İlahi əsma və nomon

İlahi əsma və nomon

Xıdovənde-Aləmi coqlə ism iyən nomonku qıləyni Əfuvvi nome ki,əv həm sərfı-nəzər kardey iyən ozod kardey mənoədəy.Xıdovəndi Ğəfuri ism həm Əfuvvi ismi vey neze.Ğəfur çı puşniye mənoədəy.Ğəfurə Xıdovənd de insoni xəto iyən fırsemoni baxşey iyən əfv kardey,əy çı mırdoləti iyən yavə çiyonku pok kardedə ki,çəy nəticə həm dınyoədə xey-bərəkət və axırətədə həm dıjdə mıkofot iyən nemətonku iborəte...

İnsoni ruşd,ozavziye iyən kəmol çı İlahi ism iyən nomon təcəlli girovədəy çanədə ki,ım ismon ziyodə təcəlli pəyduko,inson həm vey komil bəbe. Əfuvvi ism həm de ın forməy.yəni çandədə ki,inson mənəvi cəhəti ozavziyo iyən inkişofko,həmonə əndozə iyən mığdoroədə Əfuvvi ism həm bəvədə zuhur pəydu kardedə və cokəson vey rohət baxşeydə və əfv kardedə.joqo ki,Xıdovənde-Xalığ nuri mıborəkə surə 22-ə şərifə ayədə hamyedə:”vəla yəətəli.... şımə miyoniku mol iyən jimoni hevujəti soybon bəpe ğəssəm nıhon ki,bə nezə odəmon,miskinon iyən bə Xıdo royədə hicrətəkəyon qıləy çi nıdon,bəlkəm bəpe əfv iyən quzəşt bıkon və çəvonku dəvardon.aya dılon ni ki,Xıdovənd şıməni bıbaxşo?və Xıdovənd Əbaxş iyən Mehribone”.Xıdovənd bın ayədə bə təmom mısılmınon fərmon doydə ki,ıştə iyən fəğıron fırsemoni mığobilədə bə ğəzəb oməni,dastpoçə iyən ğeyri-məntıği ğərol nıqəto,bəlkəm iyande əfv bıkon və yande qınonku dəvardon.yəni çoko ki,Xıdovənd bə intiğomi de komilə ğudrəti bə ico,qınokoron baxşeydə,əmə həm ıştəni de İlahi ım əxloğ iyən sıfəton dərostəmon və bəmə nisbətədə bevəci kardə kəsonku dəvardəmon iyən əvoni bıbaxşəmon.boçi ki,çoko ki,cokəson bə səhf və xəto mırtəkib beydə,əmə həm çı xəto iyən fırsemonon mə`rəzədə ğərol qətedəmon.çən,ehanə əmə cokəson əfvkəmon iyən bıbaxşəmon,bın surətədə çı Xıdovəndi məğfırət iyən baxşeş həm əməni dəbəqəte və çəmə vucudədə bıə noxsanon bəpuşniye.