İlahi əsma və nomon

İlahi əsma və nomon

Ğəviyə Xıdo qıləy ğudrət iyən izzəti soyb bıə Xıdoye ki,hiçvaxt məğlub beydəni və ım qıləy həyğəte ki, kofiron hiçvaxti əy dərk kardedənin.Xıdovənde-Ğəvi Həcci mıborəkə surə 73-74-ə şərifə ayəonədə hamyedə:”ya əyyuhənnasu ...... Ha məxloğ ha! (şımə iyən şımə bıton barədə) qıləy misol jıey be. çən, bəy quş bıdənən! həyğətən, şımə i bıə Xıdo əvəzi vanq kardə kəson hiç faxti kardey nibəzıneyn qıləy muz(həm) xəlğkəyn, harçənd bın koyədə əvon bə ivırə cəm həm bıbon. və əgər həmonə muz çəvonku qıləy çi peqəto, bıboy, əvon əy(çəyku) bə dumo sıey əzınin. tələbəkə iyən tələb bıə çi har dıqləyni ocizin. Bə Xıdo çoko əv loyığe ehtirom noydənin. hukmən Xıdovənd zumand iyən məğlub bıənin ni.

Ğəvi bə zumand iyən ğıvvətinə şəxsi votedən.bəşəri torıxədə zumandə ğovmonku qıləyni Adi ğovm bıə. çəvon qıləy bılındə ğamət,bolo iyən cismoni cəhəto barzə ğudrəti soyb bıən.həmçinin əvon de təbiyi nemətonku bəhrə bardey,qıləy inkişofinə mədəniyyət ofəyəşon be.çəvon ixtiyorədə ovdonə şəhron, havzə zəminon iyən tərovətinə boğonışon hestebe və əvon anədə bənav şıəbin ki,Xıdovənde-Xalıığ Fəcri mıborəkə surə 8-ə şərifə ayədə çəvon tevsifədə jıqo hamyedə:”əlləti ləm tuxləğ ....bənə əvon dınyo məmləkətonədə məxloğ xəlğ bıəni be”.əmmo çəvon həmonə ğudrət iyən zu bəçəvon yoləşəxəti iyən həxə royku mınhərifəti boyis be.joqo ki,əvon ıştə peyğombəron mığobilədə mandin və İlahi nışonəon inkor kardeşone.Fussiləti mıborəkə surə 15-ə şərifə ayədə jıqo hamyedə:”fə əmma  Adun əmmo Adi ğovm nohəxədə zəmini dimisə təkəbbırəti kardeşone vəö voteşone:kom kəs çəməsə vey zumande? Aya zıneydənıbin Xıdovənd ki,əvonış ofəyə çəvonsə vey Ğəviye(Zumande)? Və bəçəvon ım fiki xoto əvon hejo çəmə ayəon bəhəşə jeydəbin”......

Çoko ki,çımi bənav votemone Xıdovəndi Ğəvi nom Kərimə-Ğıronədə çandə kərə de bənə Əziz iyən Şədidiul-İğabi ismon bə icoye.Əziz yəni qıləy səbarz ki,əy məğlub kardey mumkin ni və Şədidiul-İğab bə ə kəsi votey beydə ki,deəy mıborizə bardeyro hiç qıləy ğudrət mevcud ni.liza əgər bənə Luti(ə) şəhri qıləy çırkin iyən de qıno pur bıə şəhr bıbu,Xıdovənd deştə Ğəviyə ismi əvış pevuşkıniyeşe və bəsə qınokoronsə sığə voşış enovneşe.qıləy zəmon ki,fironıjon bəştə cinoyəton pik həddi rəsin və bə əzobi loyığ vindey be, Xıdovəndi bə Nili ru əmrış karde ki,firon iyən çəy zumandə ləşkəri  rə qıləy zəmonədə məhfko və əvoni dıyoədə bıtosno,ğərğko.Adi ğovm həm deştə zu iyən ğudrəti ixtixor kardə və İlahi ayəon təkzib kardə holədə,Ğəviyə Xıdo bə tındə voon dəsturış doe ki,həmonə ğovmi zumand iyən qınokorə insonon çəvon kəon iyən ğəsronədə əvoni rostkon bə həvo və diyəroə vıronədə ekkuon bə zəmin.Əbrəhə ləşkər ıştə ğudrəti ovcədə bə Xıdo kə Kəbə həmlə kardey iyən bə Məkkə şəhri səmt hərəkət kardə zəmonədə həmonə məkoni volo kardey fikış hestebe,Xıdovənd bə qədə pərəndəon əmr kardedə ki,de vey hırdə sığon həmonə ləşkəri vırto-volokon və çəvon bə Xıdo kəy səmt bıə hərəkəti vəy bıqəton.həmçinin Ğəviyə Xıdovənd Nuhi(ə) ğovmi istehzo iyən həddış nıbə əziyyəton mığobilədə fərmon doydə ta osmoniku voş bıvoy və zəminku çeşməon bıqılo,bə cuş booy və qıləy kırtə mıddətədə qıləy dıjdə tufon bərpo bıbu ki, oxoyədə zəmini dim ovəyz eqəteydə və həmmə dınyo çı ovi jiyədə mandedə.bın tufoni zəmonədə ğərəz pok iyən çokə insonon hiçkəs solim iyən baği mandedəni.bəçəy xotoye ki,mınosibə zəmonədə Ğəvi ism və nom de Şədidul0Ğabi nomi bə ico omə ta de hostonə formədə har qıləy qıno bə vırə rosnə və de Xıdovəndi kərəm və lutfi məğrur bıə kəson qıləy çəşnavi bıdo ki,həmonə mehribon iyən Ərhəmər-Rahiminə Xıdo çı cəzo zəmonə Əşəddul-İğab həm heste......