İlahi əsma və nomon

İlahi əsma və nomon

Muidə Xıdo ıştə bandəon bo bə hisobi rəseyro obəqordıne və əvoni rost bəkarde iyən çəvon fdimiku çı ğəfləti pardəon pebəqəte və har qıləy mevcud ıştə kəlom iyən rəftori mığobilədə bə cəzo bərəse iyən çəyku çı har qıləy nemət və çokə əməliku sıvol-cəvob bəbe.Ənbiya mıborəkə surə 104-ə şərifə ayədə bə ın həyğəti işorə kardedə və hamyedə çoko ki,sıftənə xılğət bo Mubdiyə Xıdo hoston iyən səhle,çəy oqordıney həm de Muidi nomi vey hoston və vey səhle.joqo ki,ayədə hamyedə:”yəvmə nətvis-səma....qıləy ruj ki,osmoni bəyənde bəjənemon iyən əy çəvon çəşonku punhon bəkardemon bənə qıləy səyfə ki,de mur doey ıştə daxilədə bıə nıvıştəyon məxfi kardedə.çoko ki,sıftənə kərə xılğətımon de hostonəti ofəyemone.duborə sənibətonəvoni obəqordınemon.əmə ım və`dəmon doə və bəy bəfo kardey boştə lozım zıneydəmon iyən hukmən əy əncom doəkəs bəbemon”.tıbğe ın ayə Xıdovənd Ğıyoməti ruji xılğəti ijən obəqordıne və insoni bəyji və rost bəkarde və əy ıştə ədolətinə məhkəmədə bo bəçəy hisobi rəseyro hozzı bəkarde.əv həm dınyoədə ıştə kardə koon hozzı bəvinde.ım umumi oqardemon bo bə hisobi rəseyro de Muidi vositə çı Xıdovəndi ədolət tələbə simvolonku bəbe ta çı həmmə kəson cəzo iyən mıkofoti bəkam nıkardə holədə bıdoy.....

Muminə bandə de Xıdovəndi ın dıqlə ismi dərk iyən zıney,bəştə məbdə iyən miadi yəğın pəydu kardedə.liza ıştə dınyəvi jimoni jıqo dəvordıneydə ta qıləy ruj ki,Muid əy çəy maqi bəpeştə ijən obəqordıne,xəcoləti nıbu.əv çok-çoki bə ın həyğəti vağife ki,çiç əməlko,həmonə uxrəvi jimon iyən həyotədə bəy oqordıney bəbe.bəçəy ğəzavo-ğədəri imon iyən bə Muidi ədoləti bovə bəy qıləy məxsusə oroməti baxş kardedə.joqo ki,ım ko çəy bandəçəti məsir iyən roy ğoym iyən mehkəm kardedə......