəti pandemiyə vey ibrətamize.çın noxəşəti sıftədə dıqlə dastə mışohidə kardey beydəbe:iqlə qrup ki,çı iztirob iyən tarsi şiddətiku kulliyə formədə dəboxtəşon be və ıştə oroməti çı dastoşon doəbe və dayima iztirobi dılədə bin.

Əmmo coqlə dastə ki,de bəştə imon iyən mənəviyyoti peştıpur bıə holədə bə Xıdo təvəkkul kardedəbin və bə səhiyyəvi protokolon rioyət kardə holədə ıştə oroməti oqəteydəbin və çəvonku idastə həm bə çın hodisəku ziyon vindəkəson koməki səmt həm şeydəbin.ım qrup muminon bin ki,saxt və şiddətinə səhnəonədə nəyinki,bə şəkki giriftor beydənıbin,bəlkəm çəvon yəğın ziyod həm beydəbe.çı yəğıni əlomət ıme ki,inson hiçvaxti bəştə iyən bə cokəson təkyə kardedəni,bəlkə hejo bə Ğadirə Xıdo təkyə kardedə və Subhonə Xıdo boştə jimoniro kafi zıneydə.çoko ki,Ali-İmroni mıborəkə surə 173-ə şərifə ayədə omə:”fəzadəhum imanən və ğalu həsbunəllah və niməl vəkil.(deşımıni təhdid)çəvon imonış ziyod karde və voteşone:Xıdo bəmə vəs kardedə və Əv çokə vəkile”......

Allahummə ....Xıdolim ha! bə Muhəmməd ali Muhəmmədi səlom bıvğand və çımı coni rostə holədə ıştə (əğedədə) sabit oqət və çımı dınyo ehtiyoci cokə və çımı bəştı nəzdədə bıə çiyon rəğbəti ziyodkə.qıləy holədə ki, bəştı liğa iyən vindemoni muştoğ bıbum,ğərol bıdə.

Vucud iyən hestemoni aləmədə har qıləy ism və nom ki,məno cəhəto çok bıbu,bə Xıdo məxsuse. Xıdovəndi çın çokə nomonku qıləyni Ğəvi nome.ım nom bo Xıdovəndi ikəs ki,ocizəti bəy hiçvaxti mustəvli nıbə kəsi mənoədəy.Kərimə-Ğıronədə Ğəvi ism senzə kərə bəyon bıə .haft kərə Ğəvi ism de Əzizi nomi bə ico oko doey bıə.ım nom dı dəfə de”şədidiul-İğab”(şiddətinə cəzo) iborə və i kərə həm  de Şədidiul-Ğuva” (ğudrətış ziyod bıə) təbiri omə. Se kərə həm zu iyən ğudrəti fəğət bə Xıdovəndi məxsus bıey barədə bəyon bıə.....

De Rəyisul-Muhəddisini nomi məşhur bıə Şeyx Səduğ çı Ğəvi tərifədə votedə:”Ğəvi qıləy mərufə mənoş heste əv həm ıme ki,qıləy ko bezəhmət iyən cokəsiku komək nısətnə holədə bə vırə rosneydə”.Ğəviyə Xıdo qıləy ğalibe ki,hiçvaxti məğlub beydəni.qıləy Ğahire ki,məğhur beydəni.qıləy pənohədəy ki,bə ikəsi pənohı ehtiyociş ni.qıləy Xıdovənd ki,bə həmmə məxloğati ğudrət əto kardedə və ıştən çı komil və mıtləğə ğudrəti soybe.Bəğərə mıborəkə surə 165-ə şərifə ayədə bə ım mıtləğə ğudrəti işorə kardedə və hamyedə:innəl ğuvvətə lillahil cəmia.həmmə ğudrət bə Xıdo məxsuse”.....

 Ğəviyə Xıdo qıləy ğudrət iyən izzəti soyb bıə Xıdoye ki,hiçvaxt məğlub beydəni və ım qıləy həyğəte ki, kofiron hiçvaxti əy dərk kardedənin.Xıdovənde-Ğəvi Həcci mıborəkə surə 73-74-ə şərifə ayəonədə hamyedə:”ya əyyuhənnasu ...... Ha məxloğ ha! (şımə iyən şımə bıton barədə) qıləy misol jıey be. çən, bəy quş bıdənən! həyğətən, şımə i bıə Xıdo əvəzi vanq kardə kəson hiç faxti kardey nibəzıneyn qıləy muz(həm) xəlğkəyn, harçənd bın koyədə əvon bə ivırə cəm həm bıbon. və əgər həmonə muz çəvonku qıləy çi peqəto, bıboy, əvon əy(çəyku) bə dumo sıey əzınin. tələbəkə iyən tələb bıə çi har dıqləyni ocizin. Bə Xıdo çoko əv loyığe ehtirom noydənin. hukmən Xıdovənd zumand iyən məğlub bıənin ni.