İlahi əsma və nomon

İlahi əsma və nomon

Xıdovəndi nomonku qıləyni həm Həmidi ism və nome.ım şərifə nom Kərimə-Ğıronədə 17 kərə təkror bıə və bə tarıfi loyığe iyən pəsəndide mənoədəy.

Həmidi ism Həmdi kəlməku peqətə bıə ki,bə mızəmmət iyən tehməti ziddi mənoədəy.Həmidi ism həm Məhmudi mənoədə və yəni sıtoyiş kardə bıə və həmən Hamidi mənodə yəni sıtoyişəkə mənoədə omə. həyğətədə Xıdovəndi bə həmmə məxloğati xəlğ kardey iyən bəvon ziyodə neməton əto kardey dəlili və ğərəz Əv hiçkəs bo sıtoyişi koyığ nıbe xoto-Məhmud:-sıtoyiş bıə nomış heste.həmçinin bın dəlili xoto ki, Xıdovənd ıştə salehə bandəon çokə əməlon bə sıtoyişi loyığ vindedə və bəvon tarif doydə və çəvon çokə əməlon mığobilədə ziyodə səvob iyən mıkofoti bəvon əto kardedə,doydə,əve bəy hamid yəni sıtoyişəkə nom noydən....

Xıdovənd Həmide və həmmə məxloğat əy sıtoyiş kardedə.joqo ki,İsra mıborəkə surə 44-ə şərifə ayədə hamyedə:”Tusəbbihu ləhu....haft osmon iyən zəmin və harçi ki,çəvon miyonoe,(əvon)həmmə de Xıdovəndi sıtoyiş iyən tənzihi məşğule”.həlbəttə ım bın mənoədə ni ki,Xıdovəndi sıtoyiş çı məxloğati sıtoyişiku bə şıkrəy.çıro ki,Həmidə Xıdovənd ha holədə Həmid iyən sıtoyiş bıə kəse.hətto ehanə ikəs əy həmd iyən sıtoyiş nıko,deməkə ki,Xıdovənd ıştən ıştəni həmd kardedə.çoko ki,Fatihə mıborəkə surə dıminə şərifə ayədə omə:”Əlhəmdu lillahi rəbbil aləmin.sıtoyiş iyən şukr bə Xıdovəndi məxsuse ki,çı aləmon pərvərdıqore”.....

Həmidə Xıdovənd ki,həmmə Cəmol iyən Cəlol sıfəton fəğət bəy məxsuse və fəğət Əv bə həmd iyən sıtoyişi loyığe.əmmo hakəs ıştə dərki əndozə və mığdorədə Xıdovəndi həmd iyən şukri bə vırə rosnyedən.nəyinki,Əv çokonə bə yolyəti iyən əzəməti loyığe.həlbəttə həmonə tovfiğ iyən ovandəti həm çı Xıdovəndi tərəfikuye ki,bəştə bandəon inoyət iyən mərhəmət kardedə ki,həm zohirədə və həmən də zıvonədə və həm botındə iyən həmən ğəlbədə çəy şə`ni ıştə dərk iyən fame əndozədə sıtoyiş iyən həmd kardey beydə.İmom Zeynul-Abidin(ə) Səccodiyyə Səhifə dıvo kitobi iminə səyfədəjıqo hamyedə:”əgər Xıdovənd milləti bəvon doə zoyodə neməton xoto ıştə sıtoyiş iyən həmdi zıneyku oqətəşbe və əvon həm Xıdovəndi sıtoyişi bə vırə rosnəşon nıbe,jıqo qıləy holətədə çı insoni marzonku xaric əbin və bə heyvoniyyəti məğami ərəsin.çoko ki,Furğani mıborəkə surə 44-ə şərifə ayədə bə ın məsələ işorə kardedə və hamyedə ki,əvon bənə heyvoni,bəlkəm bəsə heyvonatisə həm saru roşon vıjniyə”......