Məhdiye-Məvud(əc)

Məhdiye-Məvud(əc)

İslomi zuhuriku deməkə ki,14 əsri mıddətisə əlovə zəmon dəvardedə, əmmo ijən çı İslomi fırğəon və məzhəbon miyono ixtilofon mevcude.ım ixtilofon zəmonon iyən məntəğonədə vey zumand iyən kali devronədə kamranq bıə.torıx nışon doydə ki,havaxti bə mısılmınon vəhdəti əsos bə İslom iyən Ğıroni nışon doə rahnumaon  əməlışon kardə,çı oroməti iyən bıvəti sayədə bə inkişof iyən zumandə ğudrəti dastışon pəydu kardə və və çı ixtilofi zəmonədə  bihudə canq iyən mıhoribəon çəvon ğudrətiku bəkam kardəşe və çı cokəson bəçəvon piyo bıə təüsəlluti zəminəş hozzı kardə.bə həmonə dəlili xotoye ki,Xıdovənde-Aləm Kərimə-Ğıronədə muminon çəvon deşmınon mığobilədə bəy təvəkkul,bə istioğomət iyən səbri dəvəti bəpeştə əvoni vanq jeydə və hamyedə:”və bə Xıdo iyən bəçəy rəsuli(fərmoni) itoətkənən iyən mınoğişə(və keşməkeş)məkənən ta sıst məbənən və şımə ğudrət(və əzəmət)çı miyoniku nışo.və səbr iyən istiğomətkənən ki,Xıdovənd de istiğomətəkəyone”.(Ənfali mıborəkə surə-46-ə şərifə ayə).bə İlahi ın fərmoni əməl kardey ısət çı har qıləy zəmonisə ziyodə lozım bə nəzə rəseydə.çıro ki,dınyo sultə tələb  kardə imperiyalist iyən istemorə ğudrəton de ciddiyyəti və de ziyodə əbzoron məxsusən de mediya iyən informasiyə vəsiləon İslomi dınyoədə çı ixtilof iyən təfrığə eğandey dumon və səy kardedən ta çı mısılmınon dini erjon, çəvon izzət iyən ğudrəton çı miyoniku bıbardon.ım qıləy holədəy ki, İslomi dini tərəfdoron de kali ixtilofon bə ico,ziyodə iyən muhimmə mıştərəkatonışon heste ki,bəçəvon əsos bə qıləy ğoymə ittifoğ  iyən ibemoni dast pəydu kardey bəbe.min cumlə ım mıştərəkə amilon bə Xıdo,bəçəy peyğombəri iyən bə vohidə osmoniyə kitobi əsos bıey bəzıne və həmçinin  bə bəşəriyyəti aləmi munci iyən xiloskor bıə Məhdiye-Məvudi(əc) etığodi əsos bıey amili işorə kardey bəbe ki,çı İslomi məzhəbon həmmə ittifoğ kardə və ğəbul kardə vıronkuye....

Kərimə-Ğıron de oşkoə holəti bə İslomə dini qlobal bıey və həmçinin zəmini dimisə çı salehə insonon bə qırd dınyo bıə hakimiyyəti işorə kardedə.həmçinin çı İslomi əziz-qromiyə peyğombər(s) iyən çə həzrəti Əhli-Beytiku(ə)omə rəsə çandə qılə həfisonədə çı həzrəte İmom Məhdi(əc) barzə şəxsiyyəti həxədə bənə oxorızzəmoni munci iyən nicotədə unvoni bəy işorəşon kardə və bə çə həzrəti ğeybət,ğıyom iyən dınyo səviyyədə bıə hukuməti keyfiyyətışon bəyon kardə.Peyğombəre-Əkrəm(s) çə həzrəti ğıyomış jıləvoni tevsifışon kardə:”çımı Əhli-Beytiku qıləy merd (oxorızzəmonədə)ğıyom bəkarde ki,çəy nom çımı nom iyən çəy əxloğ bənə çımı əxloği bəbe və Əv dınyo de ədoləti iyən dodi pur bəkarde”.əhlı-sınnəti rəhbəronku qıləyni bıə Əhməd ibn Hənbəl həm ım hədisış çı rəhməti rəsuliku(s) jıqo vardəşe:”ehanə çı dınyo umriku fəğət iqlə ruj həm baği bımando,Xıdovənd hukmən həmonə ruji çəmə xanedaniku qıləy merd ğıyom bəkarde və Əv dınyo de ədolət iyən dodi pur bəkarde.çoko ki,de zılmi pur bəbe”.binobərin bə Ğıroni təlimon iyən Nəbəvi sınnəti əsos həmmə mısılmınon çı Xıdo oxonə Vəliyy yəni bəşəri munci Həzrəte İmom Məhdi(əc) bənə vəhdət iyən həmdıləti unvoni bıvıjnon və intixobkon.fəğət yeqanə tafutinə nəzə bın zəminədə ıme ki, Şiəyon jıqo etığodışon este və hisob kardedən ki,ə həzrət bə dınyo çəşış oj kardə və de Xıdovəndi irodə çı ğeybəti pardə peştonoye və deçəy əmri zuhur bəkarde.əmmo əhlı-sınnəti əksər alimon bın bovədən ki,ə həzrət hələ de tosə ısət təvəlludış pəydu kardə və bə dınyo oməni.de ın vəsfi har dıqlə dastə çı Xıdo-Rəsuli(s) nəvəonku bıə Həzrəte İmom Məhdi(əc) barzə məğamin iyən buzurquvarə şəxsiyyəti oxorızzəmonədə bıə zuhuri iyən çə həzrəti qırd dınyoədə qıləy adilonə İslomi hukuməti bərpo kardey həxədə qıləy vohidə nəzəşon heste və çı İlahi oxonə Muslih iyən İslohəkə  iyən çə həzrəti İlahi ideyal və hədəfon bo islomi dınyo və bo qırd mısılmınon qıləy ibemon iyən həmrayəti mehvər və dayirə bıey bəzıne.......

Əmmo bə Məhdiye-Məvudi(əc) məhvəri əsos vəhdəti bo islomi umməti çı noliliyyətonış bıey bəzıne? bə ın sıvoli sıftənə cəvob ıme ki,Əv çı zılmo-sıtəmi jiyədə bıə bo həmmə mısılmınon və hətto bo ğeyri-mısılmınon həm dəvəşə vəomə qıləy umu məzhər iyən simvole. binobərin ikəs ki,bə ə həzrəti qlobal səviyyədə bıə zuhur iyən inğılobi bovəko,çı İslomi dınyo yavə vəzyət iyən çı sultə tələb və imperiyalistə ğudrəton və çəvonku bə şıkrə mandə zolımkorə hukuməton noumu beydənin iyən bə ayəndə və vəomə qıləy umuşon heste.çoko ki,Kərimə-Ğıron Ənbiya mıborəkə surə 105-ə şərifə ayədə ım macəra oxo bə saleh iyən çokə insonon nəf iyən xeyri zıneydə və hamyedə:”və əmə Tevrati bəpeştə (Davudi)Zəburədə nıvıştemone ki,hukmən çımı çokə ko soybə banədon zəmini dimisə hukuməti varis bəbeyn”.boçımi əsos həzrət Məhdi(əc) çı salehə insonon rəhbərəti bəştə ehdə pebəqəte və əkəson ki,bo ısətnə vəzyəti çok bıeyro qıləy umuşon heste,çə həzrəti zuhuri mıntəziron iyən əy çəş kardə kəsonin.ım intizor ıştən vey erjin iyən qıləy ibodət bə hisob omeydə.çoko ki,İslomi peyğombər(s) hamyedə:çımı umməti həmməysə barzə əməl (İmom Məhdi) fərəc iyən zuhuri intizore. İslomi məktəbi nəzəku ım intizor bəpe təsirion iyən həyği bıbu.bın mənoədə ki,fərd iyən camiyə ıştəni bo ə həzrəti erjon iyən hədəfonro hozzıko iyən deəy tətbiğ bıdo.Və`dəd odə bıə Munci iyən xiloskori ulqu ğərol doy insoni bo ə həzrəti barzə hədəfon real kardey iyən bə həyğət rosnero bə ziyodə səyon və xəhdon səmt sevğ doydə.beşək həzrəte Sahibəz-Zəmoni(əc) muhimmə hədəfonku qıləyni de dınyo qırd zılmkor iyən sıtəmkorə hukuməton mıborizə bardeye ki,əvon de mıxtəlifə şivəo milləti bə fəğrəti,fəsodi iyən bədbəxtəi dıço kardəşone.binobərin mısılmınon həm bəpe bə ın islomi iyən Məhdəvi hədəfon əsos çı zılmkoron sıtəmi ğəbul nıkon və bəpe deəy mıborizə bıbon.